حًمًدٍيَهّ

البارت 9

#حمديه

بقلم روكيان عبدالله
#بارت9
الخطيئة
_ 9 _
طلع مهدي من البيت وسديت الباب وراه, واسندت ظهري على الباب .. لچ حمديه .. صدگ چذب .. حصلتي مرادچ .. ورحت احلم لاول مره بالزواج .. وبالعيشه الهنية ويَّ مهدي .. ما كنت قبلها افكر لا بزواج ولا بغير شي .كنت بس اريد مهدي يلتقي بيَّ ويحضني .. واختلي بي .. واشبع منه . بس من صار اللي صار بيناتنا اليوم , حسيت تغير كل شي بيَّ. ..حسيت بعمري وجسمي اكبر .. كل شي بيَّ صار چبير . ما تندمت على اللي صار ولا فكرت شنو اللي راح يصير اذا مهدي عافني فد يوم , ولا بللِّي ممكن يصير بيَّ , من ورا هاي العلاقة .
رجعت طبيت للحمام واسبحت وتنشطت .
انتظرت مرت خالي تجي تجيب غده وياها, دا آكل واشبع . بلاعيمي .. اللي اتحججت بيهن ..طابن .. وما عاد احس غير بس بالجوع .
من دون كل الايام تاخرت مرت خالي بالشغل , من جتي تلگيتها بالمجاز , من سمعت صوت الباب دا ينفتح طلَعِتْ من الغرفة وركضت حتى اتلگاها . دخلت هيه وكريم سويه . تفاجئو .. من شافوني ما بيه شي , لان الصبح عافوني بالفراش . كنت مخليه عيني على ايديها , دا اشوف شجايبه أكل . كانت شايله جدر أكل , مخليته بفوطه بيضه وصارته . گالت :- صلوات على محمد .. الحمد لله من گمتي من الفراش .. اليوم دا اشوفچ زينه وخدودچ مورده .. شفتي شلون الدوا فادچ .
ما تدري آني ما ضگت شي من الدوا !!! وشمرته كله بالبلوعه ..هههه.
:- الحمد لله يُمَّه ... صرت زينه .. بس جوعانه هوايه .
:- سوده عليَّ .. هاي جبت اليوم جدر تمن , وخلت لي عليه ام مهدي بانية ولحم , المره رادت تشيلني جدرين , گتلها ما أگدر وخُبَطِتْهِنْ بجدر واحد وجبتهن .
يعني مهدي كان مطَّمن من اجا عليَّ للبيت . امي كانت تشتغل ابيتهم . اوف مهدي .!!! ولا كال ولا حچه ..!!
گلت لها :- يعني شفتي لمهدي ... ؟
كنت اريد ابعد الشك , لان من جابت طاريه گلبي رجف , فطلع السؤال مني بدون ما افكر بي . كنت اريد اطير من الفرح .
گالت :- أي شفته .. بس اشو من شافني , راح بَدَّل ملابسه على السريع وطلع , حتى سلامه عليَّ شمره شمر .. من وره خشمه , گلت ويه نفسي هذا انهزم , يمكن حتى لا ينطيني الهدية اللي وعدنا بيها .. هههه . حتى أمه صاحت له .. گالتله وين طالع قبل ما تتريگ .. سوى نفسه ما سمعها فما رد عليها ولا جاوبها ..

:- يعني راحت علينه الهدية .. ؟؟ هاي كلها من ورا البلاعيم الگشر !!
:- لا ... لچ .. د صبري عليه ما راحت .
هاي الحچي آني فتحت الصره مال الاكل , وكشفت الجدرية وگمت اضرب بالتمن والمرگ بايديَّ .
:- اليوم كان عدهم شغل هوايه .. مهدي مطَلِّع كل هدومه , حتى النظيفات ذابهن بالحمام .. وگايل لأمه اغسلوهن .. تصوري حتى البطانية والچراچف منزلهن .. وغسلتهن كلهن ..
:- أي ؟؟
:- لعد ما تشوفين ليش تاخرت .. اليوم هلكت من الشغل ... بس عاد الله عوَّض ..
:- شلون ؟
:- تعرفين هذا الولد خبلني ؟ .. من خلصت شغل وطلعت من بيتهم تلگاني براس الشارع , سلم عليه سلام مو طبيعي .. اكلني بالسلام .. ولا كأنه ذاك المهدي اللي شفته الصبح . آني استغربت شنو هذا ؟ شو الصبح من جيتهم شمر السلام عليه شمر, وهسه .. أكلني أكل بالسلام .. هااا .. وبعد سالني عليچ ..هماتين .
شهگت باللگمه من گالت , سألني عليچ .. اريد احچي بعد ما اگدر . گمت رحت شربت مي من الحنفية , ورجعت . تبلعمت ما عاد اگدر آكل , حتى نِفَسي انگطع , من ورا الشهگه . رجعت گعدت گبال مرت خالي اريدها تكمل سالفتها بلا ما اسئلها .. لأن ما عاد اگدر احچي ...حتى النِفَس صار عليَّ حسره .
:- يمَّه عسل حمدية .. على كيفچ بالأكل .. يا امي , ما راح يطير من گدامچ . شو ما شاء الله بركه.. ما يخلص .
گطْعَت سالفتها , وراحت تحچيلي على ام مهدي , شلون كاشخه اليوم وشلون لابسه .. كيلو ذهب .. يمكن نست سالفت مهدي وشلون تلگاها براس الشارع . وراها غيرت الحچي وراحت تحچيلي على الجوارين وعلى هذا ابو الكماليات اللي براس الشارع , شلون جايب نفانيف ومعلگهن برَّا المحل . ما كنت انتبه لكل هاي السوالف , كنت اريدها ترجع تحچيلي عن مهدي وشگاللها من تلگاها.. بعد ما راحت من عندي الشهگه سالتها :- يا يمه انتي كنتي دا تحچيلي على مهدي , اشو طفرتي ورحتي تسولفين غير شي وجبتيها من شانون لبانون .. شجاب سالفة الجوارين وابو الكماليات على سالفة مهدي ..
:- لچ ملعونه .. دماغچ كله يم مهدي .. ما صدگتي اجيب طاريه .. مهدي .. مهدي .. حتى من جبت طاريه شهگتي بالاكل .. فهميني شنو قصتچ وياه ؟
كريم كان ملتهي بالأكل , بس من سمعنه دا نحچي على مهدي وكل ساع نجيب طاريه , فك حلگه علينا . مرت خالي نست نفسه , وما دارت بال لكريم . فكريم من يمه گالنا :- ما تگلولي شنو سالفة مهدي هذا .. ومنو هو هذا مهدي ؟
..
:- يُمَّه ...!! هماتين رجعتينا على نفس السالفه .. اها اا. يا كلمه ردي لمكانك .. وضُرَبِتْ حلگي بايدي . انتبهت مرت خالي على كريم .. :- يله حبيبي كروم , گوم غَسِّل اذا شبعت .. هاي سوالف مال نسوان .. ومال شغل, لا تخلي بالك يمها .. گوم حباب .