كيف اكتب الشعر وعيونك قصيد

بارت 14

في بيت ابو محمد اللي جمع البيت كله وهو اللي خلاص قرر يعترف لهم بالحقيقه وهو اللي زاد خوفه من جبل خايف ان الهنوف اعرف من احد ثاني غيره " وعند الجده وام محمد اللي كانو يعرفو بعد ماخبرهم عشان يكون سهل عليه يوم يخير الهنوف
دخل فهود وهو يلطف الجو : خير اللهم اجعله خير يبوي ليكون ناوي تسجل الارض باسمي قول يالغالي
الهنوف : خير خير شف من تكلم
محمد : الحينه انتم بتسكتون ولا اقوم اجلدكم
ابو محمد اللي جلس وهو خايف يشوف الضحكه تختفي من ملامح بنته يوم تعرف الحقيقه كان خايف ولا وده يفتح الموضوع
ام محمد وهم تشد على يده وتهمس له : تكلم يبو محمد تكلم
ابو محمد اللي ماعرف من وين يفتح الموضوع وكيف وده يفاتحهم تكلم وهو يشد على نفسه: المهم ياعيال انا ماجمعتكم اليوم الا عشان اقولكم سالفه قديمه ولازم تعرفوها
محمد اللي خاف : تكلم يبوي حنا نسمعك
ابو محمد وهو يوجه نظره الهنوف : انتو تعرفو ان كان لي اخ وحيد والله ماكتب انه يكمل حياته وتوفى بس اللي ماتعرفونه ان اخوي كان متزوج وحنا كلنا ماندري
فهد : وش تقول متزوج ليكون طلع له عيال وحنى ماندري
محمد اللي كان يعرف ان الهنوف ماهيب اخته بس ماطرى بباله انها تكون بنت عمه : يبه فهمنا وكمل السالفه
الهنوف اللي ماكانت فاهمه شي بس حست ان في سالفه من نظرات ابوها
ابو محمد اللي رجع يكمل كلامه : لا لا يبوك ، عمك عامر طلع متزوج ويوم ولدت زوجته ماتت  واخوي اللي كان جاي ومعه الطفل وهو اللي كان ضايع بعد موت زوجته بس ربي ماكتب له الحياه وسوى حادث وتوفى والطفل اللي معه عطانيه امانه
فهد اللي فز من مكانه : وش تقول يبه!!طفل؟ ومتزوج !! يبه فهمني!؟
ابو محمد : يبوك افهم العلم !الطفل معنا!؟
العيال بشهقه : معنا !؟؟؟
الهنوف اللي تجمدت مكانها : يبه الطفل اللي كان معه بنت ولا ولد
ابو محمد اللي فز من مكانه وهو يمسك يد الهنوف : بنت !! بنت !! يبوك !! يشهد الله انك بنتي يالهنوف يكفى انك تحملي دم اخوي الوحيد عامر لاتضني ان الحقيقه بتغير شي تبقين بنتي
عند فهد اللي تجمد مكانه من الصدمه والجده كانت ماسكه ام محمد اللي انهارت بالبكاء وعند الهنوف اللي تجمدت مكانها من هول الصدمه من اللي جالسه تسمعه: يبه انت سامع وش تقول يبه !!! اصحى تكفى يبه !! " كانت تبكي والدموع بعيونها "يعني انا ماني بنتكم
ابو محمد الي حضنها : لا بلاه انك بنتي وكل حياتي
ام محمد وهي تحضنها : لاتقولي كذا يمك والله انك بنتي صحيح اني ماحملت فيك بس يشهد الله انك قطعه مني وربيتك على انك بنتي
الجده : يمك انتي حفيدتي وبنت ولدي عامر وابو محمد انتي بنتهم الاثنين ربي ماكتب لبوك وامك انهم يشوفوك ويعيشون معك بس ربي عوضك بخوان وام واب
الهنوف وهي تبكي : يعني طول الفتره ذي كله يبه ليه ماعلمتني الحقيقه ليه خبيت عني الوقت ذا كله تكفى فهمني ليه!؟؟ ليتك علمتني وانا صغيره ولا علمتني الحينه احس الحمل كبير علي
ابو محمد: سامحيني يبوك خفت عليك وانتي صغيره خفت
فهد وهو يحضن الهنوف : اسمعي يالهنوف انتي اختي سامعه !! اختي ان طال الزمن ولا قصر انتبهي تحسي بيوم من الايام غير ذا الشي سامعه
محمد : انتي اختنا يالهنوف تاكدي الحقيقه ماراح تغير شي " الهنوف اللي كانت منهاره وهي تبكي ماقدرت حتى تتكلم وهي اللي طول عمرها عاشت معهم على انها بنتهم واختهم وماتوقعت يجي يوم تكون فيه يتيمه "
ابو محمد : يبوك والله ان ماكان ودي اعلمك بالحقيقه بس خفت تعرفين من احد وبعدين يبوك انتي منتي غريبه انتي بنت اخوي وعضيدي
الهنوف وهي تمسح دموعها : كيف ماتت امي؟! وش اسمها ؟! تشبهني ولا لا!؟ طيب ابوي يشبهني !؟ ملامحي اكثر من تشبه " كانت تتكلم وهي تتلعثم بالكلام "
ابو محمد وهو حابس الدمعه :وش اقولك يبوك اذا حنا ماشفنا امك ولا نعرفها بس ضنتي انك تشبهين امك !! بس ماخذه فصاحه ابوك وعناده
