- عفرررررريت بقا اخرتها عفرررريت!!!!!!
ماما بصلتي بذهول هى ومدام امل اللى اتفزعت من صوتى طبعا اما الشيخ فمعرفتش احدد ريأكشنو الصراحه
- عفريت اما يعفرتك يا بت المجنونه
= ايه يا ماما انا اللى مجنونة دلوقتى انتى مسمعتيش الست ديه جايه تقول ايه
وشاورتلها على مدام امل اللى مازالت بصالي بذهول
ماما كانت لسه هتنطق بس قاطعها الشيخ وهو بيقول:
- ممكن تسبوني مع لؤة شوية بعد اذنكوا يا جماعه
= على جثتي اقعد انا والعفريت لوحدنا والله ما تحصل
ولكن الجمله لم تتعدى نطاق تفكيري لانسحاب والدتى العزيزة ومدام امل بكل هدوء فى الانتريه وفضلت انا والعفريت اقصد والشيخ لوحدنا!!!!
فضلت واقفه مكاني متحركتش وببصله بترقب وكأنه مصاص دماء وهينقض عليا يموتني وفى المقابل كان هو قاعد بكل رزانه عفريت ملو هدومه كده وبيبتسم نفس ابتسامته الهادية وقرر يقطع الصمت المريب المسيطر على المكان ده وقال:
- تعالي يا لؤه واقفه عندك ليه ده بيتكوا حتى
بصيت حواليا لقيت ماما ومدام امل دخلوا المطبخ ومفيش حد غيرنا فعلا فروحت قعدت على اقرب كرسي جنب البلكونة ومتسألونيش ليه لاني شخصيا مكنتش عارفه انا بفكر فى ايه
- اخبارك ايه يا لؤه
بصتلو باستغراب اخبار مين يا شبح ده انا لسه جارية من قدامك مرتين انهاردة ايه السؤال اللى ميتسألش ده
بس تجاهلت كل الكلام ده ورديت بترقب
- بخير الحمد لله
ابتسم وقال:
- قوليلى بقا ايه حكايه العفاريت اللى مدوخاكى ديه
= ع.. عفاريت.. ت ايه بس يا شيخ مفيش الكلام ده بسم الله الرحمن الرحيم
بصلي وسكت بس انا مقدرتش اسكت
- بقولك يا شيخ
= اتفضلي
- هو انت اسم حضرتك ايه
حسيت وكأنه كان مستني سؤالي فابتسامته زادت وهو بيقول:
- اسمى محمد شريف متولي ابن الشيخ شريف متولى الله يرحمه
بااااااااااس لحد هنا وحسيت انى... لا مش عارفه اوصف احساسي فلقيت نفسي بنط من على الكرسي فاجئة لدرجه انه اتخض ورجع لوره فى كرسيه
- اسمك محمد قول والله
= مالك يا بنتى فى ايه
- اسمك محمد محمد بجد والله وطالما انت اسمك محمد بيقولولك يا شيخ شريف ليه
جاوبنى بتوتر واكيد بيقول فى عقله انى مجنونة بلا شك
- ده يعنى تمجيد لاسم ابويا وانا بعتز بيه مش اكتر وعشان الناس كانوا بيحبوا والدي فبينادوني باسمه.. انتى ايه مشكلتك
