YOU & I. ( IKRAM & CHADY )

الحلقة 8 : Gone .. 💔

الغد ليه الصباح طلعات عندي مونية للبيت كتفيقني .. كنت فايقة .. أصلا ماناعساش الليل كامل غير ماكنتش باغية نوض ولا نخرج من بيتي .. و لكن فاش قالت ليا نهبط عند با العربي كيسول فيا نضت بزز مني .. ماموالفش يعيط ليا و ملي دارها غاتكون شي حاجة مهمة .. ملي هبطت عندو مد ليا بواطة قال ليا خلاها ليا شادي .. كانت تيليفون جديد حسن من هاداك لي كان عندي ..
شنو هادشي ؟
اعتذار على شنو دار و إشارة على أننا مزال ماساليناش ؟ هدية وداع ؟ تعويض ؟ و أنا باش خاصني نعوضو على داكشي لي درت فيه ؟ شنو الهدية لي تليق بوداعي العظيم لي جرحو بطريقة يمكن ماعمرو تجرح بيها ؟

••••

من بعد هاديك الليلة لي " تفارقنا " فيها مابقيتش كنحيد من البالكون .. تيليفوني فيدي و كنتسنا .. كنتسناه يصوني .. يسيفط ميساج .. يبان ..

مايمكنش يمشي بهاديك الطريقة بلاما يعاود يرجع .. عقلي ما استوعبش بلي داكشي كااامل لي كان بيناتنا يسالي بهاديك السهولة ! شادي يمشي بهاديك البساطة ؟ ياك كيبغيني ؟!!

" كيفما قدرتي تقولي ليه داكشي كامل و نتي كتبغيه حتى هو يقدر يبعد واخا كيبغيك .. "

هاد الصوت لي كيهضر فراسي كرهتو حتى هو .. صوت منطقي صريح كيڨتل الأمل ديالي فأن شادي يرجع ..

" و إيلا رجع ؟ "

غانعاود نقول ليه يمشي فحالو و يبعد مني ..

" مريضة .."

و لكن كنبغيه .. حب مريض كثر مني و ماشي منطقي ..
ماشي هادشي فاش كنفكر .. و ماشي هادشي علاش كنتسناه يرجع .. أنا غير جاتني صعيبة نتقبل أنه كان عندي الحق ملي شكيت فيه .. أنه كان كيكدب عليا ملي قال ليا كنبغيك ..

" و إيلا رجع غايتبت ليك بلي كايبغيك ؟ غاتيقي فيه و ترجعي معاه ؟ غاتتخلاي على هوسك المريض بالفراق و الألم و تغامري ؟ "

لا ....
___

سيمانة دازت .. سبع أيام طويلة و ليالي أطول .. الغريب فالأمر هو أنني بكيت مرة وحدة فالشارع لتحت فاش مشا .. من بعد مابقيتش بكيت .. كنت كنتصرف عادي بحالا بصح ماواقع والو .. يمكن الصدمة هي لي لاعبة عليا و مبنجة ليا المشاعر و مكتخلينيش نفكر مزيان ولا نتيق آش وقع ..
هاد السيمانة كللللها .. واخا ماعاودش هضر معايا ولا سول .. قلبي و عقلي و كلشي فيا كيقول بلي مزال ماساليناش .. أيام بلا شادي ! بلا صوتو و ضحكتو و فكرة أنه ديالي ..!! كيفاش نقدر نستوعب هادشي ؟ و كيفاش نستوعب أنني أنا السبب الأول و الوحيد !؟
لا .. حنا مزال ماساليناش .. هادشي فاش كنت كنفكر .. هادشي لي كان جزء مني كيتمنى ..

كانت الوحدة ديال الليل ملي الحياة أكدات ليا هادشي بآبيل .. حيدت البيسي من فوق رجلي بالزربة حطيتو حدايا و حيدت الليزيات من ودني مخلية الدراما خدامة بوحدها .. هزيت تيليفوني و شفت نمرتو على الشاشة .. شادي !!
ملي هرس ليا التيليفون أنا رجعت الكارطة ديالي و خدمتها فهادا .. و لكن مسحت نمرتو منها باش مانضعافش و نصوني عليه شي نهار .. داكشي علاش كتطلع ليا غير النمرة بلا سمية .. و لكن هو .. أنا عارفاه هو .. حتى واحد ما غادي يصوني عليا فهاد الوقت من غيرو ..