#إبتليت_بك
:: 22 ::
حسام ::
تخرجت حنين من كلية البشري وحددنا موعد عرسي وعرسها مع بعض .. الهينا في تجيهزات الفرح .. وعزمنا ناسنا وهلنا .. وانا كنت متكدر ونفكر في امل .. ليش كل حب نبداه مايوصلش بيا لبر الأمان ؟؟ .. لازم نتعب نفسيا يعني؟؟ .. خشيت لشقتي يللي كانت كلها بفرش جديد .. أسبوع بس وتكون بنت غيرك تحوس فيها .. أسبوع بس ح نغازل غيرك ونحكي لغيرك وكل شي فيا ملك لغيرك !! .. رحاب وبعدها امل معاش خلولي طاقة كافية نستقبل بيها رنا المسكينة .. رفضت هلبا بس امي كانت مصرّة في الفترة الأخيرة .. ولو رفضت ح تغضب عليا ليوم الدين .. ضمنت رضاها ورضى نفسي خليته للزمان .. هنا كانت تبكي اول يوم شافت أمها بعد غياب .. هنا حضنتني وقت خوفها .. هنا باستني ع خدي لما حميتها .. هنا كلت معاي .. هنا طيبت وجباتها الابداع .. هنا رقدت تعبانة .. لما مرضت عانتني وسهرت ع راحتي .. هنا اقترحت عليا مشاريع خاطرها تكونهم في المستقبل .. وهنا وهنا .. كل مكان في هالشقة ليها ذكرى معاها .. ابتسمت وقعمزت ع الكنبة الجديدة ومديت ايديا للعالي وسندت راسي ع المسند وتنهدت بألم .. طلعت كل الألم يللي فيا .. ألم مش أمل !!
كانت الساعة 11:00 في الليل وقت اتصلت بيا رنا .. رديت عليها بصوت ناعس
_ آيوا رنا ؟؟
_ حسام استاحشتك هلبا .. قلت نهدرز عليك شويا عادي !!
ضحكت بصوت مبحوح : هدرزي ياعمري هي
عدلت تقعميزتي وقلت في نفسي ( ح نسايرها لانها مظلومة وواجب عليا نحبها ونكافيها ع اهتمامها الكبير بيا )
,,,,,,,,,,,,,,,,,,,,,,,,,,,,,,,,,,
أمل ::
كنت شادة شيتاتي نقرا عندي امتحان لما جتني نخصة في قلبي .. واكيد سببها حسام .. آآخ يارب استخلص كل حسام صغير فيا وخليني نعيش مرتاحة .. سهرت ع قرايتي ولوحت كل شي يربطني بحسام .. بعد كملت سكرت شيتاتي وخديت السماعات وطلعت للبالكونة .. فتحت ع اغنية ( لمن نشكي ) لسعد لمجرد .. وبديت ندندن معاها .. اذكرت حسام لما يغنيلي فيها بألم ع رحاب حبيبته .. زعما شن صاير فيها ؟؟ .. اكيد تزوج بنية تانية مستحيل تتطلق وترجعله ..
( الوقت يطـــول في بعـــادك يصعـــب عليـــا ** ويوم نلقــــاك ووجــــودك يشـــفي مابيـــا )
فعلا والله لو حسام معاي توا كان عالج كل جرح فيا ..
( حبــــك مــازال ** معذبـــني غرامــــك غنيتـــو مـــوال ** خايفــ البعــــاد يخلـــي حالـــي حـــال )
آآآآه وبس وينك عليا !! .. ضحكت ع غبائي وحسيت بالبرد ع كتافي خشيت .. تلاقيت مع احمد في المطبخ يشرب في امية .. استغربت ( خيرك ساهر ؟؟ )
_ ماجانيش النوم .. انتي خيرك مارقدتيش !
_ كنت نقرا ( جبدت كرسي قعمزت عليه ) احكيلي شن يللي شاغل بالك ؟؟
_ موضوع كبير فوتيه
ضحكت بهزوة وقلتله بنرة الطف : يعني في اكبر من اللي صارلي ؟؟ .. وشوفني كيف مبسوطة ههه
ضحك وفي ثواني تنهد بقوة : اصعب شي لما يجبرك قلبك ع شي بعيد عليك ( شد طاسة المية وضغط عليها بقوة ) بعيييد هلبا عليك ..( شبحلي وابتسم ) تصبحي ع خير امل
ناض ومافهمت شي منه .. شن الصعب وشن البعيد ؟؟ .. ميلت فمي باستغراب ونضت لداري رقدت والصباح رباح !!
