إراه بقلبي

اجاني ضوء

راح اشارك بتحدي القراءة العربي وحتى لو مو افوز واطلع من ضمن العشرة الأوائل واسافر مو مشكلة المهم اطلع الأولى في بغداد ومن ضمن الفائزين ع العراق ..
جان عندي دراسة واحس ضغوط هواي منها مسؤولية جنت كلما اشوف قنوات الأساتذة يكولون لا تاجلون ما افكر أصلا بالتاجيل واطلع بسرعة من القناة ..
فشنو كلت لماما ولبابا على سالفة التحدي وافقوا ما عندهم اي مشكلة المهم انو اوصل واحقق الحلم والأحلا من هاي راح اتحدث إمام جمهور بالفصحى لأن اريد اتذكر كل كلام الناس الي اذوني بهاي السنة حيل واطلع كل الطاقة السلبية وراح استمر هاي الحياة مو دائما نحب الراحة تجينه بسرعة اني واثقة رب العالمين مراح يتركني لأن كل يوم بليل ابجي بهدوء اريد حلمي يتحقق لأن هو الأساسي فإذا تحقق البقية سهلات وعلى مهل اشتغل عليهم .جانت عدنا من أقاربنا بنية اسمها نور يابههه هاي نور ولا عبالك قريبة علينا كلش تحجي كلمات تاذي الشخص مشاعره فكامت تستهزا بينا لأن فقرة ولأن مداخلة معهد وخواتها داخلات
وهنا خواتها غير اهلي ولو ما امهم جان ما وصلن المهم كلش اتاذى من اشوف ناس همها بس تجرح أو بس عملها بالحياة جرح الآخرين .
ليش هيج معقولة وصل الضمير إلى الصفر أو إلى الأقل
وين الإنسانية بالموضوع
لما تشوف شخص مخذول ومجروح وغصنه مكسور أجنحته تلفن ليش تجي انت وتزيد جراحاته يكفي هذا تفكير والله العظيم خطيه .
حيل قهر
المهم كعدت الصبح ورحت للمدرسة والمدرسة اخذتنا نحو الكرخ فجيت لما صاحوا اسمي وكفت على المنصة وبديت احجي وبداخلي جراحات عليلة اريد أصيح اريد أكول شوكت يتحقق الحلم ؟!
كمت احجي بالفصحى واعرف عن نفسي وكلها كامت تكول ممتاز وعفيه
وبعض الأساتذة يعرفوني لأن شاركت ذاك العام كالوا براء نريدج هالعام ماكو لازم الأولى.
كلت الهم ان شاء الله تعالى اولى لما طلعنا جانت المديرة وياي فكالت لمدير التربية الكرخ الي يعرفني كالت اله : مستواها كلش نازل 🙂💔💔 
احس جسمي راح يتوقف ورح تصعد روحي عزا والله جاي يهدموني بس على رغم من هذا أكول أكو بعد فرصة وما اهتم لأي كلام عادي ميخالف الأهم رب العالمين وياي .
رجعت للبيت وحجيت لبابا ولاهلي كلش فرحوا خاصة بابا احس عيونه كامت تدمع
الله شوكت يكولون بنتنا طلعت طب عام وصارت دكتورة 💔🙂
هذه فرصة أحسها نمت بداخلي من تحدي خلتني اقرا اكثر حتى انجح واوفر اكثر وقت للتحدي والدراسة هم .

والليلة  أول ليلة من شهر رمضان .
الله جنت ذاك العام خامس علمي واشوف السادس لما يراجعون كلت احلى شي هو شهر رمضان فعلا هو احلى شي طاقة بي وقت هواي هم يعني اكدر اخلص كومة اشياء بوقت قليل وهم طاقات هائلة بي  عيني اليوم السحور عليه

بابا : صباح الخير
براء : صباح النور رمضان كريم عيني
جتي شهد الي هيا اختي وصف ثاني متوسط احلى جزء بحياتي هي الي دائما بجانبي وتشجعني وتوثق بيه وتكولي اني واثقة راح توصلين للي تريدي براء انتي قوية المهم كلت الها يله عيني تعاي ساعديني بالسحور

شهد : لا والله عليه المواعين مال فطور مثل من اتفقنا
براء : دتعاي شبيج خل نصور وكذا تبقى ذكرى 😅😁هسة غير تجي تساعدني  ..شهد السنة الي تجي أنتي وزاري واني جامعة تعاي فدوة خل نوثق

شهد : تمام عليه اسوي زلاطة واشوف بعد شسوي
😁😁😁😁 تم الاصطياد .
وسويت السحور جان كلش حلوة والعائلة كلها كعدت وكعدنا ندعي ونصلي والجزء الحلو اجه المسحرجي وسمعت صوت وسجلت صوتي وكلت يارب بحق هذا الوقت العظيم أن شاء الله السنة القادمة اني جامعة واسمع واشوف كل هل الذكرى ...

- هُناك أيام بِحيَاتك كُنت تَظنها لَنْ تَمُر .. كانت هَمك الكبير .. مَرت ولعلك نَسيتَها ..والآن أيضاً سَيمُر.. لاتقلَق.

الخلاصة لا تهتمون لاي كلام وامشوا باحلامكم وكل الي يكول شوكت تمر هالايام راح تمر وتصير احلا ذكرى