إراه بقلبي

"وراء كل عظيم نفسهه"

مو كل شيء نكتبه أول صفحة معناها بداية إحنا دنعيش في كل لحظة بداية وكل لحظة قصة تختلف مجرد الي اكتبه جزء من حياتي عشته واحب اوصفه .
اسمي براء ومن بغداد الي خلاني قوية تجاربي الي مريت بيها طبعا هذه القصة الي راح تكون منشورة هي فقط قصتي خلال سنة كاملة بيها هواي أمور واجهتها لكن بداية حياتي الحقيقة كانت مؤلمة جدا وما جنت اتخيل انو هيج لما اوصل للصف السادس علمي اعيش هيج لحظات جنت اتخيلها اوصل لآخر سنة وامتحن تطلع درجاتي كلها عالية وادخل ((طب عام جراحة قلبية أو عصبية )) أو أمراض السرطان طبعاً اختياري للطب لم يكن سدى أو عن فراغ أو هيج مجرد جمالية أو عاطفة بل حتى ماريد اكون مثل بعض الأطباء المتكبرين الي يتركون العملية ويروحون شفتها بعيني من جنت صغيرة على عكس الطفولة الي هيج وقت كله يلعبون ...
رحت مرة لأمي بالمستشفى جنت بوقتها اول ابتدائي ولما وصلت جانت ديسوون الها عميلة الدكتور ترك العملية وطلع من الغرفة وجان الباب مفتوح اباوع من بعيد على ماما وما بيدي شي أقدمه سوى انو اصفن حتى جنت ما بجيت وصارت عركة بمستشفى اليرموك وماما بيها سرطان الكبد .بذيج اللحظة كلت لو اني دكتورة اخلي هيج ماما تنترك؟!
وبعد هواي اسباب خلتني اكون قوية حتى اوصل لكلية الطب ..
المهم هذه لقطة حبيت اكتبها الك والج حتى تشوفون أحلامكم لازم تكون على خدمة انساني وخدمة للناس لأن كلنا نمر بظروف صعبة والقوي الي يعديها ويعرف شيسوي .
احب الكتابة جدا اني غارقة بيها يومي بدون كتابة حروف هو ليس يوماً بالنسبة إليه .اكتب حتى أغادر العالم الي فقد بعض الشئ الصدق والإنسانية  .

جنت كل يوم قبل لا انام هذه اللحظات اتذكر بيها الساعات الحلوة واعيدها مرة ثانية وثالثة حد يجيني النوم وانام .. .
المهم وصلت للخامس علمي ونجحت منه بمعدل ٩٣ والحمد لله لما رجعت فرحت حيل لأن عود مثل الي ينشرون ستوريات واخيرا دخلت سادس رسمي حسيت الشعور وفرحت وجان بذاك الوقت كل صديقاتي بهيج وقت ديحضرون نفسهم للمعاهد الا انا احب اكون بطلة لقصتي وملهمة لذاتي .

اول خطوة سويتها رحت على اليوتيوب كتبت يمكن درس الكيمياء أو الفيزياء وكمت اگلب بالفيديوهات واباوع وبداخلي
براء براء اخيرا صرتي سادس تذكرين لحظات الوعود يله شدي حيلج وطلعي معدل عالي حتى تحققين حلمج يله .

احب جامعة النهرين يم مستشفى الكاظمية لأن تخيلوا كل مرة عمتي تخربطت وجانت بيتها قريب يمنا وهيا بيها قلب وسكر وجلطة لماما ما كدرت تروح ويانا لأن تذكر قبل لما جانت بالمستشفى اني وبابا رحنا وجنت ثاني متوسط عود كبيرة وكذا ومسؤولية فلما رحت عمتي بس نامت طلعت افتر وحديقة تجننن وشفت أمور حلوة والي يقتلني تعامل الأطباء مو هلكد أكول بكلبي الله لو أني هسة دكتورة 💔
عيني فكلما أمر بالسيارة من يمها وبصفها كلية الطب جامعة النهرين ودي ابجي احبها حيل .

سبحان الله حتى ماما تحبها وحلمها تكون دكتورة في جامعة النهرين نفس الشي ونفس الشعور .ماما جانت جدا شاطرة حيل بس قبل صارت حرب ودمرت مدرستها فاخوها ما وافق تداوم بمدرسة بعيدة عليهم فبطلها وانهدم حلمها   .شوصف لما اسولف لماما على مشاعري تجاه الجامعة اشوف عيونها تدمع وكلام ما ينتهي أكول بقلبي ليش هيج الناس تحطم احلام البقية ..دائما ساعدوا الناس حتى تحقق حلمها انت وانتي ابدا لا تنطون مجال للكلام السلبي يحطمكم .

فثاني يوم طبعت الافصل الاولى لكتاب الفيزياء والاحياء وبنات خالاتي خلصن سادس فانطني ملازم رياضيات حيدر وليد جبتهم وصورتهم للذكرى بديت سويت قناة على التلي خاصة انقل بيها الملفات الي احتاجهم والوزارايات وصور طلعاتي ومشاعري حتى تكون احلا ذكرى .
رفعت شعار دفعة  ٢٠٢٣ حتكون قوية 😃
رحت لبست تاج وكعدت احجي وية نفسي أكول السنة القادمة بدلاً عن هذا القميص الي لابسته البس اللابكوت الأبيض يارب إن شاء الله تعالى مثل هذا اليوم ومثل هذه الساعة والدقيقة ارجع من كلية الطب ...
كتبت بدفتر السادس احلا لحظات الطالب راح يعيشها هنه خمسة الأولى لما اطلع معدل والثانية لما تطلع الانسيابية و الثالثة يطلع بالانسابية مبروك تم قبولك في جامعة كذا واول يوم بدوامك بالجامعة ذني لحظات الهن شعور مختلف ...