YOU & I. ( IKRAM & CHADY )

الحلقة 9 و الأخيرة : والـو - Nothing..🧡

- بعد سنتين -

تبدلت ..
حياتي المخربقة تنظمات و وليت عارفة شنو كندير .. وليت كننعس بكري و كنفيق بكري .. مابقيتش كناكل السقاطة و ماكلة الزنقة .. غلاضيت .. وليت كنعرف نطيب و كندير ميكاب و نلبس كسيوات و الطالون .. وليت شعبية .. كنعرف بزاف ديال الناس و عندي بزاف ديال الصحاب .. كنخرج بزاااف و كنسافر .. الويكاند كنسهر فليبواط و درت بزاف ديال الكليكات .. مابقيتش كنخاف من العلاقات و وليت متفتحة للحب و التصاحيب .. كنغامر و ... أنا .....
كنكدب ..

مزال إكرام هي إكرام .. هاديك المغولة المعقدة لي خليتوها هادي عاماين و لي حياتها مخربقة كثر من هرموناتها .. و باش مانكدبش عليكم .. زدت تعقدت كثر و زدت تغولت ..
عندي غير مونية و روزا لي مزال ساكنة معاهم .. من غيرهم والو .. مزال مضورة بيا هاداك السد العالي لي مكيخلي حتى واحد يقرب ليا .. مزال عندي فوبيا من العلاقات و من الناس و المستقبل .. و مزال مكنتيق فحتى واحد .. هادوك التغييرات الجذرية لي كيوقعو فالناس فجأة كيكونو غير فالأفلام الأمريكية المبتذلة .. ملي البطلة النيرد القراية الحشوووومية لي كلشي قامعها كتحيد النضاضر من عينيها و تطلق شعرها و تلبس جيب قصيرة و تولي هي أكثر بنت سيكسي فالثانوية و كلشي كيكراشي عليها ..
هادشي ماكاينش فالواقع .. مايمكنش تتبدل بهاد البساطة .. خصوصا إيلا كنتي بحالي .. بنت جبانة كتخاف حتى من التغيير ..

حاليا حياتي مزيانة .. تقدرو تقولو مستقرة .. مابقيتش كنقرا القانون لي كنكره و بدلت الشعبة للأدب الإنجليزي لي من ديما كان كيغريني .. بديت الخدمة فواحد المحل كبير ديال الحوايج مع روزا .. باش نبدا نعتمد على راسي و ماشي غير على بابا .. و بديت حاجة أخرى .. الكتابة .. هادا سر حتى واحد ما عارفو .. و لكن راه وليت كنكتب .. لقيت بلي هي الدوا لي كنت محتاجة .. بما أنني مكنقدرش نهضر و نعبر على شنو عندي لداخل قررت نكتبو .. نخلق شخصيات و نصنع ليهم أحداث .. نديرهم طريق نخرج بيه مشاعري و أفكاري لي مكنقدرش نخرجهم عن طريق الهضرة .. رتاحيت .. نسبيا ..

غايكونو عندكم دابا بزاف ديال الأسئلة .. و لكن أهم واحد هو " واش مزال كتفكري فيه ؟"

ماشي بزاااف ..
يعنيييي .....

كنفكر فيه غير فاش كتصب الشتا .. فاش كنشوف شي وحدين كيلعبو الباسكيط .. فاش كنمشي لمرجان نتقدا .. فاش كنشم ريحة الگارو ولا القهوة .. فاش كنلبس حوايج واسعين .. فاش كنتفرج فشي فيلم .. فاش كناكل كسكسو ولا بيتزا .. فاش كنسمع للموسيقى .. فالليل فاش كنشوف النجوم .. فاش كنشرب العصير ولا السموذي ولا أتاي .. فاش كنتلاقا ببا العربي فباب العمارة .. فاش كنتفرج فماتش ديال الكورة .. فاش كنمشي لجامع الفنا .. فاش كناكل الكيك لي كتصايب روزا .. فاش كتطيح رمشة تحت عيني ولا تحت عين شي واحد .. فاش كناكل الشوكولا .. فاش كنخرج للبالكون .. فاش كنقرا شي كتاب .. فاش كنكتب .. فاش كنشوف اللون الكحل .. فاش كنتفرج فشي كيدراما .. فاش كيصوني تيليفوني ولا يوصلني شي ميساج .. فاش كنشوف شي رسم .. فاش كنركب فالطوموبيل .. فاش كنكون فرحانة ولا معصبة ولا مقلقة ولا حزينة ولا مستريسية .. فاش كنشم ريحتو لي مزال فكل قنت فبيتي .. فاش كنلبس شي حاجة من حوايجو .. فاش كنشوف شي راجل .. فاش كنعس و نحلم بيه .. و فاش كنحس بقلبي كيضرب ..
يعني .. مكنفكرش فيه بزاف ..
غييير .. ديما ..