#إبتليت_بك
:: 6 ::
فاقت بيا .. نقزت في حضني طول وقعدت تبكي .. انشلت حركة ايديا وقتها .. بس حضنها كان طفولي وبرئي نوعا ما .. حطيت ايدي ع راسها وقلتلها ( هشش خلاص انتي في أمان )
فاقت ع روحها وبعدت عليا ومسحت دموعها .. وقالتلي : حسام رجعني لأهلي خليهم يقتلوني
ابتسمت لعفويتها .. فتحت باب الشقة ودخلتها قبلي .. قعمزتها ع الصالون
_ كيف عرفتي مكاني ؟؟
_ من المقر
_ هههه حفظتي مكانه بسرعة
_ لا بس ربي دلني والحمد لله
نضت جبتلها طاسة امية وقلتلها: سامحيني امل ماكنتش نعرفه وسخ لهالدرجة
شربت المية دفعة وحدة كانت محتاجة للحياة .. متعطشة بيها
_ انت مصدقني !!
_ شوفي أمل .. انا مانعرفش نصدقك والا لا؟؟ .. بس انا حاليا نمر بظروف صعبة مانقدرش نخليك عندي ولا نقدر نفكر في قضيتك لانها معقدة في جيهة اماليك
_ هذا اللي نبي نوصله .. ارفعني ليهم وبس
ابتسمت : ارتاحي توا وغدوا باذن الله نرفعك
دخلتها لداري .. سكرت وراي الباب وانا رقدت في الصالون .. كنت خايف من نفسي عليها .. النوم ماجاني لحظتها وانا نفكر في حضنها !! .. انا قلت حضنها ؟؟ .. ايه والله لامست شي داخلي .. مانعرفش نوصفه .. والشيطان هديك الليلة مكسد عليا وياخد ويألف سيناريوات وافكار ترفع وتجيب .. نضت بسرعتي للمطبخ خديت طاسة امية باااردة شربتها .. وكأني نحاول نخلي تفكيري في الشرب والاكل وبس مانبيش نفكر فيها .. فتحت الثلاجة لقيت فيها تفاحتين .. خيرك يادنيا عليا حتى في التفاح تبيني نعزمها !! .. ضحكت ع افكاري الغبية .. قعمزت ع ارضية الكوجينا وانا ناكل في التفاحة .. غمضت عيوني ..مضايق ونفكر في البنت يللي في رقبتي .. في خالتي يللي في الاكيد ح توصل لأمي كل شي صار معاي .. وفي باقيرا يللي مسكت هالايام .. وفي .. وفي .. هلبا افكار
حسيت بحركة قربي .. فتحت عيوني لقيتها أمل مقعمزة بعيدة عليا شويا .. حكيت عيوني بقوة قلت اكيد نتخايل .. بس مازالت مقعمزة مقابلتني .. ودمعتها ع الخد
_ أمل !!
ردت عليا بصوت مبحوح شوي : آفندي حسام .. ارفعني لحوش اماليا
فتحت الثلاجة وانا مازلت مقعمز جنبها خديت التفاحة التانية ومديتهالها .. خدتها مني وابتسمت
_ انت مش انت وانت جعان ههههه
ضحكت .. وكلت منها شويا وقالتلي: انا معاش نبي نعيش ياآفندي .. حياتي تعقدت خليهم يقتلوني .. انا متاكدة ان نماذج خليل مازال منهم هلبا .. وخالتك ح تحكي للناس القصة كلها باش يطلع ولدها برئى .. وتقعد سيرتي ع كل لسان .. الشي اللي كنت نخاف نضيعه وضاع مني .. شن مازال نبي منها الحياة !!؟؟
سكتت .. كلامها كلها حق .. آي بنت بتخاف ع سمعتها وشرفها .. وزي ماعندنا في الدين والعرف والمجتمع أن ( راس مال البنت سمعتها ) .. واطيت عيوني .. بعد كلامها مانقدرش نزيد حرف .. بس يللي صارللها غصبا عنها .. شن الحل معاها ؟؟ .. صغيرة مازال ماطلعت من كلمة ( قاصر ) وتفكر في الموت ؟؟!
