واقفه بقلب فحياتي
واجيب واودي فذكرياتي
عن كل اللي فات
عشان بس اتوقع الآتي
واعرض اللي ملوش لازمه للبيع
ولقيت ايه ؟
حبه كلاكيع
متكومه مجاميع
كل فتره من الفترات
فاكره انها احسن حاجه
الغرور واخدههم اوووي
والفكره اصلا مش محتاجه
تعالو كده نفرزهم
وعلي الارض نفرشهم
يمكن نلقي حاجه كويسه للبيع
نبدأ بسم الله
ونقول كلاكيع ...كلاكيع للبيع
ومين ما كان معاه الله عمره هيضيع
وادي الطفوله
هي المسئوله عن حالي الان
انا مش غلبان
انا غلبي ورثتو من اهل زمان
من اهل ضعاف
من فقد حنان
من حمل تقيل اوووي علي انسان
اه انا ندمان
ومشاعري حاليا مكسوره
لك ان تتخيل حياتي المقفوله
ويارتني بجد فشلت
وياريتني لعبت الاولي
وياريتني كنت جرئيه
وقولت لأ ولا كنت خجوله
مكنتش الدنيا هتبقي كلاكيع
ونقول كلاكيع ...كلاكيع للبيع
وشباب بيروح مني وبيضيع
وعملت انا ايه ؟
كنت السميع
روح وتعالا
ذاكر ل تضيع
غيرك ده فاشل وسايب المواضيع
ولا اخوه تقوي
ولا رفقه تضوي
ولوحدي بسوي
مستقبل قوي
وبحاول اعدي من وسط الكلاكيع
وف لحظاتي الحاسمه بلاقي الصد
واللي ابني فيه معظمه يتهد
واشتري فسراب ومعرفش ابيع
ونقول كلاكيع ..... كلاكيع للبيع
و فتره كمان من ضمن الفترات
كان مطلوب مني اقف بثبات
واختار بالعقل رفيق العمر
وخلاص اتحسم الامر
واخترت صح مش غلط
بس صح ليهم مش ليا
واخدت انا نار الجمر
وعديت وبلعت الزلط
واهو فتره وعدت صعبه عليا
وانتقلنا منها لفتره الرومانسيه😍😍
وقلبي ف ظنه عمره مايخييب
ولقيت الحضن والقلب الطيب
من بعد تعود واطمئنان
ظهر الجفا والجنان
خيانه وجرح وحرمان💔💔
ومبقاش القلب وديع
وظهرت بردو الكلاكيع
وادي النتيجه كله معروض للبيع
ونقول كلاكيع ...كلاكيع للبيع
قرب يابيه
شاور عليه
قربي يا مدام
شوفي قدام
كلاكيع كلاكيع.....كلاكيع للبيع
قرب ياجميل
عرض وتساهيل
وكمان خصومات
بالكاش وشيكات
كلاكيع كلاكيع...... كلاكيع للبيع
