بيكون بهجت واقف متعصب ومش عارف عبير راحت فين
بهجت بعصبية: مش عند اي حد مش عند ابوها أو اخوها مش عند حد من صحابتها راااااحت فييييين ..
مني: ازاي الكلام ده ! طب ممكن تكون نزلت في أوتيل ولا حاجة
بهجت قعد عالكرسي ومسك دماغه ...
مني: اهدي هاترجع ما تخافش دي عبير بتحبك ومالهاش غيرك
بص لها وهو ساكت وقام خرج من الاوضة ودخل اوضته بعصبية وهو بينفخ
بهجت : انتي فاكرة اني هاسيب شقي عمري بالساهل كده والله لو فيها موتك يا عبير
*_____________________________*
بتكون فرح واقفة في البلكونة مش واخده بالها من مازن اللي واقف بيبُص ليها مبتسم
بتدخل أمها وبتلاحظه فبيتحرج ويمشي ..
فرح بتتعصب: مافيش فايدة في الزفت ده
بتضحك أمها:
يابت رايدك وطلبك كتير وانتي اللي رافضاه ما هو كسيب وأيده تتلف في حرير واهم من ده كله بيحبك وهي الوحدة عاوزه ايه غير راجل يحبها
ضحكت فرح بسخرية :
وانا هاكل الحب لما اجوع واتغطي بيه لما أبرد الحب ما بيأكلش عيش .
انا مش هاطلع من الهم اروح هم تاني انا عاوزه أعيش يا ما تعبت ما الناس عايشة في فلل وقصور اهو وحياتهم زي الفل اشمعنا احنا !
_ارزاق يا بنتي ومقسمها الخلاق
فرح: والله ما يستاهلوا النعيم ده !
_ ما يمكن فلوسهم هي اللي تعباهم اللي أعرفه ومخليني راضية اوي بحياتي وحامدة ربنا عليها أن ربنا عاطي لكل واحد 24 قيراط ومقسمهم ليه صحة وستر وفلوس وعيال وراحة بال واحنا الحمد لله ربنا مبارك لنا في كل حاجة حتي الفلوس اللي مش عاجباكي سترانا احسن ماكنا نجري علي مستشفي المرض الخبيث ولا الله لا يقدر يطلع حد فينا عليل الحمد لله انا راضية علي كل اللي يجيبه بس أنا سعيدة ومبسوطة وراضية بحياتي وانتي لازم ترضي عشان ربنا يكرمك
فرح بصت علي شكل الحارة:
هارضي ياما بس لما نطلع من الحارة المقرفة دي ونروح مكان احسن لأني تعبت
_طب ادخلي نامي يلا الوقت اتأخر عندك شغل
فرح: طيب .
*__________________________*
مــــــــلـــك ملك
بتبص ملك حواليها بتلاقيها في نفس المكان اللي شافته في الحلم
الرمل ابيض والضوء اللي حواليها مش ضوء شمس كأنها علي كوكب تاني وسماه خاليه من اي لون
بتلاقي جيهان واقفة في مكان ورجلها زي ماتكون غارزة فيه
بتجري عليها ملك ..
ملك: ماما ..
بترفع وشها وتبُص ليها :
ساعديني يا ملك انا تعبت