_ انت درت معاي اللي تقدر عليه .. وبارك الله فيك .. بجد ماعمره قابلني شخص طيب زيك .. حتى خوتي ماكانوش هكي معاي .. كنت ع اتفه سبب ننضرب .. تصدق مرة كنت بنحطله تليفونه في الشحن .. طاح مني ع الارض .. ضربني وخلالي وجهي علامات .. رغم هذا انا عارفاته يحبني ويخاف عليا .. بس الموقف يللي انا فيه صعب ياآفندي .. آي واحد في مكانه ممكن يفكر يقتل اخته كل مايسمع كلمة من الناس عليها .. فلهذا انت مش ملزوم تخليني عندك .. غدوا ارفعني ليهم .. ارفعني ليهم وبس .. هما يعرفو يتصرفو وانا بعد اللي صار كله مااعتقدش توجعني النتيجة .. بس نبي نقولك حاجة وحدة بس
بلا رادة طلعت كلمة ( قولي )
_ انا والله بنت نظيفة وتربيت صح الظروف وكل شي جي عكسي .. بس والله خليل هوا اللي اعتدى عليا وحاول يغتصبني مرة تانية لما عرف بحقيقتي .. وقبلها كان يلمحلي بانك بايعني ليه .. وكلمتك مرة بتليفون فاطمة ومارديتش عليا كنت في اسوء ظرف .. قبل ماتصير الكارثة
خبطت ايدي بالقوة ع الدولاب يللي جنبي ( كله مني .. سامحيني أمل بالله عليك )
ابتسمت وقالتلي: انا ماقلتلك باش تتأسف .. يللي صار مش انت السبب فيه .. المهم وضحتلك ونبيك تصدقني .. انت الوحيد في هالعالم كله ح تصدقني لانك حاضر كل شي معاي
_ نبي نطلب منك طلبين باش نعرف انك سامحتيني .. شن رايك !!
_ انا سامحتك والله .. شن هما الطلبين ؟؟
_ الاول تاكلي تفاحتك كلها .. وتشربي كاس الحليب اللي بنصبهولك توا .. والتاني غدوا طالع من الصبح بكري نبي نروح نلقى مكرونة صالصة غداي .. شن قلتي ؟؟
ضحكت .. وكانت أحلا ضحكة نسمعها بعد ضحكة الغالية .. ووقفت وهيا تاكل في التفاحة
_ انا موافقة
درات التحية العسكرية وقالتلي : أمرك ياآفندي
وقفت وضحكت عليها .. طلعت باكو الحليب صبيتلها طاسة .. وعطيتها مفتاح الدار
_ نبيك ترقدي مرتاحة .. باش تتطمني اكثر سكري ع روحك الدار تمام !!
_ ان شا الله
,,,,,,,,,,,,,,,,,,,,,,,,,,,,,,,,,
أمل ::
ماكانش ضروري منه المفتاح ياحسام لاني واثقة فيك ونحس انك شخص مستحيل تأذيني .. شربت الحليب .. ورجعت لداري مرتاحة نفسيا وجسديا .. اتكيت ع السرير بعد ضمنت الباب مسكر .. خدتني عيني للأحلام نحاول تكون سعيدة ..
