تصويت للقصه وتعليق حلو بين الفقرات فضلا وليس امرا
الساعه 2:15
نتصل بيه ما يردش وهوا كان قايلي قريب نوصل
ورد: الغايب عدره معاه
سجى: لالا مش عدره معاه قلبي اني مش مطمني مش معقوله ليت لو كان مع بوه يرد عليا ويقولي نحكو بعدين
ورد: اهدي وخيتي وسمي بالرحمان فات وقت طويل وهيا تهدي في اختها
مريم خشت ع بناتها خيركم مش راقدين لتوا
ورد: مافيش يا ماما بس سجى مضايقه
مريم: خيرك بنتي سمله عليك شن في
سجى: يا ماما ليت كان جاينا وجايب حلو ليا وقتها قالي وهيا تشهق بالدموع قريب نوصلكم ومن وقتها لتوا ما يردش قلبي يا ماما
مريم: الصبر يا بنتي بالك لقي الوقت متاخر وصار معاه شي رجع لحوشهم
سجى: مش من عوايده يا امي
ورد: اسكتي اهو تو نتصل بخالتي ونسألها ع ليت
سكتت سجى واتصلت ورد بخالتها بس نصدمت لما قالتلها ان ليت قال ماشيلكم ومايندروش عليه نوضو العيله ع صوت بكي سجى وعياطها وقررو يطلعو يدورو بالك داير حادث ولا شي......
..............................................
صوت عياط وضرب معبي المستودع وجهه دم وكدمات
وديع: خلاص يا اسامه اني صاحبك وهكي تدير فيا ارحمني يا راجل
شده اسامه من شعره: وين كانت الصحبه وانت تاخد في لفلوس وماشي وين كانت الصحبه وانت شردت عيلتي وماريتهمش حت قبل لا يموتو ولا عشت معاهم اخر لحظاتي
وديع: اني كنت عبد مأمور ونفدت باش ننقد عيلتي مش اكتر لان يلي شروك شروني
اسامه: هه عيلتك مقابل عيلتي رح نبكيك عليهم قبل لا تموت
وديع: الا عيلتي اسامه اني اقتلني دير بيا شن تبي بس عيلتي ماليهمش دنب
اسامه: اللي بعتني ليهم تعرف شن اول درس علموهولي
ضربه في بطنه الدم بالدم ومقابل كل راس من عيلتي راسين من عيلتك حننفي عيلتك علي بكرة ابيها خوتك عمامك وخواتك ليهم موضوع تاني
وديع يبكي ويتعدب ويفكر كيف بيدير
وديع: خلي عيلتي في حالها واني تحت امرك ونديرلك اللي تبيه
اسامه: خليني نفكر قبل........
........................................
محمد: يا راجل كان واقف عليا وطلع قبل ساعه ساعه ونص من جنبي
عماد: ياراجل وين مشي
محمد: اني تو نشوف اويس وانت شوف يوسف وهاني طالع من الحوش و نتلاقو في نفس المكان
عماد: تامه الدوه
كلمو اويس ويوسف وتلاقو في المكان يلي متعودين يسهرو فيه وكان في خوف واضح بس المواقف ترجعهم كان مافي شي بينهم وقعدو يدورو الين ما رن نقال عماد اللي خلاهم ينسطلو
عماد: في اي مستشفى
انس: مستشفى.........
عماد: شن الوضع عايش وهوا منهار
انس: عماد تعالى تو وجيب معاك كتيب العيله
عماد: معاش قدر يتحرك تشنج ونزل ع ركابه خدي اويس النقال
اويس: اه خونا وين انتو
انس قاله عالمكان وطلعو جميع مشو المستشفى
.......................................
نورس تبكي من قلبها وتحس في روحها بتطلع معاش قادره تتحمل كلام حد وتتفكر كيف كانوو يهينو فاها ولما سمعت امل تحكي مع خطيبة محمد
(امل: اي ردي بالك منها هدي فرخة حرام وتغري في محمد وعبدالرحمن وحت صحابهم ومش حاكم فيها حد ولا اكتر من مره تطلع مع شباب وين نقولو لبابا يقول ما دوروهاش وردو بالكم ع رواحكم ولا اصلا خوتي مش معدلين علاها.
