ويبقى الحال علي ما هو عليه
الجاني حر
مبسوط و الضحكه ماليه عنيه
بيتنقل ويزيد فالشر
من قلب لقلب
بيدهس فيه وبيسرق نبض
بيمثل انه بيوزع حب
واول ما القلب يلين في ايديه
بيخليه عبد يلعب بيه
لحد ميزهق ويرميه
والمجني عليه
مقهور من غدر الجاني بيه
مكسور من ظلم القاضي فحكمه
ازاي مش شايف بعنيه
معقول ضعفه قلل حجمه
ولا الدنيا اتقلبت حواليه
واضح جدا انه ضحيه
وواضحه اثار الجاني عليه
وأدله كتيره فالقضيه
بتدين الجاني وتوريه
بإن اقل حكم هيبقي مؤبد
بس القاضي مش مؤيد
ولا الخلق هيسمعو ليه
الاسم ضحيه وشايل ذنب
ازاي ساب الجاني يأذيه
بس الذنب ده ذنب القلب
وعمره فيوم ما كان بإيديه
مهما يزيد ف دموع
مهما يبرر مش مسموع
عمر ماحد هيسمع ليه
ولا هيشوفو انه مخدوع
وانه بخوفو اتلعب بيه
وهنا القاضي حسم الموضوع
ونطق الحكم وقال ايه :-
ان الجاني مش معلوم
والمجني عليه مش مظلوم
ويبقي الحال علي ما هو عليه
