البارت الثالث/
اخر شي اجاه اتصال وراح بدون اي سلام
انزعجت وكلت ماعندة ذوق
ورجعت دخلت للقسم
لاكتني صديقتي بسمة كالت شنو وينج خلصت المحاضرة
كلتلها غير ابن عمي كل شوية داز عليه
كالت ها شجابة هذا
كلتلها لا مو ذاك الضابط ابو الهوية كالت شو دوختيني تعالي نكعد بالنادي وسولفيلي
رحنا رحنا كعدنا وسولفتلها
كالت ليش هيج رغدة حرامات كلتلها شكو
كالت اريد اشوفة كلتلها هو اني شفتة لو فهمتة حتى انتي تشوفيه
كالت هو شنو اسمة رديت الها اسمة
طلعت الفيس وكامت تبحث عنة ما لكتة
كلتلها عوفي هذا جني يظهر من هو يريد
صدك عاد بقينة فترة طويلة نسيت الموضوع
صدفة طالعين اني وبسمة وشروق نفتر
اريد اشتري هدية لمصطفى ابن خالتي
بس حايرة شنو اشتريلة
اخر شي كلت هاي هي اشتريلة ملابس لعيد ميلادة دخلنا على محل رجالي مال ملابس
وكتلت لابو المحل اريد ملابس
كال كدامج
ضحكن بسمة وشروق طلعني وحدة هبلة
اكو واحد ما انتبهت عليه كاعد عالميز وناطينة ظهرة جان وجهة مقابيل ابو المحل وابو المحل كاعد ورة الميز ووجهة على الي يدخل للمحل
اني كتلة اريد ملابس كمت اوصفلة الاشياء الي اريدها بس تعرفون البنية شوية بذوق الولد ما تعرف كل ما يراويني شي اني اكولة راح يعجب مصطفى
طبعا بسمة وشروق بدال ما يساعدني كل شوية يصعبن علية الموضوع
بعدني اكلب سمعت صوت ابد مو غريب علية
حجة وية ابو المحل كالة ساعدها البنية مو بس تراويها التفتت هذا كمال
انصدمت بقيت صافنة عليه الولد يراويني واني مو يمة كام اجة علية صار كلش قريب مني
بس شنو اني دكات قلبي صارت الف دكة بالدقيقة صار قريب
كال راح اساعدج رجع كال اذا تحبين طبعآ
اني هزيت راسي الكلام ضاع مني تلعثمت
راح يحجي وية ابو المحل
اجتي شروق منو هذا المز
كلتلها اشششش بعدين عيب
جاب ابو المحل بضاعة غير الي جان يراوينياها
هو كام يأخذ منة ويعزل قطع على صفحة
اخر شي كال تعالي مطلع قمصان كم واحد وتشيرتات وبناطيل
كال اختاري من هاي الموديلات اللون والقياس الي تريديه
إني كتلة شنو متعود هيج دائمآ تساعد الناس
ابتسم ومو من عوايدة يبتسم
كال اذا مضوجج الموضوع انسحب
كتلة لا شكرا الك بس هيج اسال لان صار مرتين تساعدني
كال اي من حسن حظي
استغربت اشو اليوم المود زين بس بقت افكر هذا ليش هيج يطلع بدربي
اجتي بسمة كالت ما عرفتينة بالأستاذ
كلتلهن الضابط كمال الي ساعدني ووصلني
مدت ايدها بسمة تسلم عليه هو ابتسم باوع علية
ومد ايدة صافحها وشروق كالتلة فرصة سعيدة اختاريت الاشياء وردنا نطلع
طبعا بسمة جريئة كالتلة هاي مرتين تساعد اعز صديقة عندي ميصير ما نكولك شكرا
كلها ما تستوجب الشكر هذا واجبي
اني فهمت بسمة تقصد الشكر بالكلام
هي كلتلة لا ميصير عاد على عصير
اني باوعتلها هو مقبل
هي كلش اصرت علية
كالها زين اكو مكان قريب تفضلو وياي
اني بداخلي فرحت وبنفس الوقت انحرجت من موقف بسمة كلت هسة شنو يكول ذابات نفسهن
طلعت بسمة بقت تسولف وياه
واني وشروق نمشي ونسولف
دخلنا للمكان اخذنا على طاولة بمكان مميز اطلالتة حلوة
اجة العامل سلم عليه
شلونك استاذ كمال
هو رد السلام كلة شوف الانسات شنو يريدن
بسمة طلبت اول شي بعدين شروق
باوع عليه كتلة شكرا ما اريد
هو باوعلي بالنظرة الي بقت محفورة بداخلي كال شنو صايمة كتلة لا
كال يلا راح اطلبلج على ذوقي
كلة طلبيتي جيب منها اثنين
شوية اجت الطلبية اني معرفت شنو طالبلي خلاه كدامي عصير التوت البري وهو نفس الشي والبنات كل وحدة شكل
اني اريد اسال هواي اسالة ابالي
بس ما اكدر احسب للكلمة اكول ما اريد اتقرب منة بقيت مبتعدة عنة بالظاهر
بس اني راقبت كل تفاصيلة حتى طريقة شربة للعصير اني شربت منه كلش حبيتة طعمة
ما اعرف طيب لو لان ما اعرف ما حبيت احلل الاشياء او افسرها
دخلتة بسمة بسين وجيم كلها بيج حس امني
كامت تضحك طبعا بسمة كلش اخذت عالجو فد مرة سالتة شعجب انت ما متزوج لحد هسة
اني خزرتها لان زودتها ونحرجت
كاللها وشمدريج ما متزوج وباوع علية
اني انحرجت وضجت كلت هاي الغبية هسة يعرف اني من مسولفتلها وقارية الهوية
هي ذكية عالجت الموقف كالتلة مو شفتك ملابس حلقة ما جاوب
اني كلتلها عادي ترة الرجال اسهل شي عدهم الخيانة خاصة المتزوجين يضمون الحلقة من يطلعون
هو ضحك كال اييي وخاصة الضباط شلون علينة سمعة نحب النسوان ضحكن البنات
رجع باوع علية كال بس مو اني الي يخون لو متزوج ما اقبل عزومتج وباوع على بسمة
اني هنا كلش فرحت وهم ما اعرف ليش
خلصت الكعدة ردنا نكوم كال اي شي تحتاجن اني موجود
بسمة كلتلة ووين نلكاك نتصل بالقمر الصناعي
اني ضحت كلتلها بسمة زوديتها ترة
كال لا عادي ترة صديقتج عدها حق
طلع كارت نطاه لبسمة هي اخذتة
اني خطيت قبلهم اريد اطلع رحنا نحاسب
كال ندفع الاحساب
باوعنا عليه شنو اندفع هو حتى مكام
بسمة كالتلة ميصير
هو كال ما احب احد يدفعلي
اني كلش اتنرفزت كتلة ولا اني احب احد يدفعلي طلعت فلوس خليتها عالميز يم الكاشيير وطلعت
اجني وراية البنات كالن شبيج رغدة ترة تصرفج محلو كلتلها بسمة لعد تصرفج الحلو مدخلة الولد استجواب وعزمتيه بدون متأخذين رأينا شيكول علينة ذابات نفسهن
كالت اني علمودج هيج سويت
كلتلها شنوووو ليش اني طلبت منج
وشنو علمودي ليش شنو اعرفة يعرفني
كالت اي صحيح بس مو على بسمة هذا الكلام مشايفة وجهج شلون من تشوفيه لو تسولفين بيه لو نسيتي الهوية
صار جدل بينة سكتتنة شروق ورجعنا..
يتبع....