رواسي خطيبة محمد: سبحان الله بس محمد يحكيلي علاها انها بنيه طيبه ويتيمه ويقولي عاملاها كويس
امل: شن يتيمه تسخفي انتي امها هاربه مع حبيبها وبوها خانب وحرايمي مطلوب للعداله مقعمز في المانيا
رواسي: شهقت بس محمد محكاليش هكي
امل: شن بيطلع عار عمه المهم انتي ردي بالك منها تضحكيلها تلقاها دايره بواحد من خوتك
رواسي: خفت ع محمد منها غر نتزوجو والله معاد تحلم حت يكلمها)
ليش ياربي هكي يصير معاي اني دنب مني نحصد فيه معقوله هدا حظي من الدنيا هكي ولا يوم حلو حسبي الله ونعم الوكيل حسبي الله ونعم الوكيل اني معاش بنسكت ع حقي ولو مش عاجبتهم يلزوني من الحوش خلاص معاش قادره نتحمل وقفت وجت طالعه حست بدوخه وهب طاحت ومعاش تعرف روحها وين
•••••••••••••••••••••
Aya_te
الحجرى مليانه جرحى واموات وعياطات لما وصلو محمد وعماد واويس ويوسف لقو محمد وولاده انس والياس وسند
محمد: العمر ليك يا ولدي
عماد: قاعد في حالة صدمه
محمد(صاحبه): كيف صار وين نضرب ومن ضربه
انس: في واحد يقولوله الفوكس جي طب وديع ولد جيهتنا وصار بينهم ملحمه ونصاب ليت بس ما حدش سعفه
محمد(صاحبه): تبع مني هدم
انس: اني مانعرفهمش لكن نعرف ان دم ليت في رقبة وديع
اللي يبكي واللي يعيط بس بالصوت العالي ودوة المفرخ ما شي ينحل المواقف هدي تبي عقل ورزانه كملو الاجراءات وخدو جتة ليت ومشو باها للحوش
خش عماد ع عيلته
ام عماد: شن صار لقيتوه
بوه: خيرك رد ع امك وشن الدوشه هدي يلي برا
عماد: بصوت تقيل هدو ولاد خالتي ومعاهم صحاب ليت
طلع بوه وهوا طاح ع ركابه ماحكاش ولا كلمه الصدمه كانت كبيره عليه وموت ليت كان بالنسبه ليه فاجعه مش متوقع ابدا
امنه: يا ولدي خيرك شن صايرلك قولي يبست عضامي
عماد: بس يشوفلها ومحكاش ولا حرف
هاله: ليت وين
اشرلها بيده ان برا
ارتاحت امنه بس فورا ما بدت تعيط لما سمعت بوه يقول كسرتلي ظهري يا ليت طلعت تجري هيا وهاله لقو ليت بس مش كيف متخيلين لقوه جته وبدي لعياط والنديب طلعو صحاب ليت بما انه امه واخته جو وبلا حجاب وكان الوضع مزري دقايق وصلت مريم وبناتها وسجى كانت بالحرف الواحد منتهيه وبتهبل ومش قادره تقعد في ارض جت جنب راسه ليت حبيبي نوض معاش نبي بكلاوه تعالالي انت بس وبدت تضرب في وجها كله مني اني جيت لجيهتنا كله مني كله مني والضرب علي في وجها زاد وبدي يعلم وكل واحد مصدوم ويبكي بروحه زي امه يلي تبكي كنت بنزوجك وبنفرح بيك جابوك ليا جته اااه يا كسرة ظهري فيك يا وجع قلبي عليك اااه يا ولدي يارب نكون نحلم وما يكونش حق
هاله راح السند يلي بنستندو عليه يام اااااه يا ليت ارجعلي شويه بس ياريت ما خليتك تطلع ولا تمشي
مريم وهيا تحاول تشد في امنه استهدي بالله هدا قضاء ربي ولا اعتراض ع حكمه كوني صبوره واصبري لحكم ربك ورد تحاول تهدي في سجى يلي خلت خدودها دم وهيا تنوض في ليت جي عماد وقاللهم يخشو داخل وناضو وخشو صحابه والجيران والاقارب واللي يسمع يجي وبدت زحمه والجو بدي صقع اكتر والمطر نزلت وكأنه السماء نفسها تبكي ع ليت يلي راح ليت كان من النوع يلي مسالم وما يضرش في حد ومش بس هكي كان شهلولي وجوه حلو وما ليشي في الخبت ولا الحقد ولا حت الكره وقلبه طيب ومن هوا صغير ويحن عالقريب والبعيد ولهدا موته كان فاجعه للكل للقريب والبعيد رغم الوقت يلي متاخر والساعه المتأخره الا ان ماحدش قدر يصبر عليه وجو زحمه والكل مصدوم ومنتهي ورد بروحها يلي كانت صابره واعيه ويلي تصبر في كل واحد بروحه فيسع ما جي الصبح وماحدش غمضتله عين جابو الخيم وركبوهم محمد وعماد وانس يركبو في لخيم الياس واويس يحفرو فالقبر وسند يجيب في لبضاعه متع القهوه والسكر ولوازم الوفاه كان الوضع ملخبط
بابا محمد(حنقول بابا عشان لقيت ان تكرر اسم محمد في تلاته عائلات فحيصير التلخبيط)
بابا: استهدى بالله يا حسين واصبر لحكم ربك وانشالله يخلفلكم البركه
حسين بو ليت: يا محمد هدا بكري هدا روحي هدا العصا يلي نرتكز علاها
عتمان: ياراجل البركه فيك اصبر وصبرك لله
جلال: اهو عندك عماد ربي يعوضك فيه الخير والخيره
حسين: وهوا ينهف ودموعه شاقه طريقها ع وجهه ياربي صبرني ع فراقه
غسلوه ورفعو جتمانه من قدام عماد وانس ووراه محمد ويوسف واويس والياس وكل واحد فيهم رافع قلبه معاه صح مرات ماكانوش يتواصلو بس لما يموت الشخص يبدا عزيز عالكل واجباري بتتفكر المواقف يلي بينكم الحلوه بس وضحكم وشخص زي ليت كل دكرياتهم معاه حلوه ومواقفه رجوليه وطبعا الدنيا ماتاخدش الا الباهي........
