جامعة القاضي عياض .. مدرج الإمام مالك .. أكبر مدرج فشمال افريقيا .. الاستاذ بالشوميز البيضة ديالو جالس كيشرح الدرس و وراه الداتاشو شاعل .. كنشوف غير شفايفو كيتحركو و فودني إكسو كيغنيو " Growl " ... جالسة اللور كيف عادتي كنشوف قدامي فأكبر تجمع بشري سبق و شفتو فحياتي كلها .. هوما متبعين مع الدرس و أنا كنفكر فيهم .. فحياتهم .. عارفة بلي كل واحد فيهم عندو حياة خاصة .. مشاعر خاصة .. ذكريات خاصة .. و ماكرهتش نعرفهم كاملين .. نشوف كمية الترابط لي بيني و بينهم .. بغيت نعرف أسرارهم .. واش كلهم بصح منتبهين للدرس ولا كاين شي واحد بحالي .. شي واحد ضايع و موضر فهاد المدرج .. شي واحد دخيل جا غير باش يرضي الضمير ديالو و ما عندوش ذرة اهتمام بهاد الدرس و هاداك البروف و هاد الشعبة بصفة عامة ...
درت الستيلو ففمي كنعضو و رجعت كنشوف فالبروف .. كنحس براسي معصبة من راسي .. فين غادية بهادشي لي كندير ؟ إيمتا غانفيق و نصلح حياتي ؟؟؟
فجأة .. شعر رقبتي وقف واحد اللحظة .. حسيت بحالا شي واحد كيشوف فيا .. مراقبني .. شفت للجنب و هو ابتسم ببلاهة و غباء ..
الشاب لي ملي جيت جلست كان هو ناعس و راسو مغطي بقب الهودي الكحلة لي لابس .. فاق ..
مارديتش ليه الإبتسامة خنزرت فيه .. رجعت كنشوف قدامي .. " باسل " .. هادشي فاش فكرت ..
باقي كيشوف فيا راني حاسة بيه .. زعجني .. هزيت الصاكادو ديالي و دفتري و نضت خرجت فحالي ..
••••
خرجت مع مونية واحد العشية .. صاحبتي لي كارية معايا .. مشينا لجامع الفنا و دوزنا عشية زااااااهية بجوج .. ضحكنا مع الحلقة و لعبنا و شرينا شي حوايج .. و قبلما نمشيو دخلنا لواحد السناك تماك و جلسنا نتعشاو .. كنهضرو غارقين فأحاديثنا لي مكتساليش و كنضحكو .. حتى كيبان ليا !!
جالس مع جوج صحابو فواحد الطابلة قريبة لينا .. بقبية أخرى رمادية .. تاني كيشوف فيا و مبتسم .. و هاد المرة شير ليا بيدو بحالا كنعرفو بعضياتنا !! درت براسي ماشفتوش و رجعت كنهضر مع صاحبتي .. سالينا و خرجنا من تماك بلاما نعاود نشوف جهتو ..
باسل بزاف !!
••••
مسمنة ملوية فكاغط .. كنعض منها و أنا داخلة للافاك و الكيت فودني .. ماعمرني تسوقت لشنو غايقولو الناس إيلا شافوني كناكل برا .. يقو دو .. فيا الجوع غاناكل .. فينما كان و كيفما كان و وقتما كان .. و ماعمرني فهمت علاش الناس كيبغيو يتدخلو فحياة الناس لاخرين بهاد الوقاحة كلها .. يعني .. شنو غايضرك نتا فوحدة كتاكل مسمنة فالعلن ؟ شنو؟!
كان طالع ليا الدم .. بلا سبب .. أصلا غير كندخل للافاك كنتعصب .. ماشية حتى حسيت بشي واحد شد فالصاكادو ديالي .. ضرت نشوف حيت دايرة مع صاحبتي يحساب لي هي .. حتى لقيتو هو تاني !! نفس هاداك الولد .. هزيت حجباني مصدومة من هاد الوقاحة ديالو !! كيفاش يقيسني و هو مكيعرفنيش ؟!! بقيت كنشوف فيه و هو مبتسم كيف المرات بجوج لي سبقو .. أشار ليا للكيت باش نحيدهم و نسمعو ملي يهضر .. و لكن أنا تنهدت و ضرت مكملة طريقي بحالا ماشفتوش ...
باسل بلاااا قياس !!!
••••
أنت تقرأ
YOU & I. ( IKRAM & CHADY )
Roman d'amourهي بنت غير اجتماعية .. كتخاف من الناس و العلاقات داكشي علاش حدودية مع كلشي .. عندها غير جوج صحابات عايشة معاهم فقط و من غيرهم والو .. كتعجبها الشتا .. اللون الكحل .. الوحدة .. الموسيقى .. الكيدراما .. الكتوبة .. الماكلة البنينة .. و الحوايج الواسعين...