,,,,,,,,,,,,,,,,,,,,,,,,,,,,,,,,,,,,,,
حسام ::
البلاد كلها زحمة في زحمة .. وامي تراجي فيا في حوش خالتي تبيني نرفعها للمحلات توازي احسن قفطان .. علاش !! .. لعرس ولدها الغالي وبنتها اخر العنقود .. الصبر دوشة النساوين ماتمش .. طبست بنقيم شحن تليفوني .. وانا لاهي في التليفون بنشحنه قمت عيني جت في عينها .. امل !! .. وين ماشية في هالوقت هذا ؟؟ .. تلفتت يميني لقيت لافتة معهد الصيدلة والتمريض .. بعد هالغياب الطويل ياامل تلاقينا قدام المعهد .. مازالت العين في العين .. ابتسمت بس تلاشت الابتسامة لما قرنت حواجبها فيا وقدمت بخطواتها للمعهد .. استغربت في تعصبها هذا كله عليا ؟؟ .. وتعقيدة حواجبها في وجهي ؟؟ .. شن درتلك نا !! .. درست سيارتي في الطريق ونزلت لحقتها ..
( امل ياامل .. وقفي !! )
سرعت خطواتها اكثر ومابتش تشبحلي .. سرعت مشيتي وجيت قدامها ومديت ايديا ( وقفي نكلم فيك )
شبحت يمين يسار وقالتلي: حوّل .. عيب قدام الناس
ابتسمت وقلتلها : ليا هلبا ع هالصوت تعرفي !!
نفخت في وجهي متعصبة وقلبتلي عيونها وكملت طريقها .. لما شبحت حواليا لقيت الناس لاهية في حالها .. استغليت الفرصة ومشيتلها نجري .. قعدت نمشي جنبها وهمستلها ( امل بجديات ره .. مخلية مكانك .. اللي درته كله لمصلحتك والله ماكنت نبي هكي يصير بس الله غالب )
وقفت مصدومة .. شبحتلي متعصبة وقالت : والمطلوب توا !!
انصدمت في ردها .. فيقتني ع تصرفاتي الغبية .. واطيت عيوني وقلت : آسف
ومشيت لسيارتي .. اول ماركبت خبطت الستيرسو بايدي بالقوة وتكيت راسي عليه .. شن درت ياحسام كلها يومين وتكون مرآ في ذمتك ؟ .. شن تصرفات المراهقين اهيا وعمرك في الثلاثين ؟؟ .. حسام ياسرك وهم ياااسر ..
امي تلف بين القفاطين هذا يناسب هذا طويل هذا قصير وهذا مش حلو وبرا عاد .. متكي ع باب المحل وسارح نفكر في لقطتي الغبية .. وصلني مسج مكتوب ( كلها يومين وأصير حلالك <3 ) .. ابتسمت ورديت عليها ( ربي يهنينا ببعض ياأمل ) .. سكرته وحطيته في جيبي .. وسرحت في عالم ثاني غير العالم يللي انا فيه توا ..
في الليل فقنا ع أصوات تفجير وتقربيع قوي .. نضت نجري طلعت لوسط الحوش لقيت امي شادة في حنين .. قلتلها بصوت مرعوب ( شن في ؟ )
_ ربي يستر ياوليدي .. قريب الرواشن يتكسرو
نزل حازم وبنته في غمره ومعاه دانية مستغربين في اللي قاعد يصير .. فتحنا ع الاخبار بس مافيش شي .. لعند الصبح والاصوات قاعدة طلعت للشارع انا وولاد الشارع تقصينا الوضع في سيارات الميم طاء والجراد والدبابات .. البلاد خاضت من جديد
ماتفهمو شي كيف صار وامتى صار ؟؟ .. كل شي مرتب ومدروس المواطن بس كلاها بجهله .. الطرق تسكرت والأوضاع كل يوم تسوء اكثر .. رنا كل شوي تتصل تتطمن عليا ..
فتحت ع نشرة الاخبار وكانت مااطمنش بكل .. تلفتت لحنين لقيت دموعها ينزلو بصمت عرفت انها متألمة لان حفلتها المفروض غدوا بس كل شي تأجل لان الضرب جيهتنا وصعب هلبا يستمر الفرح .. شبحتلها بعيون الحسرة وباعدت شويا عن التلفزيون وناديتها .. لحقتني وسكرت وراها الباب
ابتسمت وقلتلها: قعمزي حنين
قعمزت مقابلني وقالتلي: نعم !!
بعيون الألم تكلمت : عارفك مضايقة ع خاطر الفرح تأجل .....
