"خطوبة مفسوخه"
شفتو قبل كدا خطوبة اتفسخت قبل ما تتعمل؟ ما اظن ولا حتشوفوها الا في البارت دا
سيد الفنييييلة البيضاء مكتوب علييييه الريدة دقستي ليه دقستي ليه يا بليدة من حبو ما مستفيده دقستي لي... جدعت المقشاشه وقعدت اهوزز في كتفي وراسي مع اللحن تاتاراراتاتارارارتاتارارا 💃💃💃💃💃 دنقرت اشيل المقشاشه راسي تاني بقى يتهوزز براهو لمن سفنجة امي ضربتني قعدت تكورك من باب العريشة " يا بت انتي جنيتيييي؟؟ بتسرخي كدا مالك؟؟؟ شاحده ربي منتصر يجي خاشي ويلقاك بتكوركي كدا عشان يقطع ليك لسانك دا.. مع كلام امي دا تلفوني قفل قلت ليها اها ارتاحي يلا التلفون سمع نبيحك وقفل.. قالت لي هو بي صوتك الزي السخلايه المخنوقه ما قفل يقفل بي صوتي، بعد كنست الحوش قلت لي معراج ارح نشيل السراير قلت لي اولاً شي انا عروس ما بشتغل تاني حاجه تتذكري الاسبوع القبل الفات لمن ناديتك عشان تشيليهم معاي انتي ابيتي؟؟ يلا امشي شوفي ليك زول يشيلهم معاك.. قلت ليها قلبك الاسود دا حتنضفيهو متين ثم ثانياً عشان خطوبتك بكرا دايرة تعملي لي فيها خلاص دخلتي عش الزوجيه؟.... طبعاً البايرة دي حيخطبها ولد سلمى القالتو مفاز.. سلمى زي بت خالة نسيبتها، اها الليله بقيت ليكم حجه روحيه....قالت لي يلا يلا من هنا يا بايرة قلت ليها تبوري قرنين لا يعاين ليك بشر لا اب سنين🤲🤲.. قالت لي اب سنين دا شنو؟ قلت ليها ما عارفه جات مع القافيه بس، اها يا زولة حتقومي تشيلي معاي ولا اشيلهم براي؟ قالت لي ابيت ما قايمه.. قلت ليها سمححح شوفي بكرا الحيشتغل ليك منو اقعدي نضفي البيت دا براك يا عروسه انتي😠😠..امي طبعاً طلعت كالعاده وماف زول حيشيل معاي مشيت طلعت المراتب وخميت السراير براي، اصلا امي ومنتصر بنومو في الحوش فطلعت سريرين بس، لقيت الحوش مرشوش ومكنس سمح ومفرشين ملايات سمحه يعني الجو حاجه كدا رهيبه قلت اعمل لي قهوة وانادي مناسك نعديها قطيعه لحدي المغرب، ركبت القهوة وفتحت تلفوني عشان ادق لي مناسك اول ما فتحتو جاتني مكالمه من " اب راس مدوقس🤓🤓" قربت افن التلفون لكن اتذكرت ماف زول حيجيب لي تلفون تاني وعمك دا ما بستاهل عشان خاطرو اقضي حياتي بدون تلفون اها فصلت في وشو ولحدي ما اخش ادق لي مناسك فاصلة فيهو ٦ مرات، من اول جرس ردت لي قلت ليها التلفون دا مخيتنو في يدك؟ قالت لي دايرة شنو قلت ليها الجبنه جاهزه تعالي قالت لي سمح.. قلت ليها جيبي معاك تسالي قالت لي ما عندي قروش قلت ليها خلي كضبك دا زول مقرش زيك ماف والله ما تجيبيهو ما افتح ليك الباب.. قالت لي بجيب كيس واحد عندي ميه فكة الباقي خمسميات قلت ليها كيس واحد دا نوسخ بيهو سنونا؟ مناسك هوي خلي الجوع حقك دا وجيبي ليك ٥ اكياس، قالت لي يا سلاااام ٥ اكياس لشنو قال.. قلت ليها بديك متين لمن تجي ارح سريع.... مشيت طلعت السلك من الباب دقيقتين كدا ودقا كوركت ليها من السرير فني الاكياس اول حتى بفتح، اسمع ليك صوت منتصر بقول اكياس شنو يا مشتهى.. نطيت من السرير وجريت فتحت ليهو دخل و قال لي الفصل السلك دا منو؟ بقيت بربط فيهو ديل شفع الحله زهجونا قبيل عشان كدا فصلتو قال لي والاكياس دي شنو؟قلت ليهو ولا شي.. قال لي هوي يا مشتهى ما تكوني بتتاجري بالمخدرات، قلت ليهو لو بتاجر دي حالتي الله يسألك؟ بقعد اشحدك في الخمسميه والمتين؟؟ قال لي خشي سوي لي جبنه قلت ليهو اصلا مناسك جايه تشربها استنى لمن تجي بسويها قال لي انا طالع هسي لحدي ما استحمى القاها جهزت.. قميصي الكاروهات مكوي؟ قلت ليهو ما بعرف قال لي لو ما مكوي اكويهو لي.. دخلت وانا بنقنق متين حيعرس وارتاح من غسلي اكوي كويتهم ليهو ولمن طلعت لقيت مناسك تتونس معاهو.. قعدت تضحك قالت ليهو وهسي ماشي عرسها؟؟ بقيت واقفه بتصنت قال ليها اي لكن خلاص مسحتها من راسي.. قالت ليهو بري انا ما كنت قدرت امشي عرس الاكس بتاعي لو شنو داك ، قلت مششششم هسي منتصر دا بحب عليك الله ؟ قادر الله في قدرتو، وانا كان لقاني ماسكه التلفون ساي بنق لي😏😏.. سويت الجبنه وجبت الصحن فتحت تلاته واتنين ختيتهم في جيب الجلبابه مناسك قالت لي دا شنو؟ قلت ليها قلت ليك بديك المتين ولا دايراني اديك ليها واخليهم ليك؟ قالت لي ومالو قلت ليها انا لمن اجيب ليك قعد ترجعي لي القروش؟ انطمي واشربي القهوة دي، منتصر خلص الكبايه في جغمه واحده وخما نص التسالي الفي الصحن وقام يلبس قلت ليهو ما نفسك تاكل الصحن؟ حمر لي ومشا.. تلفوني ضرب مناسك قالت لي غريبة تلفونك فاتح، بقت تتاوق عشان تشوف الاسم قالت لي هو دا لسه بضرب ليك😹😹😹 قلت ليها الله يلمني فيها حجه عشه دي عشان اوريها اللعب معاي كيف، قالت لي امو ما جاتكم تاني؟ قلت ليها جات ٥ مرات... طبعا اب راس مدوقس دا ولد روحيه، تاني يوم من جاتنا قالت لي ارح رجعيني بيت العرس عشان راسي بلف، وديتها ولحدي ما اسلم على ناس البيت نادت ولدها من الديوان والله لا وراكم خلقتو شفتو اخو خطيب معراج القلت ليكم راسو عامل زي البيضة؟ يلا داك تامر حسني جمب ولد روحيه وعلي العلي بسكر جانا و ريحة العرقي تجيب الطاشي، لو سألتوني عرفتي ريحة العرقي بي وين فسمعت بس وحده من اهلهم قالت واي من ريحة العرقي اها ام سمر قالت ليها اجي يا روحيه الناس قاعدين جايبة ولدك لشنو؟ قالت ليهو سلم سلم يا فراس... يا خسارة الاسم فيهو مدا لي يدو وابتسامتو للضرس الاخير بقيت خايفه اسلم وحده من اهلهم قامت طلعتو برا وجات قالت لي معليش يا بتي السكران على ذمة الواعي... في نفسي قلت صحي الولد وامو الاتنين سكرانين ... الموووهم تاني ما عارفه جاب رقمي من وين بقى كل دقيقتين يضرب لي وهو سكران يسرد لي اشعار الجاهليه والعصر الحديث كلها ويغني مرة لي محمود عبدالعزيز مره لي معتز صباحي مره لي فلان ومره لي علان وانا بقيت اقفل تلفوني مخصوص عشان معطتو دي.. مناسك قالت لي كدي بعد منتصر يطلع ردي خلينا نتموضع شويه فعلا بعد طلع رديت عليهو قال لي يااااا بت يا سمحه مااالك عامله فيها تقيله انا من شفتك قلبي دا عمل دقدقدقدقدق... عملت كتم وفكينا الضحكه انا ومناسك😹😹😹😹😹😹😹 اها انا داير اجي بيتكم وريني نعمل الفيرست ستيب متين، قلت لي مناسك الفيرست استيب دا شنو قالت لي الخطوة الاولى يا الجاهله اخير منك السكران.. قلت ليهو هوي يا فراس تاني ما تضرب لي انا ما دايرة اسمع صوتك دا ولا اشوف خلقتك دي اختاني يا ود امي.. قال لي لييييه لكن انتي ما تديني فرصة اوريك فيها حبي الجواي ليكي.. قبل ما ارد ليهو تلفوني قفل مناسك قعدت تضحك قالت لي والله دا ظريف كان تديهو فرصة يا هنايه😹😹 قلت ليها انطمي يا سجم.. قالت لي اها حتعملو شنو بكرا ، قلت ليها اسمها حيعملوووو انا قشة ما برفعها.. قالت لي مالك قال قلت ليها لأنها ما بتستاهل.. معراج جات ناطه قالت لي البقدروني قاااعدين ولا ما كدا يا منو.. مناسك قالت ليها كدا ونص وخمسه بكرا من الدقش بجيك.. لويت خشمي وقلت ليها مششششم..
