التهيت وية بيت خالاتي التمو همة والبنات صارت سوالف وضحك
واني ساعة وياهم وساعة بالي يم بسمة
شصار وياها وشكاعد تسوي
شوية واتصلت بسمة كالت ها غرتي مو
كلتلها شنو معنى تصرفاتج هاي
كالت انتي لو تبقى عليج الف سنة بعد ما تسوين شي باجر اشوفج ونسولف
اني هم مكدرت اطول وياها اكثر لان يمي هوسة رجعنة للبيت متأخر رحت لغرفتي انام طبيت جوة البطانية واريد انام ما يجيني نوم اتكلب يمنة ويسرة وابالي كمال
ما حست على نفسي نمت وكعدت على صوت المنبه رغم احس روحي نعسانة بس كمت اريد اشوف بسمة بدلت مثل كل يوم وطلعت جانت كلش مطر رحت اخذ الشمسية صارت كدامي شمسية كمال تذكرت هاي باقية يمي
اخذتها وطلعت اجة علية مصطفى يوصلني كال توتة اليوم ما اكدر ارجع عليج صارت عندي شغلة راح اطلع وية صديقي لغير محافظة باجر يلا ارجع
كتلة اوك يلا نطلع لبسمة رحنا على بسمة اجتي بسمة مبتسمة وصعدت الطريق كلة بسمة تباوع علية غمزتلها وهزيت راسي يعني شكو
كالت من نوصل
اني صار علية الطريق شطولة اريد بس اوصل اريد افهم شكو
وصلنا بعد ١٠ دقايق نفوت محاضرة اجتي شروق سلمت وراحت
كلتلها اي بسمة منتظرتج تسولفين كالت ليش ما ادري راح تنفجرين
كلتلها حرب الاعصاب بطليها واحجي شنو معنى الي سويتيه
كالت عيني اول شيء الولد مثل ما كلتي شايف روحة للأخير وشخصية
كلتلها انطيني شي ما اعرفة
كالت معجب بيج سكتت
كالت ها شو بلعتي السانج
رجعت كتلها بسمة شنو معنى تصرفج تروحين وياه ومن اخابرج تكولين كمال وتسديه
كالت اول شي اني اعرف انتي شكد عنيدة وراسج يابس واعرف انتي معجبة بيه وهذا لا تنكريه وبصراحة هو كلش غامض بالبداية ما جنت اعرف اذا معجب بيج او لا بس كلت خلي اروح واجس نبض وانتي صديقتي ولازم اوكف وياج
كلتلها شنو توكفين وياي ليش شنو شايفتي ميتة عليه كالت اعرفج حتى لو تموتين عليه مراح تبينين رغدة اني صديقتج واختج لا تكابرين كدامي
كلتلها المهم خلي نفوت للمحاضرة وبعدين تكمليلي رحنا طبينة محاضرة جنت متشتتة كملت المحاضرة وطلعنة
بسمة كالت تعالي اكملج رحنا كعدنا على مسطبة وبدت تسولف بسمة بيها طبيعة اذا اتركها تسولف ما تسكت كلتلها سولفيلي من الاول للاخير
كالت من رحت وياه طلعنة اريد افتح موضوع بس شلون بدون ما احسسة وهو مثل ما كلتي ما يحجي بقيت صافنة واجتي فكرة ابالي كتلة عفية دخت يمكن نزل عندي الضغط وين ميصيرلك مجال خلي اشتري لفة كولشي مماكلة التهيت وية رغدة كال لا شنو لفة امشي اغديج
كتلة لا ميصير كال يلا نرد العزومة كتلة مو خوش شغلة يعني اني راح ادفع ضحك كال لا تخافين اني ادفع قاطعتها كلتلها وافرضي ما ضبطت خطتج ووكف اشترالج لفة يافهيمة شلون
كالت عادي اكلها واشوفلي غير حجة
ضحكت على عقلها وتفكيرها كتلها كملي
كالت كعدنا بين ما وصينة نص ساعة يلا وصل الأكل اني بديت اسولف سالتة بس هو كلش غامض ما ينطي معلومة عن نفسة ابد
شوية وراح يغسل واجاه اتصال هو موبايلة عالميز قريت مكتوب حبيبتي
