إراه بقلبي

كتمان وخذلان

بعد من خلصت امتحانات نصف السنة مادري احس كل العالم مراح يفهوا الشي الي اريده
طلعت نتيجتي ورسبت بالفيزياء والرياضيات بس مو معناها خلاص فشلت الفاشل الي ما يستمتع بالرحلة الي يحب بس لنفسه الي يتوقف وينتحر هذا الفاشل أما الشخص الي يواجه ضغوطات الحياة بنفسه ويوكف لكل مشكلة كدام ويعالجها بنفسه من دون مساعدة اي احد هذا هو النجاح بحد ذاته .

كل سنة تكون عليه سهلة واواجه أمور بسيطة بس السادس بديت بي اني اقرا لوحدي ومن دون معاهد انوب دخلت المدرسة ماكو مدرسات وأخذت انتساب وجاي اتحمل كل قراراتي انوب فوك من أخذت انتساب وبدون امتحانات يومية ولا فعاليات المدرسة يجي شخص يحجي كلام فارغ

ودي أصيح بوجهه واكوله كافي رجاءا فهمت السادس لازم كل تطلع اول من البداية حتى توصل لحلمك شهل التفكير ؟!!
كافي تدخلات
وبليل لما اوصل لذيج الساعة أظل افكر هو صدك ليش جاي أواجه هيج شي ؟
معقول راح ارسب
معقول اعيد السنة ؟!
ياربي انت الي تدري بداخلي شنو ساعدني يارب لا تترك عبدا لجأ اليك
كافي هل الأفكار السلبية لا تخلين براء كلام الناس يأثر بداخلج وتذكري دائما السفينة ما تتأثر إذا حوله البحر بل تتأثر إذا دخل الماء بداخلها وهيج هم مع كلام الناس ..
مرات افكر واكول ليش دائما الناس تريد النجاح وهمه مو ناجحين يعني اكو مرات صديقاتي هنا يعيدن السنة ويرسبن وهاي بس تجي توكف يمي تحجي كلام مثل السم على النجاح وانتي ليش ما نجحتي ودي ارجع عليها السؤال بس مشكلتي انو ما احب اجرح الآخرين .
خاصة عندي بنية راسلتني مباشرة بعد النتائج وعرفت اني رسبت جان تكولي براء معقولة انتي رسبتي ؟! ليش هيج
بس جانت اسئلة سهلة
هسة هاي اسئلة سهلة وما جاوبتي لعد شلون بالوزاري ؟!
ضحكت وكلت الها الله كريم
وكمت كلت خل اسوي اكل لنفسي احسن ما كاعدة واني طالعة جان اسمع كلام من عمي يكول بعد معرفته انو رسبت كال : ليش رسبت لا تخلوها بعد تطلع لأن رح ترسب أكثر
سويت نفسي ما سمعت رحت للمطبخ علساس اسوي اكل بس مالي نفس أو احس روحي تعبت بعد كل الي صار
جان شخص يكولي دائما اسندج بقلبي إذا جان الكتف مخلوع
ومرة من المرات هم يكول : براء تذكري دائما انو  بلحظات الفشل مثل السهم من يرجع حتى ينطلق بقوة
كلماته ليهسة محفورة بأذني وما انساها كمت وكلت ميخالف راح ابدي من جديد واسوي جدول جديد يا الله  ..
بديت اقرا كالعادة وهواي اسمع كلام و مرة العصر جنه راجعين اني وماما من السوك فشفت ام صديقتي كالت هلو براء اكولج حبيبتي باجر لازم تروحين للمدرسة تودين صور ومستمسكاتج .اني هنا نصدمت عندي صديقات وبنات يعرفوني كومة محد راسلتني وكالت يريدون وباجر آخر يوم والي يضوج أكثر انو اني ما مداومة حتى اعرف الاخبار وماما جانت وياية فكالت لا تضوجين عاديه هالايام  الأغلب مصلحة ميخالف..
اني وبطريق جان اشوف بنية بالمدرسة تعرفني سلمت عليها وعلى امها فكالت امها : الله يوفقج حبيبتي بنتي دائما تسولف بيج هسة انتي يا صف
كلت الها : سادس
كالت الله يوفقج

ماما دخلت قبلي للمكتبة فاني اريد ادخل جان اسمع صوت بنتها بصوت هادئ كالت لامها ماما هذه رسبت بدرسين 💔🙂

وهنا الصدمة دخلت للمكتبة وحد الآن اتذكر اللحظة ذيج لما الناس تبدي تتركك بمجرد انو تفشل كلها اتركك
رجعت للبيت وسويت عشه وكمت اقرا وبعد يومين راح يبدا شهر رمضان ..