ماحسيتش بروحي الا بعد مالشمس حرقتني في وجهي .. خشت من الروشن توضحلي ان اليوم أحلا باذن الله .. حبيت هاليوم مانعرفش ليش .. وكنت معبية طاقة ايجابية .. وقفت ع الروشن .. كانت حركة الناس طبيعية في الشارع .. شفت للبنات ماشيات للمدرسة او كورسات او ماشابه .. ابتسمت وتمنيت لو كنت بينهم .. حياتي معقدة مستحيل نكون زيهم .. قداش ندمت ع ايام زمان نبكي لاني ماعنديش شنطة جديدة والا كندرة حلوة زي كندرة نهى بنت فصلي الغنية .. والا .. والا .. كنت تافهة .. ربي بظروفي اهيا خلاني نحمده ع اشياء كانت عندي وفقدتها .. وتوا نحمده لان وراني قداش الدنيا صغيرة .. بتذمرنا وقلة حمدنا ليه تزيد تصغر في عيونا .. يارب عفوك ورضاك عني
فتحت الروشن وتنشقت عطر الحرية بالكامل .. بعد قرابة 5 أشهر .. نحس بالحرية المطلقة .. انا بنت .. انا حرة .. ضميت السرير ورتبت الدار بالكامل .. فتحت شعري كان في مشط صغير .. خديته ومشطته بس كنت محتاجة للدوش السريع البارد ينشطني اكثر .. وحوايج ماعنديش ؟؟ .. فتحت دولاب حسام لقيت فيه تيشرتاته وسروايله .. خديت منه تيشرت لونه اسود مع سروال توتة قطني اسود وفيه خط ابيض عريض ع الجنب .. دوشت وتحت الدوش كنت سعيدة جدا .. المية كانت باردة نزلت ع حرارة جسمي فيقتني لهالجسم المتورم المتعذب .. يللي الكل طمع فيه رغم صغره .. واطيت عيوني ليه .. فعلا لقيت علامات الوحشية عليه .. لامست ايديا بطني المتجرحة يللي بالمية بردت عليها .. ذراعي .. افخادي .. كنت فعلا محتاجة للنظافة .. غسلت مرة وتنين وعشرة .. بعد كل غسلة نتعب اكثر .. ودموعي زادت حرقت خدودي .. وشعري يللي بدي فيه التساقط بعد كان مثل لكل بنت في عيلتنا وشارعنا وزميلاتي .. طاح بشكل رهيب .. من حالتي النفسية يللي كل يوم اسوء .. كان الدوش بمثابة تهوين ع الخاطر .. بس تحوّل الى تذكير بالواقع المرير .. وانتي ياأمل مش بنت .. مش عذراء .. ومش ح تكوني حرة في يوم من الايام .. نزلت للحوض ثنيت ركابي وضميتهم لصدري وبكيت .. فعلا بكيت تحت الدوش .. ندمت ع فضولي في هديك الساعة .. وندمت ع تمردي في العيلة .. وندمت ... وندمت .. وندمت .. وماينفعني الندم بشي .. حسيت بطقات ع الباب .. رعش منها جسمي .. واذكرت أني بأمان والحمد لله .. سكرت الدوش ورديت ( نعم )
_ أمل .. انتي بخير !!
مسحت دموعي ووقفت : ايه .. شويا ونطلع
_ انا جبتلك قضية فطور وراجع للعمل .. ردي بالك ع روحك .. ماتفتحي لحد أي كان يكون تمام !!
_ تمام .. شكرا آفندي
_ هههههه بلاش آفندي دي .. كرهتيني فيها ههههه
ضحكت وكان قلبي معبي دموع وآهات .. حسيت بيه بعد عن الحمام .. مسحت جسمي باللبس يللي كنت لابساته .. ولبست حوايجي .. انا قلت حوايجي ؟ .. قصدي حوايج حسام ههه
شفت وجهي في المراية .. كان وجه عبوس هلبا وباين عليه الارهاق والتعب .. غسلته بمية باردة هلبا .. توضيت للصلاة .. يللي قطعت فيها هلبا وقت كنت حرة .. وماكنتش حاسة بقيمة شي في هديك الايام .. وسنين عمري يللي ضاعو في التذمر .. آهو جي اليوم يللي نلملم فيه باقي ايامي ونرجع لربي .. سبحان الله قداش رحمته واسعة .. رأف بحالي وهون عليا الايام الصعيبة بوقفة حسام معاي .. طلع هالمخلوق ونوّر حياتي من جديد ..