اني كلتلها شنو يعني يحب
كالت اصبري
كلتلها عوفي ما اريد اسمع شعلية اني هم ماعندي شغل وعمل جاي اسمع شي ميخصني وكمت اريد اروح
كالت خلي اكمل اني ضجت شنو التكملة قابل الموضوع واضح بعدين حسيت اصتصغار النفسي اسمع هيج كلام
كلتلها بسمة سدي الموضوع امشي نطلع ميصير نتأخر اليوم ميجي مصطفى
كالت اوكي على كيفج خلي اروح حمام واجي
راحت بعد عشر دقايق رجعت كالت يلا
بعدها تمطر طلعنا والشمسية على راسنة
كالت شبيج بسمة شدعوة ترة مو هيج
كلتلها شنو الي مو هيج سكتت وكفنة شوية واجتي سيارة وكفت نزل الجام كال صعدو باوعت على بسمة طلعت من الشمسية وراحت صعدت
اني تقربت على السيارة سديت الشمسية فتحت الباب خليتها الة بالكاعية وكتلة هاي نسيتها يمي شكرا طريقي غير طريقكم عفتهم ومشيت اجة وراية
كال شنو مسوي شي اني لو بدر مني تصرف مو صحيح كتلة ابدا الموضوع مو يمك شكرا الك
كال امشي اصعدي اوصلج ووعد بعد ما اشوفيني ابد اجتي بسمة كالتلة هسة نجي
كالت شبيج رغدة
كلتلها بسمة شلون اجة
كالت والله صدفة حجيت وياه وكال راح امر من يم كليتكم واني كتلة راح نطلع واجة ما صدكت بحجي بسمة بس حسيت اذا ابقة مصرة تصير مني قلة ذوق صعدت بالسيارة بسمة بقت تسولف اني اباوع بطرف عيني اسرق النظرات اشوفة حتى ميباوع بالمراية مال سيارة وصل بسمة اول شي نزلت واني بقيت كاعدة رجع يوصلني هو مكنك على الجهاز الشاشة اتصل بيه شفت الموبايل حبيبتي واني اباوع على موبايلة شفتة يباوعلي بالمراية انحرجت ودرت وجهي بس احجي بكلبي عليه كلت لو عندة حبيبة ما يخونها وما يعزمنة طلع بس حجي
بهاي الاثناء فتح خط وباقي مكنك كال ها حبيبتي وحدة ردتلة ها حبيبي يوم وين انتة صوت مرية جبيرة اني ما اعرف شنو هالارتياح الي صار بداخلي بقو حجو شوية وراحت هو وكف كتلة امك كال اي
كتلة الله يحفظها صفن علية بالمراية بنظرة طويلة حسيت روحي طارت ردت ادير عيني بس ما كدرت اول مرة انتبه عيونة هيج حلوة وبيها لغة صعب تنفهم عيونة تسولف
كال رغدة
كتلة ها سكت
ما حجة شي اني سمعت كل الي كالة ما اعرف حسيت كال شي حتى ما سالتة شنو شردت
نزلت من السيارة كتلة شكرا
كال شكرا الج وراح
هاي الكلمات البسيطة الي صارت بيني وبينة والنظرة انطتني احساس فضيع احساس بالفرحة والراحة ما حاسة بيها من كبل طبيت للبيت ماما تحجي وياي واني اكوللها ايي بس ما جاي انتبه ماما شتكول بقت النظرة الاخيرة واحساسها ماخذتني لغير عالم
اريد اقرا تجي عيونة ابالي عيون تسحر بمعنى السحر تنرسم على الورق كدامي صوتة الي اتذكرة ما اعرف شنو هذا الاحساس الي انتابني رغم شكد اكو ناس كدامي محد شدني ولا لفت انتباهي ابد غيرة يكولون علية مغرورة وما تباعين على احد حتى بسمة دائما تكلي هذا حلو ذاكة حلو احسها سطحية لان الجمال عندي بغير مفهموم مو بس جمالية شكل وبس
بقيت اقرا لل٢ كمت رحت ماما نايمة
رجعت شربت مي وجيت أنام لزمت الموبايل اريد اوقتة لكيت مسج من رقم غريب
يتبع...
