رجعنا للبيت البنات فاركتهن
ورجعت شفت ماما كالعادة منتظرتني ويمهامها خالتي وبان بنت خالتي
اتلكتني ها وينج ماما ضل بالي
كلتلهم وية البنات التهيت
اخذت بان ورحت للغرفة سألتها مصطفى وين كالت وصلنة وراح يجي باليل
كلتلها باتي يمي وباجر نرجع سوة بعد الكلية
كالت ماشي
واني ابدل افتقدت الفاف مالي ماكو دورت عليه ماكو خابرت البنات كالو ما شفناه كلت ضاع بالتكسي
بقينا سهرانين اني وبان نسولف حجيتلها الي صار
كالت دير بالج من بسمة ترة احسها تغار منج
سكتتها لان هي تكره بسمة
صارت بينهم مواقف وبان تغار علية ادري بيها متحب احد ياخذني كنها ومتريد اصادق غيرها
ثاني يوم المفروض اروح اشوف بيبي موعدي وياها بس تزامن عيد ميلاد مصطفى ابن خالتي وما كدرت اعوفة
خلصنا العيد ميلاد ونطيتة الهدية وبوستة مصطفى كلش علاقتي بيه قوية اكثر من اخوية ولو الله منطيني اخو ما احبة بكد مصطفى
خلص العيد ميلاد خابرتني بيبي زعلانة
كالت ليش مو اني منتظرتج
كلتلها بيبي باجر كالت تعالي باتي يمي كلش اصرت وما حبيت اخلي بخاطرها
كلت الماما ضاجت بس ما منعتني وصيتها تبات يم بيت خالتي
وكلتلها باجر من الكلية ارجع وية مصطفى لهنانة ونرجع سوة اخذني مصطفى للبيت اخذت غراضي وملابسي الي اداوم بيها ووداني لبيت جدي ورجع
وصلت فتحلي الباب ابن عمي الغثيث سلمت وفتت ضل يسمعني حجي هاي بيبيتج اهم من ابن خالتج وضل يحجي كلام مزعج اتجاهلته ورحت لبيبي بوستني وبقت تشم بيه
هي كل ما تشوفني تحضني وتبقى تشم بيه اتسميني بنت الغالي
بابا مات وهو زعلان منهم وهمة زعلانين منة
بس بيبي انكسرت عليه هواي بقت تبجي تذب اللوم على جدو الله يرحمة
تكول منعني اطب لبيت ابني وتلوم عمي تكلة انتة جنت تحرض بابوك
واتذكر بفاتحة بابة هي بالمستشفى صار بيها سكر وصحتها ادهورت وبقت تبجي عليه بندم
تكول عبالي اني اموت وهو يندم علية ما حسبت هيج حساب
نمت بغرفتها وبقيت سهرانة سوالفها حلوة تحجيلي على طفولة بابة وشبابة تكولي هواي تشبيه
عيونج ماخذتها منة عنادج وشخصيتج مثلة من تتوجهين علية عبالك سلام متوجه علية
بقيت راسي بحضن بيبي وبقت تسولف وياي لحد ما غفيت
طبعا اني بعد ما مات بابة يلا اني شفتهم
بابا حاول يصالحهم بس رفضوه بس اخر محاولة اني جنت صغير اخذني ما اعرف وين كايدني وطب لبيت من الباب لاكاه واحد شاب كلة شعندك جاي لازم احتاجيت اني ما فهمت منو هذا بعدين طلع رجال جبير بالعمر طردة كلة من اموت ممنوع توكف على اجنازتي
واكفة مرة منتجية على حايط طالع نص منها وتبجي وما تكدر تتقدم خطوة هاي التفاصيل رسخت ابالي
بس ما فهمت ليش هيج ومنو ذولي واتذكر بابة طلع عصبي وبعد ما رجع لهذا المكان
من كبرت عرفت هذولي بيت جدي وبابة جان يحاول بس عزت عليه كرامتة من هيج سوو وياه وكسروه كدامي وهو عبالة وجودي راح يحنن كلبهم
بقت بيبي بحصرتة وبعد ما مات جدي بفترة بسيطة مات بابة طبعا يسولفون بابة وجدو يتشابهون نفس الصلابة والعناد والحب الي بينهم هو الي خلاهم ما يتلاكون لان الزعل جان جبير
بيبي هواي انكسرت وبقت تريد تعوض فراغ واشتياق بابة بية