فتحت الباب بالشويا وناديت ( حسااام .. حسااام )
مارد حد تأكدت انه طلع ومش هنا .. طلعت ع روس صوابعي طبست ع كل تركينا في الشقة ومافيها حد .. كان شعري مفتوح باش يجف .. خديت حوايجي وحطيتهم في الغسالة الموجودة في المطبخ .. ولعتها واطمنت ان ماتجي العشية الا وحوايجي جافات ونلبسهم .. فتحت الاكياس لقيت فيها ( زبادي .. حليب .. جبنة .. زيتون اخضر .. وزبدة .. طماطم اخضر .. بصل .. فلفل اخضر .. باكوين مكرونة .. مشروب كولا ) .. ذكرني بخوي الصغير .. لما نبعتوه للمحل يجيب كل شي نبوه واللي يفضل ياخد بيه حكة مشروب .. ابتسمت ورتبت كل شي في مكانه .. صبيت كاس حليب ودرت ساندويتش بالجبنة .. وقعمزت بيهم ع الصالون وفتحت التلفزيون كان ع قناة جايبة مسلسل تركي .. ومعروفين الاتراك مسلسلات العشق والغرام والخيال طبعا .. خليته وقعدت نراقب في تصرفات البنات .. شكيت في نفسي بنت لحظتها هههه .. حركت راسي بقوة باش نفتت افكاري التافهة وغيرت القناة مرة وحدة .. كملت ساندويتشي .. بديت في تجهيز الغداء واللي ح يكون ( مكرونة صالصة )
,,,,,,,,,,,,,,,,,,,,,,,,,,,,,,,,,
حسام ::
لما خشيت للشقة ماحسيتش وجودها بكل .. دورتها في دارها مهناش .. سمعت صوت الدوش .. قلبي رف عليها طقيت وكانت بخير .. بس صوتها واضح انها تتوجع ..
كنت مقعمز في مكتبي وسارح ع وقفة عماد عليا
_ في شن تفكر يابو صاحب
تلفتله لقيته جايب سخان شاهي ومعاه بريوش .. وقفت من مكاني وقعمزت جنبه
_ قول شن في ماتفكرش بيه ؟؟ .. الحياة كله ولت عبارة عن تفكير في تفكير
مدلي طاسة شاهي صغيرة وقاللي: انا لما نتعب من التفكير وتخش بعضها نرقد هههه .. فلهذا خش ارقد
_ كخخ مبردك .. وقت نوم توا !!
_ شن صار في البنية ؟؟
شربت الطاسة في دفعة وحدة ورديتهاله: ماصار شي قاعدة عندي
_ عندي فكرة .. لكن نبي الامان قبل
_ ههههه حيوان .. قول وان شا الله تطلع زي وجهك بس
سرد عليا فكرته .. يللي راسي وقف من التفكير بعدها .. مع الساعة 5 العشية .. روحت للشقة .. درست السيارة قدام العمارة .. حطيت راسي ع الدومان نفكر في فكرة عماد الصعبة .. بس هيا ممكن الحل لتوا .. نزلت من السيارة قابلني جارنا صالح .. كان رجل كويس وحافظ للقرأن وامام جامع شارعنا .. عزمني ع طاسة شاهي عنده في الحوش .. ولبيت العزومة ع شرف الموضوع يللي جايني بيه ..
_ ياولدي انا نعرفك ونعرف بوك الله يرحمه واهليتك كلها ماشا الله .. بس في دوة طالعة عليك غلط في الشارع
_ غلط ؟؟ .. دوة شنو ياشيخ ؟؟
_ ان في بنية ربي يستر عليها عندك في الشقة .. وحسب ماقالو النساوين اللي شافوها لاهي اختك ولاهي امك ولا مرت خوك حازم
_ شافوها !!
_ يعني ماتنكرش انها غريبة عليك ياولدي وغير محرم انت عليها .. وهالشي يللي قاعد يصير لا يرضي ربي ولا خلقه .. انا من حبي ليك وخوفي ع سمعتكم الطيبة جيتك طول ومانبيش كثرة دوة مع هالناس الوسواسة
حكيت جبهتي بتوتر .. وتنهدت : انا ح نحكيلك القصة كلها ياشيخي بس توعدني تقعد بينا ولو ع الموت ؟؟
_ باذن الله .. قول ياولدي
حكيت للشيخ القصة كلها .. القصة يللي صارت معاي انا وأمل من اولها لأخرها .. بعد حوالي ساعتين من الكلام طلعت باقتراح من الشيخ .. بس لازم بموافقتها ومقابلة الشيخ شخصيا ..