............................................
الساعه 2:40
سعاد: شويه وبنمشي لامنه والله مانقدر نقعد علاها
يونس: اي والله لو ريتي حسين مهدود حيله
محمد: حت هوا ليت يا حاج رحمة الله عليه كان مش مخلي حد مش مفضل عليه يابال عيلته
عبدالرحمن: والله ولد زي الورده حسبي الله ونعم الوكيل فالدوله كيف بدت
سعاد: والله اتصلت بيا ناجيه وقالتلي وقالت امنه وخطيبت الولد مش صابرين بكل والبنت تقول من العهد البايد حت من خدودها دم من كترت النديب
عبدالرحمن: جاهله تزيد تعدب فيه وفي روحها لا حول ولاقوة الابالله وخلاص
يونس: يا ولدي ربي ما يوريكم نار الفقد تخليك خارج عن الوعي
ابتهال: يا ماما نمشو معاك عشان هاله مسكينه
محمد: توا مش وقتها وعياط وكل شي تالت يوم بعد تولي امكم ولو معاها
يونس: كويس حت هدا راي
يونس يكون صحاب هوا وحسين وناجيه قريبة سعاد وفي نفس الوقت جارة امنه
...........................................
خشت لداره ورقدت ع سريره حضنت لمخده يلي فيها ريحته مشيت وخليتني ليش اني من ليا بعدك تعرف انت قداش تهمني ولا انت اغلا من روحي ياريت الموت ليا ومش ليك في موتك راحت روحي بس جسمي قعد شن فايدة حياتي وانت مش فيها بكت بكل مافيها من قوه بكت لدرجه رقدت بغصتها وهيا مش قادره تصدق ان ليت يلي قبل ساعات يكلم فاها اختفي من حياتها
....
هاله كانت منتهيه حرفيا وكانت مش قادره تصدق وكل شويه تقوللهم خوي شويه وبينادي عليا جعان وبنتعاركو
امنه مش قادره تصبر خواتها بجنبها وكل عيلتها واقاربها وناسها ومافيش فايده تبكي وتتحسب في ربي ع وليدها يلي مشي في رمشة عين تقوللهم فرحان بيتزوج ويخطط شن بياخد وشن بيشري وكيف مخطط وشن يحكي وشن دار وشن قال وكل شخص يحكي في قصه صايرتله معاه وتزيد حرقة قلبها وغصه ورا غصه ماهيش اقل من غصة ام وديع يلي مش عارفه ولدها ميت ولا حي..
•••••••••••••••••••••••••••••••
اسامه جاه خبر ان محمد وصقر يدورو فيه عشان ياخدو حق الولد يلي مات في اشتباكهم والصدفه ان الطلقه ماكانتش من اسامه كانت من وديع لما داهمو الحوش لكن هيهات من بيفسر او يقبل مادورش ولا خدي احتياطه وفجر لكلام اللي سمعه
خش لوديع وخلاه يعترف وسجل اعترافه وطلق سراح وديع بعد لا وقعه ع اوراق وقصص تانيه
جاه اتصال انهم مسافرين حراسه مع واحد من الروس لكبار فالدوله جهز روحه وللمطار ع طول.........
