قصص وعبارات قديمه

خرافات

مسيكم بالخير والراحة اليوم جيتكم بخرافة( الكريه المشومة) غير عن الخرافات الاخرات بقلم #رورو رايكم يهمني اكيد لايك وتعليق ولميحبش الرعب ميقرررراش 🚫🚫🚫
...............
بسم الله بدينا وعلي النبي صلينا هذا ياسيدى بن سيد وسيدي ربي .. كان زمان في بداية الستينيات كان فيه ثلاثه  شباب احمد_وعامر_وحسين صحاب وجيران  من نفس المنطقة  تبعد مسافات طويلة ع طرابلس خشو للجامعة زويز نفس الكلية وواحد كليه تانية جو لطرابلس يدورو في شقيقة صغيرونه ولا حويش كري ع قد حالهم بحكم انهم طلاب وعلي قد حويلهم والفليسات يادوب قريتهم ومصروفهم دلهم قريب احمد ع واحد يعرفه صديق للعويلة ع سمسار ودلالا حياش مشولة وحكو معه وع ظرفهم  قاللهم هو  عندي حويش عربي يمشي مع طلبكم وفليساتكم غير مستخطي وبعيد شوي طبعا  فرحوا و قالوله كويس عادي خلى نمشوله طول ونشوفوه وشن ناقصه بالمره قاللهم هابنقوللكم من توا رهو مهجور وليه سنين محد سكنه لان صاحبه مسافر وهو وارثة من قريب من بعيد ليه معنداش صغار ولا ورثه يورتوه الا هو  يبي يبيعها ولا يكريه غير يبي تنظيفه وشوية صيانه وزواق مشو وركبوا سيارة الدلالا ووصلوا للحويش مستخطى ومهجور وقديم التراب عرم وكداس وغبرة ماليه المكان وصنة العفن والرطوبة تخنق والزواق باهت واصفر طايح متفترش والحيوط متهسسات قالو مش مشكله احنا مابنشروه اهو مكان نحطو راسنا فيه فترة وتمشي ....
المهم اتفقوا مع بعضهم ومع السمسار بمبلغ بسيط بحكم الحوش بالهون ومش نظيف ويبي هلبا حاجات لكن ينارى الحاجة والظرف  يحكم مرات....
خشو وبدوا فيها هذا كنيس وتخميل و تسييق الحوش والايدا ولمان الكنايس والرملة وورق وعرف الشيجر الطايح واليابس وهما ينظفوا لقو دار مسكرة ماهو الحوش ثلاته ديار وحمام ومطبخ جنب بعضهم ووسط حوش ولايدا قالو خلى نخشو نشوفو شن فيها السمسار مقالش فيه دار بتقعد مسكرة واهو المفتاح مرشوق فالباب بالك نلقوا امعينات وطواسي وتباسي ناكلو فيهم فتحوها خشو يفركسو فيها دولاب وشناطى لقو حوايج وصور وكتاب في الدولاب في صورة بكاترو فيه راجل طول بعرض بزبونه وجرد متكم وطاقيته معنقرة وشنبات طالع شخصية من تقعميزته ومعه مرأة واقفه جنبه زي فلقت القمر العيون فناجين زي الريم والقصه حفاري والشعر حرير زي الليل لابسة حولى حرير و التخليلة مرشوقه عليها وخناق المجارات وحديدت اللميرة معهم زويز بنيات صغيرات لابسات قفطينات حرير طوال تقولى فروخ طليان قالو لبعضهم شكلهم لمالى الحوش حطو الصورة وشدو الكتاب معبي غبرة ورطوبة لين ورقاته يابسات  وبدو يتصفحوا في الاول مفهمو شيء خط رقيق وداكن والورق اصفررر فيه طلاسم وحروف وارقام بعدين زادو قلبو فيه ورسومات بالقلم غريبة وتخوف  واحد منهم زابط وفاهم وهو حسين قاللهم لوحوه بعيد من علينا وردوه فكونا منه  قالوله علاش قال شن ليش هذا ياودي كتاب سحر يتكلم ع تحضير القرين والجان والسحر الاسود فكونه منه اعوذ بالله من الشيطان الرجيم سلام من قول ربي الرحيم  حس بروحه زي المخنوق ورعش بلى فيه وحس بحاجة ركبت معه لين شعر جسمه وقف ردوه لمكانه وطلعو وسكرو الدار وبعد ماكملو وشطبوا وقعمزو يتعشو وكل واحد هايم بافكاره الضيء قعد يرمش وبعدين وله عادي قال أحمد هذا الضيء يبي صيانه الحوش طايب والخيوط اكيد ذايبات و خشو كل واحد لدويرته ماهو الحوش قاعد بااثات قديم وزمني فرشو غطاهم لخدوه ورقدو من التعب متهساسين و في نص الليل....... حسين ناض سمع صوت حد يضبح وينادي عليه وحس بحاجه سخونه قربت منه وكانه حد مطبس عليه فتح عيونه وفلتهم و شعيهم فوقه شاف زوز روس صغار بنات يضحو ويشبحوله زي لي في الصورة واقفين فوق رأسه كأنهم حقيقه ركبت فيه الرعشة وغمض عيونه سمع بكي مرأة وقعد يقرأ في القرآن ويتعود من الشطان شوية وهدى فتح عيونه وشعيهم تلفت مافي حد غطه راسه قعد مشوار يقرأن في القرآن ويتعود من الشطان  لن خداه النوم الصبح ناضوا وفطرو وطلعوا مع بعضهم ...