#إبتليت_بك
:: 25 ::
روحت وانا نفكر في رجعتي ع الجيش بعد غياب طويل .. لقيت امل لابسة قفطان لونه سماوي تمعنت النظر فيه اذكرته .. ايه نفسه يللي لما لبساته ليا اول مرة صديتها .. كانت توتيلي في غداي قربت منها وكانت ماشية للثلاجة خشت فيا .. ضحكت وسألتني ( خيرك حسام في حاجة !! )
_ والله لما نعوضك ع اللي صار كله قبل .. والله ياأمل لما تعيشي ملكة زمانك صدقيني
ضحكت وباست ايدي : طول ماانت حنون عليا مش طالبة من الملك شي .. مادامك ملكي انا معناها انا ملكة حسام
ابتسمت بعدين قمت عيوني في الخضرة يللي مقرضة ع الرخامة شبحتلها: شن بديري !!
فتحت الثلاجة وخدت حافظة طماطم الحكة : بندير بكبوكي
خديت طاسة امية عبيتها : والله !! ( شربتها كلها ) خليني انا نديرها !!
_ لالا ارجوووك قاعدة نذكر مكرونتك هاديك المرة
_ تي لا توا كبرت وعرفت انديرها هههه ( وقفت جنبها وباعدتها شويا ) خليني نديرها تربحي
دفتني بقفا ايدها وقالت: حووول ارجوووك جاية النية فيها ماخاطريش نرقد جعانة سومي <3
خبطت ع جبهتها بالخفيف بايدي: معاش تعاوديها سومي اهيا
_ علاش !!
_ راجل انا شن سومي ؟ .. قولي حسام احسن بلاش دلعك مانبيه
قعدت تضحك بهستيريا وتعاود: سومي .. سومي .. سومي
قعدت نجري في جرتها وهيا تلف في الشقة كلها .. لين شديتها سمعت صلوحي يبكي .. دفتني وقالت: حتى صلوحي عجبه الاسم ياسومي .. نحبك ياسومي
_ والله نقتلك ياأمل .. حي ياحي كان يسمع بيه عماد الاسم اهوا لما يطيح القدر
شدت صلوحي تسكت فيه وقالت: وكيف بيسمعه !!
_ ع اساس صلوحي مش ح يكبر ويطلع للشارع ويبدا يناديني هكي !! .. المهم توا انا بنرقد بعد يطيب الغدي نوضيني
_ حاضر سومي هههههه
قلتلها بتعصب ونفاذ صبر: أمل -_-
,,,,,,,,,,,,,,,,,,,,,,,,,,,,,,,,,,,,,,,,,,
أمل ::
بسمة اختي ربي سلط عليها كان الاولاد بعد عليوة جابت تنين وصفاء جابت بنوتة بعمر صلوحي .. كنا نجهزو في حلويات عرس احمد الغالي .. ناداني احمد من برا طلعتله
_ نعم حميدا !!
طبس باس جبيني وقال: شكرا ياأمل جميلك انتي وحسام والله ماناسيه .. ربي يخليكم ليا وقفتو معاي
ضحكت وضربت ع كتفه: تو هذا كلام تقوله .. ربي يهنيك فطومة بنية ماشا الله عليها نعرفها انا
_ حكتلي ع الايام يللي قعدتيهم معاهم .. آآه لو يرجع الزمان لما ندير غير يللي درته
شبحتله باستغراب: كيف يعني !!
شد ايدي بقوة وقال: لما نشدك من ايدك ونرجعك لحوشنا ولا التشحيط يللي تشحطيه واللي يسوا واللي مايسوا اطّاول عليك
اتكيت ع باب وسرحت شويا: تصدق لو رجعتوني ماكنتش عرفت حسام وراهو قدري غير قدري يللي توا يااحمد
ضحك وقال: ربي يهنيكم ببعض .. جيبيلي صلوحة انطلعه معاي
_ ايه والله ياريت خللي نرتاح شويا
عطيته صلاح رفعه معاه للولاد وانا رجعت للعوالة ..