روحت وكنت سارح ونفكر في ستين حاجة .. فتحت الباب وخشيت من غير مانستاذن .. نسيت وجود أمل في الشقة اصلا .. لما عتبت جيهة الصالون .. كانت راقدة ع الكنبة وشعرها مفتوح طاير منه شويا ع وجهها .. شفت للروشن لقيته مفتوح ونسمة الهواء تحرك في شعرها .. ركزت ع اللبسة كانت لبستي .. شن جيبها عندها ؟؟ .. وسوسلي الشيطان هالمرة زي ماوسوسلي اول مرة لما شفتها عند باقيرا .. قدمت شويا وانا مبتسم لهالجمال الطفولي .. مانكدبش عليكم ماكانتش جميلة لدرجة تذهلني بيها .. بس كانت ملامحها قوية وخلتني نركز في الحلو فيها .. تصنمت في النظر فيها .. وكنت مذهول بتفاصيلها الصغيرة .. بس في النهاية مش ليك ياحسام .. هالبنت واثقة فيك وانت ضيعت ثقتها بيك .. حركت راسي ورميت هالافكار السودة من راسي .. فاقت بيا مخلوعة .. وقفت تجري شديتها من ذراعها بقوة
_ سامحنى ياآفندي والله ماقصدي
الشيطان كان أسرع من تفكيري الخلوق يللي رقد لحظتها .. كانت ترعش بكل مافيها ونفسها سريع وقلبها يرقى وينزل .. شديتها من رقبتها وهمستلها ( انتي جنيتي ع روحك .. شن رقدك في الصالة ؟ )
_ مش قصدي والله ماقصدي
شديت بايدي شعرها وتلمسته كان رطب .. وكان متضامن معاها وحسيت منه بالرعشة .. ايديها كانو ع صدري وتحاول تبعدني .. لحظتها كأني فاقد الوعي .. مانعرفش شن صار ؟؟ .. تقربت منها شويا ماحسيتش الا بكف منها .. فيقني ع غفوتي .. وكنت قريب منها لدرجة لو حد يشوفنا هكي ح يقول نعتدي عليها فعلا .. فعلا بنعتدي عليها .. دفيتها من عليا وشديت راسي ماكانش هامني الكف قدر ماهامني تفكيرها فيا توا .. قالتلي كلمة عمري ماننساها ( شن تفرق انت ع خليل وباقيرا ؟؟ )
خشت تجري للدار وسكرتها بالمفتاح .. انهد حيلي ع الصالون وشديت راسي وعصرته بقوة .. علاش درت هكي ياحسام علاش ؟؟ .. رن تليفوني وكان المتصل عماد
_ هآآ شن صار طمني ؟؟
_ انا غلطت ياعماد .. غلطت فيها
عماد عيط بصوت العالي: كيف غلطت فيها كيييف ؟؟
كانت خطة عماد نرفعها لحوش اماليها تحت نظري ولو بيحاولو يقتلوها نرفعها لدار الايتام .. بس اللي صار ح يخليها توافق ع دار الايتام او الموت أرحملها من وجودها معاي ..
تلاقيت مع عماد في القهوة يللي في شارعنا وحكيتله كل شي صار ..
_ تستاهل الكف منها وتستاهل اللي قالتهولك .. انت واحد كلب صدقت فيك
_ عماد بالله عليك مش وقته الكلام اهوا .. اعطيني حل !!
_ فهمني حسام .. كل ماتغلط تجيني وتقوللي نبي الحل ؟؟ .. اللي درته كبير في حقها وحقك .. البنت مش ح توثق فيك نهائيا بعد اليوم .. معقولة ياحسام البنت صغيرة .. قوللي لو ربحته الشيطان عليك شن كنت بتستفيد ؟ .. بترضى تتزوجها ؟؟
بعد سؤاله أهوا سكتت .. واطيت راسي وقلتله: خيرك انت نتزوجها ؟؟ .. اول شي صغيرة عليا وتاني شي ....
