Hymenois၏မိန့်ကြားချက်ကြောင့် Orpheusဟာ အမြတ်ဒေါသထွက်လျက် Eurydice၏လက်ကိုဆွဲကာထိုနေရာမှ ချက်ချင်းထွက်ခွာခဲ့လေသည်။
လမ်းတစ်လျှောက်လုံးEurydice၏မျက်နှာဟာ မရွှင်မပြ။Hymenois၏စကားဟာ သူ့ကိုစိတ်အနှောင့်အယှက်အများကြီးဖြစ်စေခဲ့၏။
အိမ်သို့ရောက်သည့်တိုင်အောင် တစ်ယောက်နှင့်တစ်ယောက်စကားမပြောဖြစ်ကြသေးချေ။
Orpheus၏ ဤမျှကဲ့သို့ ဒေါသထွက်နေသောပုံစံအားလည်းတစ်ခါမှမမြင်ဖူးပေ။Orpheusသည် ပုံမှန်အားဖြင့်ဒေါသထွက်ခဲ၏။ဂီတသံစဥ်တို့ကို နှစ်သက်ခုံမင်သူဖြစ်ပြီး သူသည်အမြဲရွှင်ပြသောမျက်နှာထားရှိ၏။သူ၏စိတ်နှလုံးသည်လည်း နူးညံံ့ကာ သနားကြင်နာတတ်သေး၏။
မရွှင်မလန်းဖြစ်နေသော Eurydiceကြောင့် Orpheusမှာမနေသာတော့။ချော့မော့ကာဖြောင်းဖျရတော့သည်။
"မောင့်အသက်ရယ်...Hymenoisပြောတဲ့စကားတွေကို စိတ်ထဲထားမနေပါနဲ့ကွာ...မောင်တို့က သိပ်ချစ်ကြတာကို...မောင်တို့ကို ဘယ်သူတွေက ခွဲနိုင်မှာတဲ့လဲကွာ..."
သူဟာ Eurydice၏ကိုယ်လုံးလေးအား ရင်ခွင်ထဲပွေ့ဖက်ကာနှစ်သိမ့်စကားဆိုလိုက်သည်။Eurydiceက သက်ပြင်းခပ်သဲ့သဲ့ချရင်းမှ...
"ကျွန်ုပ်စိတ်တွေလေးလံနေတယ် မောင်ရယ်...."
သူသည်လည်းစိုးရိမ်သောကမကင်းပေမယ့် ချစ်ရသူရှေ့၌ သန်မာနေမှဖြစ်မှာကြောင့် သူ၏ပူပန်မှုတစ်ချို့အားဖုံးကွယ်ထားလိုက်လေသည်။
"အရမ်းမစိုးရိမ်ပါနဲ့မောင့်အသက်ရယ်...ဘာအကြောင်းအရာကမှ မောင်တို့ကိုမခွဲနိုင်စေရဘူး..."
Eurydice၏လက်သွယ်သွယ်လေးများသည်Orpheus၏ခါးထက်သို့ သိုင်းဖက်ကာ သူ့ပုခုံးပေါ်၌ ခေါင်းလေးမှီလာခဲ့သည်။Orpheusသည်လည်း Eurydice၏ ရွှေရောင်ဆံနွယ်လေးများအား ခပ်ဖွဖွလေးနမ်းရှိုက်လိုက်ပါ၏။နှစ်ဦးစလုံး၏ ရင်ထဲမှာတော့ ပူပန်မှုကိုယ်စီဖြင့်သာ။
ထိုအချိန်မှစ၍ Orpheusက Eurydiceအား မျက်စိအောက်ကအပျောက်မခံတော့ချေ။သူတို့၏မင်္ဂလာပွဲလေးဟာလည်း Hymenoisကြောင့် အထမမြောက်လိုက်သည်ကြောင့် နှစ်ဦးတည်းသာ မင်္ဂလာပွဲလေးကျင်းပခဲ့ကြသည်။