سبحان الله ربي سلّط عليا كلاب الباقيرا يخطفوني ويعذبوني وكتبلي ان حسام ينقذني من بينهم ونتزوجه ويطلقني .. ويتزوج غيري وربي أخد امانته ورجعلي تزوجني .. ومنه جبت حلم حياته صلاح الدين .. صح امه وخواته مايواصلوش فيا .. يكفيني حسام جنبي من هالعيلة كلها .. وانا ماغلطتش معاهم بس كافوني بالسية .. فقت من سرحاني ع هزة من صفا
_ خيرك ياهبلة تتبوسمي بروحك !!
ضحكت وقلتلها: شوفي ربي كيف غيّر الاقدار سبحان الله وبحمده .. ع قد مانشكره مش ح نوفي نعمه عليا .. الشكر ليك يارب والحمد <3
ممكن ربي يكتبلنا شي في هالحياة يوجعنا ونضايقو .. وتوصل بينا المرحلة ان نسألو ربي سؤال نتعدو بيه حدودنا ( شن درنا ياربي وعلاش ؟ ) .. بس بعد ماتنفرج علينا نكتشفو ان ماضيقها علينا الا باش يفرجها من أوسع باب .. ربي كريم .. غفور رحيم
فاطمة عزمتنا ع حفلتها .. فقررنا نديروها مشتركة يعني ناسها وناسنا مع بعض .. كنت واقفة ع المراية نلبس في خراصي لما رن تليفوني بنغمة حبيبي حسام ..
_ نعم حسام !!
_ اطلعي شويا نبيك
_ خليني والله مافاضية
_ امل نبيك ضروري اطلعي
سكرت الخط وطلعت نجري مخلوعة .. فتحت الباب لقيته في السيارة .. رجعت لبست بدلة الصلاة ومشيتله .. سكرت باب السيارة وتلفتله ( خيرك هبلت !! )
ابتسم ومدلي صندوق اسود صغير .. شبحتله مستغربة ( شنو هذا حسام !! )
_ افتحي وتعرفي
فتحت الصندوق لقيت فيه سنسلة القمر .. قمتها باعجاب وقعدت نتلمس فيها مندهشة
_ حبيبي !!
ضحك حسام وقال: عرفتها بتعجبك .. هالسنسلة هادي فتحت عليا باب كان مسكر بالحديد
شبحتله باستغراب : كيف ؟؟ .. فهمني حسام !!
,,,,,,,,,,,,,,,,,,,,,,,,,,,,,,,,,,,
حسام ::
قبل هاليوم بشهرين طلب المحامي يشوفني .. مشيتله لمكتبه بعد خشيت ابتسملي ..
_ طمني بالله عليك
أشر ع الكرسي وقال: اطمن .. تفضل قعمز
قعمزت شبحتله مستغرب: قول بالله عليك
_ وراقيك كاملات من ناحية الخطف والمخدر وماإلى ذلك .. لكن في شي كان غايب عليك سنين
شبحت القدام ورديت شبحتله باستغراب: شن هوا !!
_ خديت ورقة من المحكمة بطلب الاذن باش نطّلع ع ملفك في المقر .. وفعلا وصل عندي الملف اليوم ولله الحمد .. ( مدلي الملف وابتسم ) شوف وقوللي شن الغريب !!
قلبت الملف ببلاهة ورديته لمكانه: قوللي انت والله قلبي بيطيح !!
_ مافيش ورقة قانونية تثبت انك مطرود من الجيش
_ كيف يعني !!
_ يعني من حقك ترفع قضية ضد اللواء حفيظ *** وتطلب تعويض ع السنين يللي ضيعهم عليك
ابتسمت بصدمة وقلت بدهشة اكثر واكثر: قصدي انا من حقي نرجع للجيش وراسي فوق !!
هز براسه بمعنى ايه وكمل: لانه مافيش وراقي رسمية ع الطرد .. ومن حقك ترجع وراسك مرفوع وتطلب التعويض يللي تبيه من الآفندي حفيظ ومش هكي وبس تقدر ترفع فيه قضية تحبسه السنين بحكم القاضي
شديت ملفي بفرح وقعدت نقلب في وراقيه مبتسم .. كمل كلامه المحامي : نهنيك ع حسن السيرة والسلوك في الجيش ياحسام .. واللي زيك المفروض يكون الجيش كله تحت إمرته .. ربي يوفقك ياولدي
شبحتله وابتسمت ووقفت مديت ايدي سلمت عليه بحرارة: شن تطلب مني توا نعطيك !!