سكتت ماعرفتش نكمل .. كمل عليا هوا : تاني شي لانها مغتصبة وماسها حد قبلك وماترضاش لروحك ياولد البي انك تتزوجها .. آوووف قداش طلعت حقير ياصاحبي
مارديتش عليه بكلمة .. كان هذا كلامي يللي كنت بنقوله فعلا ..
_ اسمعني حسام يللي صار لازم يتصلح .. ومن الاول
_ كيف ترا !!
_ ترجع لاماليها وتقوللهم انها مازالت حية .. وكنت تحساب الجثة ليها بس طلعت غالط وحاول ادير قصة بحيث ماتطلعش انت بقضية .. وتاني شي سلمها لاهلها وهما يتصرفو معاها
شربت طاسة القهوة يللي قدامي .. وتنهدت .. قلت بصوت هادي : علاش درت هكي بس ؟؟
_ لانك غبي وحمار .. عمره البنت ماتنحط في حوش بروحها هيا وولد .. ولو كان قمة في الادب والدين ضروري مايوسوسله الشيطان عليها ويطيح في حفرة ليها اول ماليهاش اخر .. ربي عارف النفس أمارة بالسوء كان هذا راهو ماحرم حاجات علينا وحلل حاجات .. ياودي من الاول غلط وقلتلك انا
_ خلاص اسكت شويا وترتني بزيادة
_ حسام انت ماحبيتهاش البنت صح ولاه !!
ضحكت وطفيت السيجارة في الطفاية وقلتله: حب شني بالله عليك !!
_ خلاص امالا سلمها لاماليها انت هكي زدت عقدت الموضوع .. واللي كان ليك بيكون عليك توا .. هما 4 شهور اللي قعدتهم عند باقيرا .. بالشهر سياحة بينك وبين خالتك ربي يهديها .. والله البنت سمعتها تمرمدت حرام عليكم .. وجعتني الشييت
_ حسبي الله ونعم الوكيل .. حسبي الله ونعم الوكيل
,,,,,,,,,,,,,,,,,,,,,,,,,,,
أمل ::
معقولة حتى اللي وثقت فيه خذلني ؟؟ .. معقولة كان بيعتدي عليا .. صدقت فاتن لما قالتلي كلهم مرخصينك ومافيش حد معجب بيك .. وحسام طلع زي خليل مافيش فرق ..ليل الليل .. والقمر طلع ضاوي احلا من قبل .. وحسام مارجعش .. وسكر عليا الشقة بالمفتاح باش مانفكرش نهرب .. يارب لو كان مصيري اسوء خودني عندك وخليني نرتاح .. جسمي والله مامرتاح ولا عاد انا قادرة نتحمل فوق طاقتي زيادة .. كنت ممتدة ع سريره ولابسة حوايجي يلل يجفو عليا .. وفاتحة شعري ونلعب بيه ونفكر .. حتى من دموعي خذلتني هالمرة ومابتش تنزل .. لا تليفون .. لا نت .. ولا آي وسيلة نقدر ننقد بيها نفسي .. نتواصل مع آي حد من عيلتي .. يجو ياخدوني من السجن هذا .. خذلني ع اساس محترم وولد ناس .. بس مافرقش ع خليل في حاجة .. بالعكس خليل احسن من الاول كان خبيث معاي .. بس حسام بطيبته وكلامه المعسول خلاني نرتاحله وطلع وغد في الاخير .. لو طلعت وعيطت من الروشن احتمال تتعقد مشكلتي اكثر .. يارب شن ممكن انديره بس ونطلع من هالورطة .. سمعت الباب انفتح .. قعمزت ولميت شعري بسرعة كودا ولبست الشاربة .. وقربت من باب الدار .. نسمع في صوت حد معاه .. حطيت ايدي ع قلبي خايفة .. معقولة وصلت بيه يجيب حتى صحابه يلعبو بيا .. يلعبو بشرف بنت الناس .. لما سمعت صوت يقرب من الدار تمسكت بالباب اكثر وخفت يفتحو عليا هالكلاب ..
( السلام عليكم يابنتي )
#Dudu
