بعد خلصت انكسار لقيت يومي ما عندو معنى بدون ما اكتب ف قررت اكسر الروتين واكتب كوميدي لأول مرة، حتكون قصة قصيرة خفيفه حدها ١٠ بارتات وعادي احتمال اشحتفكم من هسي خليكم عارفين🌞🔪
...............................
قومي يا خايبة الرجا قومي تقوم قيامتك الساعه ١١ جات نايمه ليها شنو لحدي الوقت قومي عان متشتحه كيف الما بتخجل دي هسي كان واحد من اخوانك جا خاشي يا عديمة الحياء.. بعد سمعت نضمي امي حق كوووول يوم ختيت المخده فوق راسي، بعد اقل من دقيقتين نطيت من السرير لمن حسيت بضربة شاحن في ظهري لقيتها واقفه في الجهه التانيه وماسكه الشاحن بقت تتجارى وراي جوا الاوضه وانا بصرخ نطيت فوق السرير وعملت وضعية حارس المرمى وهي بالجهه القصادي رافعه الشاحن قلت ليها امي عليك الله خلاص والله ما بنوم تاني، قالت لي انزلي من السرير دا بتقطعي الحبل ما تم اسبوع من نسجناهو عاملة لي زي البقرة الوالده.. اختي معراج راقده في السرير القصادي وبتحضر قالت ليها حرام عليك يا امي، البقرة عندها انتاجات بطلع منها اللبن والجبنه والذبادي بتك دي انجازاتها شنو في الحياه غير النوم والحوامه.. قلت ليها اخير منك اليوم كلو التلفون في اضانك وما خالا ليك ولد ما خالطاهو، امي قالت لي كمان بتتلائمي... ركبت فوق السرير وانا نطيت طوالي جريت على برا لقيت منتصر اخوي في وشي قال لي مالك جارية كدا، قلت ليهو مافي شي.. قال لي في بن في البيت؟ قلت بصوت واطي: انت مع اصحابك ديل بتخلي ليك بن؟ قال لي قلتي شنو؟ قلت ليهو مافي كان في شويه شربناه امس انا ومناسك.. قال لي انتي ومناسك ديل كان عصروكم بتكبو قهوة امسكي القروش دي امشي ليك بن ما تجيبيهو مسحون اوعك بكسر راسك دا تعالي اقليهو هنا قبل الظهر، اصحابي جايين بعدين... جدع لي القروش ومشا قلت مششششم التقول شاحداهو راميها لي كدا، لقطهم من الواطه ومشيت صليت بعد داك طلعت على الدكان في الشارع لقيت الحريم متلمين جمب بيت ناس خالتو عوضية وسامعه لي ردحي من بعييد كدا قلت اكيد عامله ليها شكله مع ثويبة كالعاده، الشمار كتلني قلت كدي اكشف كدا بعدين اتخارج مشيت عليهم اسمع ليك ثويبة بتقول ليها ولدك زاااااااتوو فاضي لي من الشيشة والجبنات؟ يوم واحد من خطبني ما اداني قرش اصرفو على نفسي فالح بس يجي يقول لي مالك اتبشنتي كدا؟ ما اتبشتن كيف وحق الكريم ما عندي.. غزيت يدي في نصي ومديت راسي وبقيت متابعه المشهد خالتو عوضيه قالت ليها عاقد عليك ولا معرسك يا خيتي لمن يصرف عليك؟؟ خلي ابوك المباري لي النسوان ديل يديك حق الكريم وولدي دا زاتو تاني تشميهو قدحه الخطوبة وبنفسخها .. عضيت شلوفتي التحت ونطتت عيوني، الحريم بقو بتهامسو تحت تحت وحده قالت ليهم يا عوضية عيب منكم الكلام دا خشو جوا واتفاهمو براكم ماف داعي تعلو صوتكم في الشارع كدا.. ثويبة طبعا بعد كلام خالتو عوضيه فصلت فصله فجأة ما اشوفها ليك الا جرت توب عوضية وخمشتها من شعرها خالتو عوضيه قعدت تكورك فكيني يا متخلفه واااااي شعري.. الحريم بالعافيه فكوها قالت ليها تاني تقولي لي ابوك مباري النسوان بقطع ليك السبيبتين الفضلو ديل تمام؟؟ اتفكت من النسوان ومشت على بيتهم عوضيه قالت لينا انتو الموقفكم هنا شنو؟ حلة تموت في الشمارات اتخارجو بيوتكم يلااا... صلحت توبي ومشيت وانا بضحك وحده من جاراتنا قالت لي بري بري المرا دي خرفت خلاص، قلت ليها الاتنين خرفو كان ثويبة كان عوضيه.. لقيت مناسك جمب باب بيتهم تتاوق لمن انتبهت لي رفعت يدها واشرت لي عشان اجيها مشيت قلت ليها تلقيك الشمار ماكلك اكل قالت لي في شنو هناك عوضيه وثويبة تاني اتشاكلو؟ قلت ليها ااااي يختي ووووو.. حكيت ليها الحصل كلو قالت لي سجمي سجمي بري منهم فاضحين نفسهم كل يوم مع ناس الحله غايتو يا حليلو ولد خالتو عوضيه دا مدخلنو في ضفورو .. قلت ليها هو زاتو ما عارف ثويبه وحركاتها خاطبة لشنو؟ قالت لي ترا قالو بريدها.... مناسك يااابت الموقفك في الباب شنو.. دا كان صوت متوكل اخو مناسك طبعاً عامل زي اخواني صعب ومعقد واخلاقو دائماً في نخرتو اول ما سمعت صوتو طوالي لفيت وجريت منها، مشيت الدكان نزار سألني قال لي سمعتي الحصل؟؟.. طبعاً نزار بتاع الدكان اي شمار في الحله ولا الخرطوم ولا السودان عموماً بكون عندو كل ما اقطع موضوع بعمل نفسي ماشه اشتري حاجه وبسمع منو الشمارات قلت ليهو اها حصل شنو .. قال لي عمار وثويبة خطوبتهم اتفسخت، قلت ليهو الله يسألك انت عرفت متين؟ وبعدين زاتو الكلام ما اتأكد دي شكلة حريم ساي.. قال لي لالا اتأكد والله هسي عوضية ضربت لي عمار قالت ليهو كان ما فسخت الخطوبة ما عافيه ليك قال ليها خلاص ما دايرها.. قلت ليهو والله بقيت تخوفني منك متين الكلام دا حصل هسي انا حضرت الشكله ما تم ١٠ دقايق قال لي يا زولة استخبارات.. اها شلت منو البن ومشيت نضفتو وغسلتو، اول ما ختيت الطوة وشغلت البوتجاز امي جات ناطه قالت لي انا مش قلت ليك ما تولعي البوتجاز دا؟ الغاز دا كان قطع حتاكلوا البارد وتقعدو؟؟.. قلت ليها امي منتصر قال لي لحدي الظهر البن يكون جاهز ما حيطلع لي سريع بالفحم.. قالت لي لو صحيتي بدري كان طلع ليك.. دفرتني وقفلتو شلت طوتي والبن والكمشه وانا بنقنق مشيت الزقاق لقيت معراج بتنزل الحله قلت ليها لو ماشه بهناك جيبي لي تلفوني والسماعه قالت لي ما بجيبهم انا ماشه استحمى واتخمد، قلت ليها تتخمدي وين دايرة يسوي ليك الفطور منو قالت لي تسويه انتي دي من الصباح عملتي شنو؟ قلت ليها ما بسوي اي فطور انا دايرة اقلي البن دا واسحنو منتصر لو جا لقاني ما انتهيت بدخلني جوا الكانون دا.. قالت لي يا ريتو كان ريحنا منك، مشيت جبت تلفوني الجراند٢ والسماعه لمن فتحتو لقيتو عامل اتنين قلت ليهو انت ٢ دي حفظوك ليها ؟ نفسي يوم افتحك القاك ٣.. طلعت البطارية حكيتها بي شعري ودخلتها تاني عمل ٧٠ قلت ان شاء الله يمشيني لحدي ما انتهي، شغلت اغاني اليسا وبديت اقلي فيهو