قاطعتني نافية وقالت: لا والله .. ( ماكملتش كلامها وبدت تبكي ) كنت مخططة لهلبا حاجات ..( مسحت دموعها ) بس الحمد لله المهم قاعدين في حوشنا وكلكم بخير والفرح حتى تأجل سيوره يجي
ابتسمت لقناعتها بالواقع بس قلتلها: خليني نكمل كلامي .. انا نقول لو كان قرينا الفاتحة مع شوي أقارب وناس وتوكلتي ع ربي عنده .. شن رايك ؟؟
هزت راسها نافية : لا علاش هكي يصير معاي ؟؟ .. تو نأجله ونديره احلا من هكي .. مامدايرة شي يعيب باش نطلع بالساكت
قرنت حواجبي لكلمتها وعليت صوتي شويا : خيرك انتي !! .. كيف ماجاك الوقت تعالاله انا ندويلك لمصلحتك
شبحتلي وضحكت بهزوة : ورنا ؟؟!
سكتت ماعرفتش نرد عليها .. كملت كلامها : انا نبي عرس كبير واللي خاطري فيه نبي نديره مش نطلع وكأني عايبة ؟؟
فصلت من كلمتها وجيت شديت ايدها بالقوة ودفيتها للباب : والنبي اطلعي درقي وجهك انا الحمار اللي نفكر في مصلحتك .. اطلعي برا
طلعتها وقربعت الباب .. شديت راسي متعصب في وقت اتصال رنا
_ نعم رنا !!
_ حسام عندكم ضي ؟؟
_ عندنا الفقر .. علاش تسألي !!
_ آآه هارب علينا من امس ياحسام وقاللي خوي انهم متمركزين جنبنا
_ ايه قوليله يرد باله
_ خيرك حسام مضايق ؟؟
_ ايه هلبا تعرفي قريب نخبط راسي في الحيط يارنا .. خليني توا
_ مانبيش نخليك لين تحكيلي
شديت التليفون بكتفي وولعت الدخان وقلتلها: وراسك انتي بنتفجر بعدين نكلمك
_ حسام بالله عليك تحكيلي
_ اسمعي رنا تتزوجي ع الساكت عادي !!
_ ايه عادي المهم نكون معاك اليوم قبل غدوا ياحسام والله نراجي في اليوم يللي انوض فيه ع وجهك السمح
ضحكت وقلتلها: تصدقي تحشمت
ضحكت وكانت ضحكتها توجعلي في قلبي اكثر : يسلملي الخجلان انا <3
_ خلاص رنوش خليني نحكي لحازم ونمشو لبوك ونقروها الفاتحة وتم .. تمام !!
_ تمام ياعمري .. رد بالك ع روحك <3
أمي سكرت راسها ع رايها .. تعصبت ع الاخر وبديت نصيح
_ تي يمة انا رااااضي وهيا راااااضية والله مستعد توا نكلمها وتقولك
شبحتلي متعصبة: برا تزوجها وانا مش راضية براااا ياحسام وانت كل يوم مولي احرف من قبله تعيط ومش داير حساب لحد
خبطت ايديا ع الحيط وقلتلها: افهميني يمة تربحي .. انا مانبيش نأجل شي .. ( وأشرت ع حنين ) حتي بنتك المفروض تفهميها وتوعيها مرات التأجيل مش لصالحها
لوحت حنين تليفونها جنبها بتعصب وقالت: انا حررة .. حرة مالك ومالي انت !!
جيت بنضربها شديت روحي في الأخير : لو بتسكري راسك يمة بتخسري ولدك والله
ع خشة حازم يجري وداهش .. وقف بينا وقال : سمعتو !!
شبحتله باستغراب : شن في تاني !!
وقف يلقط في أنفاسه وقال: بدو يقدمو والناس في **** الأول بأول بدي يطلع من حوشه
امي خبطت ع صدرها بالخفيف وشبحتلي : امشي شوف رنا .. طلعو والا شن صار فيها !!
شبحتلها بتعصب وخشيت لداري قربعت الباب .. ونسمع في امي تنبه في حازم يقنعني بالتأجيل وانا مازلت مصّر ع رايي ومانبيش نأجل .. فاتحة ونجيبها لحوشي تقعد جنبي وتم .. عرس ومصاريف وزحمة وحوسة ودوشة باش يقولو آهو تزوجو وتهنو ؟؟ .. ربي يصلح حالك يايمة بس
اطمنت ع رنا وقالت ( بابا مصرّ يقعد ومايبيش يطلع منه .. وانا خايفة والله )
_ خلاص يارنا بوك عارف مصلحتكم .. ربي يفرجها ع البلاد كلها
,,,,,,,,,,,,,,,,,,,,,,,,,,,,,,,,,,,,,,,,,,,,
أمل ::
زعما شن صاير في حسام ؟؟ .. الضرب ليه أيام ومازال ماوقفش في المدينة يللي فيها أهله .. يارب سترك يارب ..
