"عريس حجه عشه المكشكشه"
صحيت بيدو البتكلكني في اضاني ابتسمت وانا لسه مغمضه بقى بجرني براحه عشان اصحى قلت ليهو بدلع وصوت نعسان: محمد يااخ خليني انوم.... فجأة ما احس ليك الا ب كف في نص وشي قمت وانا بصرخ واااااااععي.. القى ليك مهاد مخلوعه ومنططه عيونها قلت ليها يووومك ويوم امك.. جات مفاز خاشه قالت لي مالك قال بتكوركي، قلت ليها سوقي بتك دي واتخارجو لي من الاوضه خلوني اتم نومتي.. قالت لي الساعه ٩ جات نايمه لشنو كفاك بعد دا.. قلت ليها تنوم فيكم حيطه انتي وبتك قومتني ب كف لمن نخرتي وجعتني، قالت لي هسي يدها الصغيرة دي وجعت ليك نخرتك مشششششم مخير الله.. طلعت وخلت بتها لسه مخلوعه فيني قلت ليها مالك انتي كمان بتعايني لي كدا قومي الحقي امك.. طبعا ماف امل للنوم بعد دا طلعت لقيت امي حاضنه كريم وتلعب معاهو قالت لي تعالي سلمي على ولد اختك قلت ليها ما دايرة اسلم ولا شي هي زاتا كان نصيحه في زول بجي للناس من صباح الرحمن؟... لحدي بعد الفطور البيت جاط فوق تحت وشفع مفاز كواريكم بقت ماليه البيت قلت بري بري الجوطه دي ما بتنفع معاي اخير لي امشي لي مناسك اظبط راسي بي قهوة لفحت توبي وقلت لي امي جيبي ٢٠٠ قالت لي ما عندي قروش وانتي ماشه وين بي توبك دا، قلت ليها طافشه من البيت دا.. قالت لي ما تطولي لي لسانك انا سألتك سؤال تجاوبي عليهو قلت ليها ماشه لي مناسك يا امي انا قعد امشي وين يعني؟؟ معراج كوركت لبها من المطبخ: خليها تمشي عليك الله يا امي اصلا قعادها من عدمو وااحد.. لويت ليها خشمي ومديت يدي لي امي، مفاز قالت لي امي بتعرفي سلمى مرت محي الدين؟ .. عرفت في شمار في الموضوع قعدت وقلت ليها في شنو، امي قالت لي انتي الدخلك شنو قومي اتخارجي، اي بعرفها مالا قالت ليها شافت معراج في عرس راوية (راويه دي حماة اختي) قالت دايراها لي ولدها.. قلت ليها ولدها الراسو عامل زي البيضة داك.. قالت لي لالا يا بت دا قاعد في قطر ولو شفتي بيتو بانيهو طابقين.. امي عيونها بقو قدر الفنجان جات قعدت جمب مفاز وقالت ليها كدي وريني قالت ليك شنو... معراج طبعاً كانت في المطبخ تسوي في ملاح الغدا لمن سمعت الكلام جات بي مفراكتها قالت ليها دا ياتو انا شفتو قبل كدا؟؟ قلت ليها غايتو جنس خفة امي اديني الميتين خليني اتخارج.. طلعت لي ٥٠٠ من شعرها وقالت لي تجيبي لي ال٣٠٠ راجعه سامعه؟ قلت ليها مستخسرة فيني ال٣٠٠ يا امي؟؟ سمححح... مشيت الدكان شلت لي ٣ اكياس تسالي، التالت بالقلع شلتو من نزار قلت ليهو تساليك دا ماف زول بشتريهو غيري حتى الشفع خلو التسالي بقو ياكلو الاندومي والشيبس مفروض تديني كل يوم واحد هديه.. بقى شغال لي والله انتي حتخليني اقفل الدكان دا كل ما تجي تخسريني تاني ما تجي تشتري مني زاتو.. قلت ليهو دا ما كان كيس تسالي بي مية جنيه.. خليتو لسه يكورك و مشيت لي مناسك لقيتها عاملة ماسك في وشها ولابسه الاكياس قلت ليها انتي ما بتزهجي من الحاجات دي؟ كل ما اجي القاك مجلبطه وشك دا، قالت لي مشتهى هوي ما تسحريني انتي عشان كسلانه قايلة الناس كلها زيك؟ قلت ليها انتو ما عندكم موضوع بس متوكل قاعد؟ قالت لي طلع اقلعيهو ساي.. قلعت التوب وقلت ليها قومي سوي الجبنه، شالت كيس التسالي وقالت لي انا تعبانه سويها انتي.. خمشتو منها وقلت ليها انا ضيفه تقولي لي سوي الجبنه؟ قالت لي انا دي الضيفة يختي قومي قومي انا كان اتحركت اكياسي ديل بتشرطوا ما بقدر كل كم يوم اشتري.. قعدنا نتناقر ساعه قومي انتي انا ما بقوم ووووو.. في النهايه انا المسكينه العملتها قالت لي اها ماشه العرس بشنو؟ قلت ليها عرس منو؟؟ قالت لي عرس سمر.. قلت ليها عرسها متين هي.. قالت لي اجي يااا مشمش عايشه وين انتي عرسها الجمعه الجايه دي، قلت ليها بري ما عزمونا قالت لي عزموووكم امك الصباح جات لمن امي سألتها قالت ليها ماشه دق الريحه؟ قالت ليها لالا كرعي واجعني ما بقدر امشي لو ما عزموكم امك ما كان سكتت.. قلت ليها صحي كان شالت حالهم ، قالت لي انا ماشه بكرا اشتري لي فستان ولا حاجه امشي بيها ارحكي، قلت ليها تشتري لي؟ قالت لي بري ما عندي ليك قروش.. قلت ليها لو مشيت بمشي بي فستاني البني.. قالت لي لاااااا عليك الله والله بتبقي زي المتخلفه لمن تلبسيهو.. قلت ليها اصلا انا متخلفه وبعدين ما عندي مزاج الله اعلم امشي.. قالت لي والله سمر في عرس اختك مفاز دي جتت قبل العرس ب يوم من صباح الرحمن وباتت معاكم كمان كان ما مشيتي شييييينه في حقك، قلت ليها صحي والله ما قصرت خلاص بمشي، قالت لي ما شفتي خالتي فاطمه رسلت لي شنو. قلت ليها رسلت شنو؟ فتحت تلفونها وقبلتو لي عاينت لقيتها صورة حمامتين وجمبهم ورود مكتوب فيهم مساء الخير والصورة مرسله الساعه ٨ صباحاً فكيت الضحكة وقلت ليها دا شنو؟؟ قالت لي ليها كم يوم يختي ترسل لي مساء الخير بالصباح وصباح النور بالليل، قلت ليها يختي المرا دي لسه دايراك لي ولدها، قالت لي شكلها كدا.. قلت ليها اها خبر فسحة الخطوبة اتأكد؟ قالت لي ما بعرف تاني ما سمعنا شي، قلت ليها غايتو لو اتأكد تاني مثاني الا تتم نص دينها صيام لكن والله هي حلاتها الصراحه.. قلت ليها عاد لكن سماحتها براها بتنفعها؟؟.. اها اخدت ونستي معاها واتخارجت، العصر كان قرب يأذن قبل ما اصل بيتنا اشوف ليك جارتنا ماسكه كريم وبتكفت فيهو جريت وقلعتو منها وكريم دا ببكي لمن يشهق قلت ليها هييييي يا ثريا مالك مع الولد دا؟؟؟ قالت لي لمو ولدكم دا عليكم عايني ليهو خربش صلوحي كيف؟ عاينت لي كريم وقلت ليهو صحي انت عملت كدا؟ كريم هزا راسو وهو ببكي قال لي دا ما انا والله دا عبودي الخربشو.. قلت ليها سامعه؟؟؟؟ كريم اصلا ما بهبش زول ثم ثانياً انتي ما عندك اي حق تجي تكفتيهو كدا حتى لو هو الخربشو لو عمل حاجه زي دي تجي تكلمي امو بتعرف تتصرف معاهو حركه شينه منك تدقي شافع زول وامو ماف.. قالت لي ولدكم كضاب انا شفتو بي عيني دي لمن طلعت من الدكان، صلوحي قال ليها دا ما كريم يا امي عبودي الخربشني.. طبعاً ثريا وشها جاب الوان قوس قزح كلها قلت مششششششم كضب الشفع هيييييين شينه كضبة الكبار انتي لو ما في مقام اختي الكبيرة كان حيكون عندي معاك تصرف تاني ارح قدامي يا كيمو زاااتو ناس خربانه من كبارهم ديل ما تلعب معاهم.. سقت كريم من يدو ومشيت سمعت ولدها بكورك قلت بتكون دقتو عشان طلعها غلطانه قدامي، مشيت غسلت ليهو وشو وشطفتو وسقتو جوا لقيت مفاز ماسكه تلفونها وتحضر في تيك توك قلت ليها خليك راقده لي كدا وولدك برا بكفتو فيهو.. قالت لي سجمي الكفتو منو، قلت ليها ما عارفه هاك استلميهو واوعك تخليهم يجوني جوا انا خاشه اخد لي نومه قبل العصر يأذن كلمتك يا مفاز واحد فيهم يجيني بزعطو بالشاحن طوالي.. جرت ولدها بقت تسأل فيهو الضربك منو وانا دخلت اتخمد..