ابتسم وقاللي: والله ماطالب منك حاجة .. نبيك بس تهنينا ع البلاد <3
_ البلاد في عيوني
وفعلا البلاد في عيوني .. وكل من في البلاد في عيوني .. انا حسام أمل الوطن .. طلعت من مكتبه نقزت في الهواء من الفرحة وبديت نجري للسيارة زي المهبول كل من شافني هداك اليوم ثبت هالكلمة فعلا !!
شبحت لأمل يللي مندهشة من كلامي وقالت: خديت التعويض !!
_ ياعيني .. بس تنازلت عن القضية
شبحتلي باستغراب: علاش حسام !!
تلفتلها ولاعبت خدها بايدي : لان بينا عشرة عمر .. لولا الآفندي حفيظ وثقته فيا وقت كنت متدرب عنده ماوصلتش للي وصلته توا .. انا مستعد نتنازل عن كل شي لعيون من ساعدني وصلت لهالمرحلة .. حبيبتي مش كل شي في الدنيا لازم ناخدو حقنا فيه .. في أشياء ماليهاش ثمن .. مثلا يعني الصحبة الباهية .. ( تلفتلها وشديت بايدها ) والمرآ يللي تصونك في حضورك وغيابك .. أمل شوفي .. انتي وصلوحي في عيوني وحق الله فداكم روحي .. نبيك تربيه تربية رجال مانبيشي من الجيل الخايخ .. نبيه يخاف ربي .. يصون بلاده .. يحميك انتي وكل اهله وناسه .. يكمل مشواري .. ويوصل للشي اللي انا ماقدرتش نوصله .. ( بعدت عيوني من عيونها ) هالبلاد أمانة في رقبتي لين نموت ونبيه يحافظ عليها من بعدي ( لما تلفتلها لقيتها تبكي ) أمولتي !! ( مسحت دموعها بكفي ) قلتلك من قبل ونعاود نقول دموعك مانبيهمش غير للفرح روحي انتي وكل شي غالي عندي
كنا في السيارة .. مانعرفش كيف قدرت تنقز لحضني وتبكي .. في هاللحظة حتى انا دمعت عيني حضنتها بقوة كان لقيت دخلتها في ضلوعي وحفرتلها مكان معاد تطلع منه ..
( ربي يخليك لينا حبيبي والله مانبي من الدنيا شي غيرك والله والله )
كانت متمسكة فيا هلبا لدرجة الاختناق والله: أمل بتقتليني !
سحبت روحها لكرسيها ضحكت ومسحت دموعها : تو ع خاطر حضنتك بنقتلك !!
شبحتلها ومسحت ماتبقى من أثار الدموع : شن ماتبيش تمشي للحلفة قلتي !!
ضربتني ع كتفي وضحكت: فال الله ولا فالك .. هكي خليتني نلبز مكياجي !!
_ ياودي مهناك مكياج هوا ؟ .. تاخدي وترعي انتي شن فهمك !!
شبحتلي بصدمة وقالت: انا بطبيعتي حلوة اصلا
ضحكت وشبحت القدام: ايه صح .. فليق وكلاه وخيك والله
خبطت ع صدرها بقوة وقالت: والله ؟؟ .. ( قامت السنسلة قلبتها ) امالا علاش جايبلي قمر !!
شبحتلها وضحكت : كان عندي قمر علاش بنجيب قمر يعني !! .. آهو قلت يصبرني لما نشوفك نشوف لرقبتك وخلاص ههههه
ضربتني ع فخذي وقالت: بجديات انا شينة !!
_ يعني مش هلبا
شهقت وتكلمت بصوت عالي: حسااااام !!
ضحكت ع ملامح وجهها كيف وقلت: خلاص انزلي وانتي قريب تاكليني
_ توا نبيك تقول انا شينة والا حلوة !!