" لو اتقابلنا مرة واحده استحاله هنفترق احساسنا بقول اننا لو شفنا بعض هنتفق دا احنا لسه ما اتقابلنا شوووو اتقابلنا اومال بقى حيحصل ايييه لو اتقاابلنا، لو حد فينا حب حاجه التاني عمرو ما حبها لو سألنا التاني تاااا..." فكيت لي صرخة لمن في سفنجه جات في راسي قبلت وراي لقيت منتصر واقف في بداية الزقاق كورك فيني قال لي انتي صوتك دا ماشي وين ؟.. اشر بي يدو: دا ما شارع؟؟؟ حيوانه انتي ولا شنو؟.. قلت ليهو مالك انت هسي انا بقلي ليك في البن تجي تضربني كدا؟.. قال لي مشتهى هوي انا كان جيتك بدخل ليك راسك جوا الكانون دا.. سكت ساااي طبعا ما بعيد عليهو يعملها قال لي سريع داير الجبنه دي تطلع بعد الفطور، اها بعد مشى بقيت بسمع ساااي بدون ما اغني مرات بسرح ببدا اكورك معاها كدا تاني اتذكر الهرشه الاخدتها قبل شويه.. بعد انتهيت وقمت لقيتهم خاتين الفطور وبياكلو قلت ليهم ما ناديتوني ليه.. معراج قالت لي ناديتك عشرمية مرة، منتصر قال ليها هي فاضيه من الكواريك؟ عامله روحها بتغني ما عارف لو صوتها سمح كان عملت شنو؟.. قلت ليهم انتو لو مقدرين موهبتي دي كان هسي عبرت لكن دايما بتجرحوني بي كلامكم دا.. امي قالت لي جيبي ذيادة عيش وتعالي خلي الكلام الكتير، بعد فطرت عملت الجبنه ختيتها في السيرمس وجهزت الكبابي في الصينيه.. صليت الظهر وفتحت المكيف عشان انوم امي قالت لي انتي هسي مش صحيتي نايمه ليها شنو تاني؟ قلت ليها ما انوم يا امي الدنيا دي فيها شنو غير النوم، قالت لي فيها غسيل فيها مكوه فيها طبيخ فيها نضافه انتي بس اقعدي اترقدي لي من سرير لي سرير.. قلت ليها معراج قاعده تسوي شنو، قالت لي معراج بتموت يوم بشغلة البيت دا تلحق شنو ولا شنو.. قلت ليها بتلحق بتلحق ما هي مكنة البيت دا، امي قعدت تكورك الله اااااااكبر عليك اقتليها عليك الله اسحريها واقتليها لي ، نومي نومي نوم الظالم عباده اتخمدي يا الخمله.. قلت ليها اطفي النور دا معاك عليك الله يا امي.. فنتني بالسفنجه نص رسي لمن عمل زنننن....
انا اسمي مشتهى نحن ٣ بنات وولدين ابوي اتوفى من انا صغيرة ما بتذكر شكلو كيف اصلا، اختي الكبيرة مفاز متزوجه وعندها ولد وبت ولدها عمرو ٦ سنين والبت ٣ سنه، بعديها اخوي معتصم متزوج برضو ما عندو اولاد وبنشوفو من سنه لي سنه، بعديهو اخوي منتصر حتى معراج واخر العنقود السكر المعقود اختكم ف الله مشتهى اتخرجت لي سنتين وقاعده عاطله في البيت..
يتبع..