•••••••••••••••••••••••••••••••
ناضت لقت روحها في نفس لمكان ولا من درى عليها سايرت روحها للحمام دوشت ومشطت شعرها ولبست ملاية للصلاه صلت ودعت ربها يكون معاها ومشت للصاله لقتهم يحكو ع موت شخص وانهم بيمشو يعزو
نورس: السلام عليكم
يونس: وعليكم السلام ورحمه الله اهلا ببنتي تعالي
جت نورس جنب عمها يا عمي بنطلب منك طلب وياريت توقف معاي زي كل مره
كلهم يشوفولها
يونس: ادللي كان طلبك فيدي ماتنوضي الا بيه
نورس: عشت معا عيلتك من واني عيل احترمتوني وقدرتوني وعطيتوني هلبا وغير اللي دارتهولي عمتي سعاد علمتني وفضلتني واستقبلتني في حوشها وسعري من سعر بناتها قالتها بغصه
محمد: رفع عيونه ليها لقي الدموع معبيات عيونها بس ولا دمعه طاحت
نورس يا عمي اني بنفتح حوش بوي وبنعيش فيه من بعد ادنك بما ان حوش بابا مقابل حوشك ومابيناش بعد اني بنمشي نبي نتعود ع روحي ونستقر وفي نفس للوقت نبي ناخد شوية حريه
يونس: لكن يا بنتي كيف بتعيشي بروحك غادي مانقدرش نطمن عليك
نورس: مش حنعيش بروحي انتم بجنبي وحناخد ملب عبدالرحمن للحراسه معاي وكل شي حيكون كويس
سعاد: عرفت انها بتخسر خدامه ببلاش اقعدي بلا دلاش بنوت شن بنفتحو حوشين عشانك
نورس: طاحت دمعتها ياعمي مش حنطلب منك شي ولا حت انك تصرف عليا بس وافق لان معاش.. وسكتت
يونس: حس باها وعارف مرته ديري اللي يريحك واني معاك في يلي تبيه وخودي معاك لبنات يساعدوك الحوش ليه مده مسكر اكيد يبي ترتيب
فرحت نورس وحضنت عمها وبكت بكت في حضنه لدرجه ان يونس خاف علاها وحب يغير الجو متعها يلا عاد مش كان قتلك اقعدي بروحك تنسي عمك والله ما يحلا يومي الا بالقهوه يلي نشرب فيها الصبح من يدك ضحكت وباس راسه ربي ما يحرمني منك انت بجد بابا
......
خشت للحوش وجتها عاصفة دكريات منين كانت صغيره كيف حوشهم مليان حب وضحك وباها وامها كانو يعشقو بعض وكلامهم كله حب والين ما طاحت الدوله حسبي الله ونعم الوكيل كيف حياتها نقلبت وكيف صار معاهم وليش امها ما خدتهاش وليش باها خلاها تنظف هيا ويسرى وابتهال ومره مره يضحكو الين ما فرطو من التعب الساعه10خش عليهم عبدالرحمن وجايب الكلب والعشي وباكو هديه
استقبلاته نورس بضحكه حلوه وتعشو جميع وقعدت تلعب مع كلب عبدالرحمن (كوبر) وهما اصحاب من قبل اساسا وفرحت بالنقال وبعدها روحو وقعدت هيا فالحوش الكبير بروحها خشت لدار نوم باها وامها وفتحت الدولاب زي ماهو بحوايجهم شمت ريحة ملابس بوها وملابس امها ااااه محلا ريحة الولدين خدت قفطان من متع امها نوم ولبساته ومشطت شعرها اللي اول مره يقعد بلا حجاب وكان طويل بشكل فاتن اللي بيوصل لركبتها من شدة طوله وطلعت بدت تنظف في دار النوم ولقت فلوس تحت ملابس بوها مبالغ كبيره تقدر ادبر بيهم روحها الين ما تبدا تشتغل لقت مع الفلوس هدم رساله......
••••••••••••••••••••
ويفوتو ايام الوفاة و ورد اللي تعبت من الشغل وهيا قايمه بالوفاة ومهتمه بالناس لان حوش خالتها قاعدين في صدمه من امرهم ومش متقبلين شي واختها يلي بدت غريبه واعصاب ومش متحمله حد الين ما في يةم روحت للحوش بدير دوره فيه وبتنظفه وبتاخد دوش وبترجع مع انس يلي بدوره قاللها شويه وجاي
دوشت ونظفت الحوش وسمعت الباب يطق في بالها ان انس لما فتحت لقت واحد ماعمرهاش راته طول عرض وعيون كبار وشعر اسود وخرت وسكرت الباب ع طول وهربت داخل الين جي انس ولقي الولد قدام حوشهم...
.................
Aya_te
