العناق الأخير

البارت السادس

لايوجد في الحياة عقاب

من أن تحب شخصاً،

ليس من حقك!

ليار:

مرات تنتظرون أتصال من شخص تحبو وتعزو ومن يتصل تفرحون كُلش وتكولون ورة ماسمعت صوته ماكو شي يخليني حزينه بعد!

وهذا الصار وياي بس الفرق جان أكو شي ينغص علية فرحتي وهو لؤي!
.
.
.

فتحت عيوني وباوعت للسكف ثواني أفكر زفرت الهوى ونكلبت ع الجهه الثانية صارت كبالي صوري أني ورنا ملزوكه ع الحايط..
رنا بت خالتي أعز من روحي صديقة طفولتي وأختي والدها يشتغل كاسب فكل مرة بمكان شكل عاشو بمنطقتنه فترة طويلة جانت احلا سنين حياتي وكبرنه سوة الى ان أنتقلو لغير محافظه بس بقينه ع تواصل رغم مشاغل الحياة هي تخرجت قبلي وحضرت حفلة تخرجها جانت فرحانه لان راح تسافر خارج العراق بسبب شغل ابوها وكالو سنه ويرجعون

لؤي بيومها أعترف يحبها بس مو ألها لا أعترف ألي ولماما وكال بس ترجع نروح نخطبها فرحت بهالشي لان حتعيش وياي وحتى تصير الشغلة رسمية مقبل لؤي يحجي وياهه كال من ترجع..وماحجيتلها ردت هو يعترفلها حتى تصير ذكرى حلوة بيناتهم بس الظاهر القدر مناوي يجمعهم..

گمت رتبت الفراش ونزلت جوة شفت ماما وبابا بالحديقة يشربون جاي ومبين ع أمي الضوجه
غمضت عيوني بتعب شلون الواحد يفرح ويحزن بنفس الوقت؟

بداخلي مشاعر غربية عجيبة فرحانه لان رنا راح ترجع وأبوها متفق وي بابا يشوفلة بيت ببغداد لان راح يستقرون هنا ورة ماتحسن شغل ابوها فتح مشروع هنا

يعني راح نتشاوف دائما وراح تحضر حفلة تخرجي راح تجهزلي ملابسي مثل ما جهزتلها وراح نرجع لسهراتته گبل وتحشيشنه

هالأفكار تخليني سعيدة بس

من أتذكر كالت هي مخطوبة وراح تتزوج عن قريب!

ينجعص گلبي مثل قوطية المعجون.

من سابع سماء أنركع بقوة بالكاع لأن افكر شيصير بلؤي من يعرف؟

شراح يكوله گلبة؟ شراح يحس؟

زين هي تتوقع مني أفرحلها من كل گلبي وأكيد نطلع نشتري ملابس سوة وراح تسولفلي شلون تعرفو وشلون حبته تنتظر مني أبتسامه جبيرة عريضة زين أني شلون أسويهن وأدري بأخوية راح يتأذى ؟

صحيت من تفكيري ع طبكة الباب جانت سمارة تدخل للمطبخ باوعتلي بأستفهام لان واكفه جني صنم بس تجاهلتها وطلعت للحديقة بس شافني أبوية صاح

: هلا هلا ومية هلا بعزيزة گلبي

أبتسمت ورحت دخلت بحضنه هلا بابا شلونك

: صرت زين بشوفتج

بلسم: أي أي بس شفتها بعتنه

ضحكنه ع غيرة أمي