🍂 A thousand years away from my beautiful sunshine. 🍂
🍂 تمنيت لو كنت أنتَ مسلما لي .. أو انا يهودية لكَ. 🍂
_ بَـيْـنَـنَـا مِـتْـرٌ وَ ألْـفُ سَـنَـة. _
🍁🍁🍁
تيما : اليوم غادي نقطعو تيكي الطيارة ... الى كنتي غاتمشي معانا خاصك تجمع حوايجك من دابا ... ياله توجد كلشي ...
حرك راسو بآه و هي رجعات حدرات راسها ... كيشوف فيها و كيزيد يحس بقلبو كيثقل على صدرو ... بحال شي صخرة كتزيد تكبر مع الوقت و كتخنقو ... و هذشي كيخليه يعيا جسديا و حتى نفسيا ... ماعارفش كيفاش يقدر يرتاح .. و واش باغي يرتاح أصلا ...
تنهد تنهيدة عمييقة و طوييلة و نطق ...
موسى : حنا علاش تلاقينا ؟
سؤال خلاها تحس بخوف غريب !! خوف ماخاصهاش تحس بيه ... قلبها بدا كيضرب بالجهد و جسمها برد عليها كثر من اللول ... بغات تشوف فيه ماقدراتش ! كلما شافت فيه كتحس بعينيه كايحاسبوها ... ديما السواد ديالهم كيغلبها و كيخليها تولي ضعيفة ...
تيما : (بلعات ريقها و طلعات راسها بشوية و شافت فيه) مافهمتش !؟ ...
موسى : ( بصوت مبحوح هادئ و نبرة منخفضة ) علاش طحتي فطريقي الى ماكنتيش غاتكوني ديالي ؟
تيما : (حولات نظرها للبحر قدامها .. خدات نفس عميق ... قلبها تخطا نبضات و تنهدات فاشلة و صوتها خرج فحال الهمس) موسى !
موسى : (تقاد فجلستو مقابل معاها ، حط مرافقو على ركابيه و مال لجيهتها ... نطق بشوية) علاش تلاقينا الى ماكناش غانكونو بزوج ؟؟؟ ( عاود شافت فيه بنفس التردد و هو دار عينيه فعينيها ) علاش تلاقينا الى ماكنتيش غادي تكوني ديالي و تبقاي ديالي ؟ علاش تلاقينا الى ماكنتش غانقدر حتى نقيسك ؟ ( هبط عينيه ليديها و هي شابكاتهم بجوج عندها مزيرة عليهم بحالا باغية تخبيهم عليه ) نشد فيديك ... نعنقك و نشم ريحتك من عنقك لي ماقادرش حتى نشوفو ... ( رجع كيشوف فعينيها العسليين ) ريحتك دابا ضايرة بيا .. غير كاتفكرني بلي نتي ماشي ديالي ... بلي عمرك غاتكوني ديالي ... ( زير على سنانو و قبضات يديه و لكن كمل بنفس الهدوء ) غير كتزيد تفكرني شحال هاد الدنيا بنت الڤحبة معايا ... عدوتييي و نهار على خوه كتزيد تمرمد ديلمي ...
كيبان ليها قرن حجبانو .. واحد العرق بدا كيتنفخ فجبهتو .. هبطات عينيها لذراعاتو و كيبانو ليها مزيرين و عروقهم بارزين ... الغضب كان باين فجسمو و ملامحو و لكن مزال مابانش فصوتو ...
موسى : ريحتك كتفكرني شحال هاذ الدنيا مكتحملنيش ... لاقاتني بوحدة فحالك .. خلاتني نبغيها ... بكلشي ليها .. بخايبها و زوينها .. بليديطاي ديالها الصغاار ... خلاتني ندمنها و نمرض بيها و نحماق عليها ... و لكن حرماتني منها ... واخا قريبة ليا ممنوعة عليا ... كتبات عليا نبقا ديما نبغيها غير من بعيد ... علاش ؟؟
تيما : (زيرات بيديها على الكسوة و شافت قدامها فالبحر .. كتبلع ريقها بقوة .. رجعات شافت فيه و لكن ماقدراتش تطول فيه الشوفة .. فعينيه لي كيتسناو جواب لأسئلتو كاملين .. جواب هي ماعندهاش .. و رجعات شافت قدامها ) هاذشي ماشي بيدي انا ... ماتسولنيش على شي حاجة لي كانبات نفكر فيها و مكنلقاش ليها الجواب لي غادي يبردني ... ( صوتها بدا كيرعش ) أنا مانقدر ندير والو ... و حتى نتا ... ( حركات راسها بالسلب ) ماعرفتش ... ( خدات نفس عمييق كتمنع راسها من البكا ) ماكرهتش كون كنت قادرة نتحكم فهاذشي ... و مانخليش راسي نطيح فشي حاجة لي عارفة راسي غانطلع منها خاسرة ... ماعارفاش كيفاش وقع هاذشي ... كيفاش و إيمتا بغيتك .. و ماعارفاش حتى شكون نلوم ... نلوم راسي حيت بغيتك و مزال كنبغيك و ماقادراش نحبس واخا خاصني نسد على قلبي ... ولا نلومك نتا لي غير كتزيد تصعبها عليا ...(حركات راسها بالإيجاب) نلومك نتا لي كتخلي كولشي يكون صعيب ... كتخليني صعيب ننساك واش كاين و نكمل حياتي بحالا ماعمرك كنتي ...
حسات بحلقها تقال عليها و سكتات ... بلعات ريقها حادرة راسها كاتشوف فالخاتم لي فيديها ... النظر بدا كيتضبب ليها و بدات كترمش بعينيها باش مايهبطوش دموعها ... بلعات ريقها و تنهدات تاني ...
تيما : ماكتخلينيش نسا بلي كانتوحشك ... و بلي واخا مكنبغيش نكون انا و ياك فبلاصة وحدة كانبقا نقلب عليك واش كاين ... واش كاتشوف فيا ... واش حاضيني ... واش كاين مورايا و غير غانضور راسي غانلقاك ... ( عضات لسانها و حبسات الألم لثواني عاد كملات ) هاذشي ... خاصو يحبس هنا ... قبل مانبقاش قادرة نوض ونبعد ..
موسى : و دابا ... غاتقدري ؟؟
VOUS LISEZ
✨A THOUSAND YEARS AWAY FROM MY BEAUTIFUL SUNSHINE✨
Любовные романы✨🍂✨🍂✨🍂 #قصة_قصيرة " A THOUSAND YEARS AWAY FROM MY BEAUTIFUL SUNSHINE _ " بداو من النهاية ... قصتهم قصيرة ومختصرة ... قصيرة عمرها دقائق ولكن مشاعر ابطالها شيوخ كملو القرن داخل قلوبهم ... مشاعر ثقيلة ، قوية ، وفنفس الوقت ممكن يتحركو و يطيرو فحال...