بابة اتذكرة عبالك جبل من يمشي ويحجي ما شفت مثل شخصيتة الي جامعة الحب والكره
القساوة والحنية بابة جان قاضي بس معروف عنة صلب جلد شخصية ما تنهز بسهولة
بس محد يعرف بابة شكد حنين وعيت عليه شلون يحب ماما ومدللها وعرفت عاشو معاناة حب جبيرة
لان بابة تزوج على كبر وجان ناوي ما يتزوج بس من حب ماما تغيرت نظرتة للحياة
وبقت قصة حبهم ٥ سنوات وهو يحاول يقنع اهلهة بس ابوه رافض يريدلة بنت اخوه الشهيد الي جان يحسها مسؤوليتة
بابة من ايس منهم راح تزوج ماما وبقة يحبها وهي متعلقة بيه كلش
من مات ماما سنة كاملة بغير عالم عايشة عالمهدئات ومبتعدة عن كلشي حتى عني إني بقيت فترة يم بيت خالتي الى ان ماما رجعت للحياة
وكرست حياتها الية ونست نفسها
كعدت ثاني يوم بيبي ماكو كمت لكيتها تسويلي ريوك اني ما احب اكول الصبح متعلمة بعد ال١٠ يلا افتح ريكي بس ما خليت بخاطرها وهي فرحانة بيه وتداريني اكلت لكمتين
وخابرت على مصطفى مجاوب بدلت وكملت اتصل مصطفى ماكو طلعت اخذت تكسي ورحت للكلية
بالي يم مصطفى ماكو خابرت بأن مو على بعضها شكو بان احجي كالت البارحة مصطفى من رجع بالطريق موكفتة سيطرة متحاجي وياهم ومخليه بالتوقيف كلتلهم ليش محد نطاني علم ردت اطلع من الكلية جلبت بية بسمة كلتلها اروح اشوف مصطفى ساجنيه كالت اوكفي خلي اخابر كمال كلتلة اتخبلتي
كالت بابة هذا يعرف الدنيا كلها مو وكت كبريائج ترة يبهذلوه خطية
اني هم سكتت لان مصطفى بالموضوع
خابرتة حجتلة هو هم ما تاخر شوية واجة يم الكلية صعدنا بالسيارة
وكال بس عرفيلي اسم المركز
خابرت بان نطتني اسم المركز
هو وكف كال منا اخذلجن تكسي وتروحن واني احل الموضوع
اني مقبلت ايس مني اخذنة وياه بقة السيارة برة المركز وطب اقل من نص ساعة طلع هوة ومصطفى
اني من فرحتي فتحت باب السيارة وركض على مصطفى حضنتة
ما اعرف حسيت صار سنة مفاركتة هو رجع ابتعد شوية سولفت وية مصطفى وخابرت خالتي حجت وياه طبعا جايين من الصبح عليه ومحد مخليهم يشوفوه رايدين يبقوه ويحولوله للقاضي تجاوز على السلطات ومن هالحجي
خطية خالتي ما صدكت من سمعت صوتة المهم هو كال منو هذا ومنين تعرفيه كتلة بعدين تعال خلي نتشكر منة ونرجع
رحت هو واكف يدخن ويباوع علينة من بعيد وصلنا مصطفى اتشكر منة واني هم شكرتة هو كال ما سويت شيء هذا واجبي وبعدين ما اكدر ارد لبسمة طلب
اني باوعت على بسمة ضحكت ودارت وجهة كتلة شكرا يلا نروح بسمة كالت لا روحو انتو إني يوصلني سيادة الضابط اذا ماعندة شي لان طريقي غير طريقكم هو كاللها تدللين
مشينة واني اباوع على بسمة وضجت من تصرفها اخذنة السيارة مال مصطفى من باب المركز محجوزة هم جانت وطلعنة
سالني مصطفى منو هذا كتلة كرايب بسمة عدة الموقف ورحنا للبيت
خالتي جايبة ذبيحة وهلاهل وجكليت وخابصة الجو عبالك مصطفى جان بالاسر
بقيت اريد اخابر بسمة بس كلت اخاف يمها خليت تعدي ساعة وخابرتها
اسمع اغاني هادئة كلتلها وين انتي كالت بالمطعم كلتلهة ويامن
كالت كمال عزمني على غدة كلتلها اها كمال بدون اي اضافات شنو هالميانة
كالت ماشي حبي يوصل سلامج باي وسدتة اني صرت نار عبالك مو بسمة غير وحدة
يتبع...