حكيت راسي وقعدت نقول ( آممم ) ع اساس نفكر يعني .. شبحتلها لقيتها مركزة معاي وتراجي في الرد .. صيحت في وجهها لين انخلعت وقالت: مبردك مبردك
ضحكت عليها وغمزتلها: بري خلاص قنينة قنينة هههههه
نزلت فرحانة زي الاطفال .. تنهدت وكملت دربي لأمي باش في الليل نروّح بأمل من الحفلة .. خليتها تمشي مع العريس للصالة .. وانا بنرفع أمي وخواتي للصالة
,,,,,,,,,,,,,,,,,,,,,,,,,,,,,,,
أمل ::
لبست قفطان لونه أحمر طويل وفي فتحة للركبة ومن فوق رقبته سبعة وظهره كله دانتيل وكمامه حايرات ومعاه اكسسورات ع الفضي وكندرة فضية وسنسال القمر اللي جابهولي سومي حبيبي .. كنت نتمشى بين الطاولات نرحب بالناس .. تلمحت حنين وحنان يتهامزو عليا مادورتش .. كملت دورتي لين وصلت لطاولتهم ومعاهم امهم .. قعمزت بثقة وابتسمت .. شبحتلي حنين وقالت: نوضي بلا مشاكل خيرلك
شبحتلها وقلت: انا مش جاياتك حنين .. ( تلفتت لامها ) عمتي انا جاياتك لهنا بنقولك أنا بنت ناس وتربيت صح ولو غير هكي راهو ماجيتك توا بنسلم عليك وبنقولك قلبي صافي من ناحيتك .. والشي اللي صار كله غصبا عني وربي مايذوقهولك في وحدة من بناتك
تلفتتلي بصدمة وانا ابتسمت ومديت ايدي : انا نبيك تواصليني وتخشي وتطلعي لحوش ولدك امتى ماتبي .. وانا مستعدة اليوم نخليهولك فاضي ونروح مع أهلي بما أنك تسكني بعيد .. ومن حقك تشوفي حفيدك صلاح الدين حامل اسم زوجك امتى ماتبي .. انا نبيه يتربى بينكم انتم عيلته
شبحت لايدي وشبحت لبناتها وترددت تمد ايدها .. وكيف بنزل ايدي مدتها .. سلمت عليها وحضنتها وبوست راسها وهيا منصدمة قاعدة .. ابتسمت للبنات ونضت من بحداهم .. انا هكي فعلت بأصلي وهيا وراحتها عاد
بعد مرور شهور ::
كانت حفلة تكريم وترقية لحسام .. مسرح في فندق المهاري كان مزدحم بشكل مش طبيعي .. والكل متشوق يشوف حسام بعد غيبته الطويلة .. كنت حامل في شهري الثالث وشادة في ايدي اليمين صلاح الدين يللي كان يشوف بدهشة كثرة الزحمة والناس .. في داخلي كنت فخورة وكان نلقى نمشي لكل الحاضرين ونقول ( انا زوجته .. وهذا ولده .. واللي في بطني بنته ) .. بس عيب ياأمل اعقلي .. هذا نتيجة الفخر الزايد عن حده ههه .. قعمزت انا وامه وماما في الصفة الاولة وحتى خوتي كانو حاضرين .. كان مقعمز ع المنصة خلف الطاولة الطويلة وفي جنبه عماد صاحبه والآفندي حفيظ وغيره من الضباط الكبار .. سمعنا مقدمة الحفلة وبعدين صوت حسام سكت القاعة كلها وبدي يسرد في حكايته مع وطنه .. كنت نشبحله باعجاب وحب .. وسارحة في تفاصيله ومايهمنيش تفاصيل حكايته .. هذا راجلي وحامي وطنه ربي مايغيبه .. صلاح كان مقعمز في حضن أم حسام .. وماما شادة ايدي ومبتسمة .. سرحت لبعيد من أول يوم شافني الى يومنا هذا .. قصتنا تستحق تكتب في التاريخ !!
فجاءة !! .. بدون سابق انذار .. بدون آي مقدمــــات .. صوت طلقة رصاص وسكنت عند ظهر حسام لما بياخد شهادته .. الصدمة في عيون الكل .. وصارت شوشرة وطلعو الناس مهلوعين لبرا .. اما انا فــ كان صوتي حد مــوتي ( حساااااام )
#Dudu