البتول وهي تبكي : يعني حتى امي ماتعرفني ولا شافتني ولا حتى سمتني ولا اعرف حتى اذا انا اشبها ولا لا " جلست شوي وهي تمسح الدموع وبعدها نطقت " طيب ابوي عندكم صوره له!؟
الجده : ايه يمك عندنا عندنا له " فز ابو محمد وهو يطلع يجيب صوره اخوه عامر عشان الهنوف اخذت الهنوف الصوره وهي تدقق فيها وتبكي " معقوله ما في شبه من ابوي
الجده : صحيح يمك انك ماتشبهين ابوك بس انتي اللي اخذتي كل صفاته مشيته طريقة كلامه حنيته عناده اصراره كل ذي خذيتيها من ابوك يمك
الهنوف :اذا تسمحو لي ابي اكون لحالي  " طلعت الهنوف غرفتها وهي تاخذ صورت ابوها ماكان ودها انها تشوف احد لين تهدا وتستوعب اللي صار دخلت غرفتها وهي تجلس على سريرها وهي تتامل صورت ابوها وتبكي بحرقه "
ابو محمد اللي كان منهار بالمجلس وعياله حوله يهدونه والجده كانت حزينه على حفيدتها وام محمد تبكي وهي خايفه ان الهنوف معاد تعتبرها امها كان شعورهم بدا اللحظه متخربط وعدت الليل طويل عليهم
في بيت ابو سعود
كانت ام سعود عند باب غرفة ولدها وهي تدق الباب : يمك افتح الباب سلطان يحتريك تحت انزل له!! يمه افتح الباب تكفى ياوليدي لاتخليه يشكون بشي !! ياسعود تسمعني يمه
سعود اللي كان منهك وهو اللي طول الليل مانام ولا رف له جفن : يمه قولي له تعبان " وقبل لايكمل كلامه طلع سلطان وهو يشوف عمته عند باب غرفة سعود " هذا للحين راقد ياعمه!! وخري بس اكسر الباب على راسه
ام سعود : خله يمه هو من امس مارقد كان تعبان
سلطان: افا بس ولا علمتيني كان خذيناه المستشفى!! طيب ودامه مريض ليه يقفل على نفسه الباب " رجع يدق الباب " ياولد !! افتح الباب ماخبرتك ضعيف للمرض ! انت والله علاجك البر قم قم بس قم
عند سعود اللي قام يفتح الباب وهو واضح عليه التعب والحزن : ادخل ادخل صجيتني
سلطان اللي انصدم من شكله : اف اف شكلك كنت تعبان بالحيل قم قم بس خلينا نوديك المستشفى نشوف وش علتك
سعود : مافيني شي !! انت وش بغيت الحينه
سلطان : يغيتك ياولد ماتحس كل الفتره ذي وماتشتاق ياعديم الاحساس
سعود وهو يضحك : صرت عديم الإحساس مره وحده
سلطان : الحينه مامعي وقت قم البس بنروح العزبه ومنها تغير جو شوي شايف وجهك كيف شكله
ام سعود : ايه تكفى ياوليدي اطلع معه وغير جو
سعود وهو يبوس راس امه : ان شاء الله يادنيتي
طلع سلطان وسعود وطول الطريق سلطان كان يسولف ويعلمه اخر الاخبار بس سعود ولا هو معه كان فاتح الشباك وهو ياخذ نفس وهو اللي صار يحس نفسه ضاق وماهي الا دقايق ويوصلون العزبه نزل سلطان هو وسعود وبعدها راحو يجلسون عند الابل وقام سلطان يحلب الناقه ويعطي سعود من حليبه وبعدها جلسو بدت سوالفهم
سلطان : ياولد وش علمك فيك شي
سعود : لا مافيني انت علمني وش جديدك واضح ان وراك علم
"سلطان اللي معاد قدر يخفي اكثر على سعود وبدا يسرد له كل شي عن سالفته وانه يحب ويبي الهنوف بس ابوه عيا وخايف تروح البنت منه " وهذا كل اللي صار والله اني خايف البنت تروح من يدي وابوي الله يهديه ماعلمني وش سبب الرفض واخر مره رحت له قال بشوف ولين الحينه مارد علي وخايف تكون الهنوف فاهمه اني العب عليها والله ياخوي ضاقت الدينا علي
سعود اللي كان مصدوم : كل ذا صار ولا علمتني من البدايه
سلطان : لاتلومني كنت اضن اني بخفي حبي وابوي بيخطبها بس!!!
سعود : اسمع تبي شوري لاتترك ابوك واذا شفت الا وانه عيا عيا حطه قدام الامر الواقع واخطبها بنفسك لاتروح البنت منك والله ان تندم طول عمرك
سلطان: هذا اللي بسويه انا مستحيل اني اخليها تروح لغيري ان قالها الله بشوف عمي ابومحمد وباخذ منه الموافقه وبعدها باخذ ابوي واخواني واحطهم في الامر الواقع
سعود : الله يقدم اللي فيه الخير بس انت لاتترك الموضوع
سلطان : مستحيل اني اتركه ، انت الحينه اشرب حليبك