أنا شنو كندير ؟؟ و كيفاش وصلات بيا الجرأة لهاد المرحلة ؟ نعرض عليه نتفرجو ففيلم ! بوحدنا !!! أنا القهوة و كنت كنخاف نجلس معاه فيها .. كنحشم نجلس مقابلة معاه فشي بلاصة و مكنقدرش نشوف فعينيه .. كيخلعني القرب منو و كترعبني المسافة بيناتنا إيلا تقلصات .. و دابا .. بووحدنا فالدار ! و غانتفرجو لفيلم ! أنا كيدرت ليها ؟؟ و لفين باغية نوصل ؟! ماعرفتش ..
خوافة .. و لكن فاش كنزعم كنزعم بالجهد و كندير حوايج كبار .. و باش نكون صرييحة معاكم .. واخا قلبي غايطرطق .. مانادماش .. و ماباغاش نندم .. بغيت ندوز معاه ليلة زوينة .. نتفرجو ففيلم و نهضرو .. بلاما نفكر فمن بعد .. بلاما نخاف .. بغيت نتجرأ و نتحدا راسي .. بغيت نفوت حدود الخوف و الشك و التردد لي ديجا راسمة لنفسي .. ندير غير داكشي لي كنفكر فيه و مشهياه و باغاه .. و من بعد ؟ ماسوقيش فمن بعد .. غير لهاد الليلة .. مانفكرش و نغامر .. غيير لهاد الليلة نتحرر من قوانيني .. و نندم گاع علاش لا ؟ شنو فيها إيلا ندمت شوية ؟ شادي يستاهل نغلط على قبلو .. غير غلطة صغيرة .. فنهاية المطاف راه غير فيلم هادا .. جوج سوايع إيلا طول .. و غادي غير نتفرجو ماشي شي حاجة أخرى ..
شادي: شنو دابا ؟
فيقني من سهوتي لي طولات و هو جالس على الفوتوي مفرق رجليه و مرتاح و فيدو التيليكوموند .. بلعت ريقي و ربعت يدي ..
- شنو ؟
شادي: مابغيتش نتفرجو فالرسوم ..
- قلت ليك إيلا مابغيتيش سير فحالك .. و هادوك راه مااشي رسوم ..
شادي: ( قرن حجبانو شوية و بدا كيتذمر و يعبر بيديه ) هادشي راه ماشي عدل .. من نهار عرفتك فينما نبغيو نتفرجو فشي حاجة نتي لي كتختاري و تديري ليا الكواغط كرهتيني فيهم ..
- حيت نتا لي ديما كتبغي تتفرج معايا .. نتا لي كتطلبها مني يعني ندير لي بغيت ..
شادي: هاا .. دابا نتي لي طلبتيها مني يعني حتى أنا ندير لي بغيت ..
- داري هادي ..
شادي: نيتفلكس ديال مونية ..
- التلفزة خلصت فيها 50٪ و هي غير 25 ..
شادي: ( تنهد ) دابا واش غاتضيعي لينا هاد الجلسة على مونيكات ..؟
- نتا و الله ما عندك الذوق ..
رفع حجبانو بابتسامة جانبية و أنا استدركت الموقف ..
- من غير فالبنات .. و الحوايج ..
ضحك بشوية كيحك عينيه بيدو .. و أنا بديت كنضور هضرتو فراسي .. هو مكيعجبوهش أفلام ديزني .. إيلا درنا واحد هو ماغاديش يركز معاه و إيلا ماركزش غايبقا مركز معايا .. مابغيتش .. و فنفس الوقت إيلا خليتو يختار غايختار فيلم ديال الرعب .. و معلومة عليا بين الأقواس .. إيلا جاتني بيبي فالليل كنصوني لمونية ولا روزا يفيقو يشعلو ليا الضو باش نمشي للطواليت .. إوا تخيلو نتوما مع ريوسكم إكرام كتتفرج ففيلم ديال الرعب مع هاد السيكوباط !! احتمال كبير نفزگ سروالي بالخلعة ..
هاد الفكرة خلات لحمي يبورش و حركت راسي بالنفي بالزربة و أنا كنسوط .. شفت فيه لقيتو كيشوف فيا ..
أنت تقرأ
YOU & I. ( IKRAM & CHADY )
Romanceهي بنت غير اجتماعية .. كتخاف من الناس و العلاقات داكشي علاش حدودية مع كلشي .. عندها غير جوج صحابات عايشة معاهم فقط و من غيرهم والو .. كتعجبها الشتا .. اللون الكحل .. الوحدة .. الموسيقى .. الكيدراما .. الكتوبة .. الماكلة البنينة .. و الحوايج الواسعين...