ومع قريب المغرب روحوا مع بعض ماهو سيارة وحدة كروها ووين حطهم التاكسي وهما مروحين بين السوانى والحوايز قربوا من الحوش يشبحو في راجل بجردة واقف جنب طابية الهندي بطرق الحوش ووجها ميبانش قعد واقف لا حركة ولا امارة تقول صنم وين قربوا الراجل تلفت وخش لي لايدت الحوش استغربوا قالو بالك حد من الجيران اشبح شن يبي ووين خشو للحوش شافو ودارو ع الحوش مفيش حاجة هدوووء تام استغربوا وخشو للحويش وبالهم يرفع ويجيب و كل واحد منهم خش لمكان لي خش للحمام حشاكم ولخش للمطبخ يوتى شن ياكلوا ..احمد خش لداره لقي الدولاب منكوت في خاطره قال شكلى قلبته وانا مستعجل وهو يلم في حويجاته سمع صوت ضحكات يسحبه صحابه يبصرو مع بعض غير حويجه وطلع  وصاحبهم عامر لخش الحمام الباب قعد يطق عليه بالقوة لف ع روحه الفوطه وطلع متعفلك من الحمام قاللهم خيركم ياولاد بتقلعو الباب كيف خشيت عاد قالوله محد طق واحمد  وانا نسع في ضحكم  ع شن شبحوله قالولها ان شاءالله خير احن كل واحد لهي في حاجته  شبحو لبعض وقعدو يضحكوا قالو شكلنا نتوهموا ونتخايلو مع بعض من لما خشينه ياوالله حاله ......لكن في نفسهم  استاخشو ومستريحوش بالصاير لانه كل واحد صارتله لقطة والحوش مش مرح ويغم القلب منه من لما خشوله كلو  وستحمدو  الله وكل واحد خش لداره بيرقدوا ماهو جامعة و وراهم نوضه بكرى الصبح وهما برررا لنص ااااليل ..راقدين في سابع نومه و يسمعوا عيطه تنوض الميت من قبره ناضوا يتجارو ويدورا منين الصوت طالع لقو صاحبهم حسين لقري الكتاب  مطلعش قالو اكيد هو  خشو يجرو عليه من خشو داره لهفهم هواء حامي وصاحبهم لقوه العيون مقلوبات ومفلوتات بيض ورغاوي من فمه مفتوح  وطايح زي العصا يابس متشنج طبسو يجروا عليه يفيقو فيه ناض طلق عيطه ويقول في كلام وطلسم وطلع صوت خشن غريب والوجه انقلب مش خليقت بنادم واله وجه يالطيييف انسخط قاللهم بصوت خشين مرعب اطلعوا من حوشي شن جابكم وهما واقفين الدم يبس في عروقهم مصدومين وسمعوا صوت بكي صغار ومراة تنانى تلفتوا لقو صغار مذبوحين والدم متشرتع في كل مكان ومتنطر ومراة نفس بالصورة واقفه تنوح والدم من كل مكان يشر منا وموس مرشوق بصدرها احمد قعد يكبر ويشهد ويقرا في القرآن والقلب تقولى حصان يلهد والدم نشف والعروق والريق يبسو من لشافوه قعدو الزوز يكبرو ويقرو في قرأن وهما يعروقو ويجفوا وصاحبهم اشهق وطاح غاب عن الوعي وين قعدو يكبرو ويشهدو الدنيا ولت هدوووء والجو برد وأذن الفجر عليهم استنوا باش فاق واستاقط صاحبهم وهو تاعب من لصارله وطلع الصبح تسقدو وطلعوا رجيلتهم فغميرهم وخاطرهم يقول ياروح مابعدك روح  ....بعدها بايام جوو سئلوا وقصقصو عرفوا من ناس المنطقه انه مسكون وليه سنين محد جى جهته وصايره فيه جريمة صاحب الحوش كان تأجر وبي كبير ومرته تقول حورية وصغار الحوت عليهم دارت عليهم قريبته وعلى مرته قنعتها انه تسحر راجلها باش ميخذش عليها مرأة ولا يشوف لغيرها وهى كانت العكس تبي تفرقهم وتخرب حياتهم الراجل خش في عقله وطلع قعد يتخيل ويوسوس ان مرته  تخون فيه وانهم هدام مش صغاره قعد في هم ومشاكل ويضرب فيها وفي صغاره لين جي يوم قتلهم وقتلها وشنق روحه وراهم الحوش انسكن من الدم لنهدر والسحر الأسود لمحاوط بيه معاد حد جى جهته من  سنين ليجي يسكن ميقعدوش فيه ليله و شكله  السمسار استغل انكم من خارج المنطقة ومستحقين مكان ع قدكم .... وفي خاطرهم يقول عليك كريه مشومة.........

ومش الوقت والزمان وكل واحد حصل مكان يقعد فيه وفي العطل يروحوا لمناطقهم ويلتمو مرة مرةو كملوا قريتهم الا حسين صاحبهم مسكين قعد مش صافي وخش بعالم تانى جرو بيه اهله قالولهم الشيوخ هدا متخطى وممسوس ...وبرررا يازمان وتعاله يازمان  توا الحوش مسحوه وجى مكانه عمار وطرق...وهدى حكاية من حكايات رورو
مشيت وخليتهم وبعيوني ماريتهم ليلتكم هنية استودعتكم الله.....
بقلم رورو
#رورو✨️