كل مانحاول ننسى الماضي ونتآقلم مع حياتي الجديدة يطلعلي حسام يرجعني سنين التالي .. من يوم اللي شفته وانا ديما سرحانة .. ضعف ع قبل هلبا زعما شن قصده ب ( مخلية مكانك ) .. اكيد يبي يصغرني قدامه باش نعترف بحبه ويزيد يذلني .. مستحيل ياحسام .. نقدر نعيش بدونك هآآ شوف .. نقرا ونتعلم وماشية بحياتي تمام .. شديت راسي من كثر التفكير .. آوووف تعبت .. بس واضح في عيونه الألم .. لالا ياامل انتي تتوهمي .. لو كان يحبك ليش يطلقك وانتي قلتيله ( مانقدرش نعيش بدونك ؟ ) .. قصدا طلقني باش يحب ويتمعشق بنت تانية ويتزوج بحب .. ايه اكيد .. أصلا الرجالة خوانين .. بعد عشرة العمر يللي بينا والمي والملح طلقني بالبارد .. نبهتني صفاء كانت جنبي بايدها
تلفتلها وابتسمت: نعم !!
_ شوفي محلاه الممثل هذا !!
ضحكت وقلتلها: كان يسمعك رضا ههه ( تنهدت وابتسمت ) الناس تموت واحني نتفرجو ع الوهم
صفاء شدت الريموت وسكرت الصوت وقالت : الله غالب .. الحياة لازم تستمر
شبحتلها بحسرة: اللي هلكنا السلبية .. قاعدين نرددو في ( اخطى راسي وقص ) .. بدال مانديرو شي نحلو بيه الازمات
_ يعني وقفت ع كلمتنا ؟؟ .. بالله شوفي المسؤوليين ولا هامهم أصلا .. كأن هالبلاد ارض ياكلو من خيراتها ولما يشبعو يحرقوها بللي فيها
ضحكت بهزوة : ياريت يشبعو .. هما كل ماياكلو يجوعو اكثر
_ يلا ربي يفرجها علينا احسن شي
تنهدت وقلت: ياريت نعرف رقم حسام نطمن عليه
شبحتلي صفاء وقالت: حتي بروفايله ماتعرفيشي ؟؟
شبحتلهاواذكرت ان مار عليا من المقترحين .. قلت: زعما يطلعلي توا !!
وقفت نجري للدار لحقتني وسكرت وراها الباب : شوفي ترا ؟
قلبت كل المقترحين ودوّرت عليه وأخيرا لقيته .. فتحت ع بروفايله كاتب في الحالة ( متزوج ) .. شهقت .. جتني صفاء تسال ( خيرك شن فيه حسام ؟؟ )
قلتلها بحسرة: تزوج حسام
طبطبت ع كتفي وقالت: انتي قلتي تبي تتطمني عليه .. ابعتيله مسج واحظريه بعدين
هزيت راسي بمعنى باه .. فتحت ع الرسائل وبعتله ( حسام حبيت نطمن عليكم بعد التفجيرات يللي صارت ان شا الله بخير انت وعويلتك كلها ؟؟ )
سكرت النت ع طول وكأني خايفة يشوفني حسام نكتبله والا يسمع دقات قلبي تنبض باسمه .. والا يحس بالارتباك في داخلي .. نضت قعمزت مع العيلة وانا كله تفكيري في حسام وشن صاير معاه ؟
( كويسين )
هذا المسج يللي وصلني من حسام بعد يومين .. يعني شن كان صار لو زاد كلمتين تانيات ع هالكلمة ؟؟ .. حسيته مسج ناقص ومايعبر ع شي الا ( خليني في حالي ياأمل بلا تناقض ) .. سكرت النت وقررت قرار صائب في هالوقت اني نبعد بجديات عليه .. الراجل متزوج وبالك حتى مرته شافت المسج وزعلت واضايقت وصارت مشكلة بينهم بسببي ..
في يوم نضنا ع تفجير اقوى من كل التفجيرات يللي صارت .. شابكة صوابعي في بعض بقوة متوترة وخايفة .. وبين حين وحين نشوف لتليفوني بالك نلقى مسج من حسام يعتذر والا يتأسف ع المسج البارد ؟؟ .. في العشية سمعنا خبر كنت من 4 سنين فاتت نراجي فيه ..
( عاجل : أنباء عن مقتل **** ****
#Dudu
