(والقلب له رائي آخر ) ❤️ جاري تصحيح الأخطاء 🫰

الفصل السابع(ذكريات تؤلمني)

#والقلب_له_رائي_آخر ❤️

#البارت_السابع 💜

#اقتباس ✍️

لَم يَبقَ شَىءٌ سِوَى صَمتٍ يُسَامِرُنَا
وَطَيفِ ذِكرَى يَزُورُ القَلبَ أَحيَانَا

قََدَّمتُ عُمرِى لِلأَحلامِ قُربَانَا
لا خُنتُ عَهدًا.. وَلا خَادَعتُ إِنسَانَا

شَاخَ الزَّمَانُ.. وَأَحلامِى تُضَلِّلُنِى
وَسَارِقُ الحُلْمِ كَم بِالوَهَمِ أَغوَانَا

• فاروق جويدة. ❤️
___________________________________

وتنفست "ياسمين "بعمق وبدأت تسترجع ذكرياتها منذ البداية واخذت هي الاخري تقص عليه كل ما مر عليها من الألم ....

وقالت له ،،

"ماما وبابا  اتجوزا بعض بعد قصة حب جميلة جدًا، وخلفوا أخوي ياسر، وبعدها بأربع سنين اتجوز عمي حسين من خالتي سعاد، واتولدنا أنا وسلمى، مفيش بينا شهور بسيطة جدًا، وأنا الأكبَر منها. كنا عايشين في الدور التاني في البيت ده، وعمي في الدور اللي فوقينا زي ما هما دلوقتي. كانت أجمل سنين حياتنا، حياة هادئة وجميلة وكلها حب وسعادة. كنت بعتبر سلمى أختي مش بنت خالتي أو بنت عمي، وكان الشيء الوحيد اللي ممكن يعكر اليوم هو مشاكل ياسر، أخويا، مع أصحابه في الشارع أو المدرسة. بابا كان بيتعب من مشاكله وكان بيقول عليه عيل شيطان معجون بمايه عفاريت بسبب المشاكل اللي مش بتخلص أبدًا.

بابا حبسه في البيت في الإجازة ومكنش بيخليه ينزل يلعب مع العيال في الشارع. فكان ياسر شاف أي أكتر حاجة ممكن تخلي بابا ينزله تاني الشارع هي إنه يضربني ويغلس عليا أنا عشان مش قدامه غيري يفرغ فيه طاقة الغل اللي جواه. وفعلًا، بابا خاف عليا لما كان بيرجع من الشغل ويلاقيني بعيط من ضرب ياسر ليّا أو تكسير لعبة بحبها. بابا فهم ده بس مش راضي يسيب لأخويا فرصة ينتصر عليه بسببي. نزلني النادي واشترك لي في لعبة الكاراتيه وقال ليا لازم أتعلم أدافع عن نفسي من ياسر وأي حد يضايقني أو يمد إيده عليا. وفعلًا، مع الوقت والتمارين قدرت إني أستفيد وأتفادى ضرب ياسر، وكمان كسرت ليه مرة دراعه. ورجع بابا من الشغل وكان فرحان بيا وبيشجعني، وكان بيجيب ليا ألعاب وحاجات بحبها لما يعرف أني مش خفت من أخويا ومعرفش يلمسني.

وياسر مع الوقت خاف مني وبقى شايف أن عيب في حقه كولد أن بنت تضربه ويخاف منها، وبدأ مع الوقت يتجنبني، لكن كان كل فترة يكسر لي لعبة أو يخبي حاجة بتاعتي ويعمل نفسه بريء ومالوش دعوة باللي حصل. بابا حقيقي هو وماما حاولوا كتير يسيطروا على عنف ياسر الغير مفهوم أو المبرر غير أن جسمه ضخم ومساعده على ضرب أي حد غيره ويفتري عليه.