الأمير المفقود The Lost Prince

خوف وقلق 14

لم يعجب وفية تصرف إبنتها وقالت: إنت إزاى تطرديه وهو متعور ولسه خارج من المستشفى؟ هايروح فين يابنتى؟؟ ده تعبان, طيب كنتى إستنى عليه لما يخف, ياعينى يابنى هايروح فين ويآكل منين؟ .

أفاقت كريستال من حالتها وإنتبهت لما فعلت ,نظرت لباب الشقة وقالت: هارون....

فتحت الباب بسرعة ونزلت السلم ,كان لايزال واقفا فى مدخل البيت ونظر لها بحزن , دمعت عيناها وهمست: أنا آسفة ياهارون ...

كان ينظر لها نظرات مجروحة قهرتها إقتربت منه وأمسكت يده : تعالى معايا..

لم يتحرك هارون ووقف فى مكانه فسالت دموعها وقالت: حقك على ...متزعلش منى ... انا خفت ومبقتش فاهمة حاجة ...

رفع هارون يده ومسح دموعها برقة وقال بحنان: لاتبكى وجه القمر.. لاتبكى..

أنا خايفة عليك وخايفة منك .. انا إتصرفت معاك بقسوة .. سامحنى...

عاد هارون معها للشقة وضمته وفية بقوة وربتت عليه بحنان الأم وقالت: متزعلش من كريستال , هى بتحبك بس خايفة ..

أعلم ماما وفية ..

ربنا يهدى لكم الحال وتفهمو إيه اللى بيحصل؟

جلس هارون وعقد يديه أمام وجهه وزفر بتوتر, جلست كريستال بجواره ونظرت للسلسلة على الأرض ,أنحنت تمسكها بتردد وخوف , أغمضت عينيها ورأت نفس المرأة مرة أخرى واقفة فى قاعة واسعة وخلفها كرسى فخم , كانت تتحرك ذهابا وإيابا فى المكان بتفكير ,وضعت كريستال السلسلة من يدها على الطاولة بقوة : شفتها تانى ...

وفية: هى مين؟

نفس الست ...

هارون: لازالت مريضة؟

لأ ... كويسة ... واقفة فى صالة كبيرة مليانة زخارف ووراها كرسى فخم قوى ..

تنهد هارون براحة وقال: أمى .. لقد أصبحت بخير الحمد لله . إنها فى قاعة العرش ..وأبى.. هل رأيتيه مرة أخرى ؟ من قام بحبسه؟

معرفش ... معرفش...

إلمسى القلادة مرة أخرى ربما ..

لأ ... لأ.....

إلتفتت كريستال لهارون وقالت بصوت مرتجف: قولى الحقيقة ياهارون أنا هاتقبلها.. صدقنى.. بس قول.. إنت مين؟

قلت لك من قبل.. أنا الأمير هارون ..

وقفت بعصبية وقالت بثورة: أمير إزاى ؟ معدش فيه أمراء هنا ولا فيه مملكة ... ده كله من الخيال ماهو يا إما إنت مجنون فعلا أو بتكذب ,أو ساحر لأن اللى بيحصل ده كله مالوش تفسير..

أخبرها هارون بكل ماحدث وكلام العراف ووصوله لهنا ولكنها حركت رأسها بعدم تصديق : لايمكن أصدق ده تخريف تخريف...