" روحيه الرغايه"
باللبشة عملت دا كلو في دقيقتين اول ما مشيت العريشة اشوف ليك المرا الكانت قاعده جمب حجه عشه قبيل طوالي قبل ما اسلم عملت خلف دُر 🏃♀🏃♀ امي جات لاحقاني قالت لي با بت انتي جنيتي دايرة تجلطيني مش؟ اصلك كان ما شفتيني ميته قدامك ما حترتاحي.. قلت ليها امي المرا دي جايه لشنو؟؟ قالت لي جايه لشنو كيف يعني؟ دقيقه كدي امشي اسألها اقول ليها دايرة شنو من جيتك دي.. مدت لي سبابتها مشتهى هووووي هوي يا مشتهى احسن ليك تتعدلي ارح انسلي قدامي.. طلعت مع امي وسلمت عليها المرا تعاين لي من فوق لي تحت وتكشف قالت لي مااالك قال من شفتيني جريتي شبح انا ولا شنو.. قلت في نفسي" لو في شبح هنا وسمع كلامك دا حيبكي عديل 😏😏" قلت ليها لالا العفو اتذكرت بس اني ما قفلت المكيف وكهربتنا قربت تنتهي عشان كدا.. معراج نادتني في المطبخ مشيت ليها قالت لي المرا دي انا خوفت منها ومن نظراتها.. قلت ليها ما تستبعدي تكون جايه من العالم السفلي، قالت لي هي شافتك في العرس ولا وين؟ قلت ليها رسلتها حجه عشه الله يعشعش راسها دا شاحده ربي🤦♀🤦♀.. قلت ليها حجه عشه الواحده دي؟؟ هيي كان كدا معناها ولدها يا معرس يا بسكر مستحيل تجيب ليك انتي عريس ساي.. شلت صينية القهوة وطلعت امي قالت ليها بتبقي ليهم شنو.. المرا قالت ليها ام العريس حجه فوزيه بتعرفيها موووش؟ امي قالت ليها بري ما بعرفها قالت ليها المهم فوزيه دي مرت ابوهو لي ولد عم راجل اختي.. مخي عمل ايرووور رفعت عيوني وانا بحاول افهم لكن غلبني عديل، المرا يخوانا قعدت ترغي وتتكلم لحدي ما العشا اذن امي لمن زهجت بقت تمشي فيها بس وتهز راسها وانا ومعراج مره نتثآب بصوت عالي مره تقول لي منتصر بجي هسي يتعشى وينوم طوالي، دا كلوووو عشان نحسسها اننا دايرين ننوم لكن هي زاتا بتسكت عشان تسمعنا؟؟ ولاااا ولا🤷♀🤷♀🤷♀ كلنا قمنا صلينا الا هي معراج قالت لي دي مالا يختي ما قامت تصلي، قلت ليها يمكن ما عليها صلاه قالت لي يا بت دي شكلها زماان قطعت كيف يعني ما عليها صلاه.. امي قالت لينا انا خلاص نعست من اذان الصبح واقفه بيت المناسبه اول ما جيت قلت اخد لي غمدة جات خاشه بي وراي، معراج قالت ليها نسوي لينا شنو اكتر من كدا ؟؟ قلت ليهم بسسسس جاتني فكرة💡💡انتو امشو انا بلحقكم.. بعد ما صلينا ناس امي طلعو وانا دخلت الاوضه الفيها العداد ونزلت التأمين الانوار كلها طفت ابتسمت بمكر ولفيت يديني حولين راسي ربنا يحمينا ويحفظ لي افكاري المنقذة دي.. نزلت من الكرسي وطلعت برا امي بقت تقول اجي يا اخواني الكهرباء هدي شغاله بيت ناس سعاد مالهم قاطعنها لينا هي ياا الله دا كلام شنو ناس الكهرباء ديل ببالغو عديل والله، معراج بقت تقرص فيها بي تحت امي طبعا ما فهمت الحنك بعد معراج قرصتها حتى بقت تعاين لينا الاتنين، قلت ليها شكلها كدا كهربتنا انتهت، المرا اسمها روحيه قالت لينا انتو ما تنزلوها من بدري عاااد دا كلام.. عليك الله عان المرا العينه قوية دي بقيت بحدر ليها بي تحت تحت😒😒 معراج قالت لي الدبيب حق المره الفاتت منتصر قتلو؟؟ قلت ليها ياتو الاسود ولا الابيض، قالت لي بي صوت واطي في دبيب لونو ابيض يا المتخلفة🤦♀🤦♀.. قلت ليها انا البعرفني شنو الدبيب الوحيد الشفتو في حياتي ياها جارتنا صليحه.. روحيه قالت سجمي دبيب شنو كمان، امي قالت ليها بيتنا دا مليان دبايب كل ما الكهرباء تقطع بطلع واحد.. المرا رفعت رجلينها فوق وقالت سجمنا اخير لي ارفع كرعيني اها ما تميت ليك يا صفاء بس اول ما ولدي شاف الحرامي نطا ليك في رقبتو ووقع فيهو ضرب الا الجيران لمن سمعو كواريكو جو فكوهو غايتو ولدي دا الله يحفظو الحله كلها تتكلم بي رجولتو ومُروتو امي اتثآبت وقالت ليها ربنا يحفظو ليك🥱🥱.. هي يا الله دي مصيبة شنو المرا بدل ما تمشي رفعت رجلينها واتكت في السرير ، فجأة سمعنا صوت منتصر جا خاشي وهو بكورك مشتهى يا زفت انتي.. دخل العريشة وهو مولع فلاشو النور جا فيييي وش روحيه بقت تغمض في عيونها وتفتحها منتصر اول ما شافها نزل التلفون وقال بي احراج السلام عليكم وطوالي طلع.. امي قالت لينا قومن سون الاكل لي اخوكم.. قمنا دخلنا المطبخ معراج قالت لي دي شنو البلوه الوقعت فينا دي، قلت ليها نسوي شنو عاد قالت لي انا غايتو ماشه انوم بطريقتكم انتو وامي، قلت ليها انا زاتي بخش انوم امي زاتا بعد شويه حتلقيها نامت وديك لسه بتتكلم مع الضلام دا كمان ولا حتشوفها وحتقعد ترغي للصباح.. سوينا الغدا ووديتو لي منتصر قال لي دي منو المرا دي قلت ليهو بري جاتنا من بيت العرس، قال لي انا اول ما شفتها قلبي اشتغل دلوكه، قلت ليهو هوي يا منتصر دي مرا قدر امك احترم نفسك.. قال لي انتي حيوانه ولا شنو قصدي من شكلها دا كنت داير اقوم جاري.. فكيت الضحكه بأعلى صوت😹😹😹😹😹😹😹 ما سكت الا لمن لبعني في ظهري وقال لي انطمي سمعتي الحله كلها ضحكتك دي، الكهرباء دي قطعت متين كمان، قلت ليهو امنتها عشان تمشي لكن ابت تقوم تقول ملصقنها بصباع امير في السرير داك... مشيت من منتصر قبل ما اصل العريشة اسمع ليك صوت شخير واصل اخر الشارع قلت اجي امي من متين بتشخر ولا دي تكون معراج ياربي مشيت لقيت امي نامت والمرا زاتا نامت والشخير دا كان منها هي قلت اجي ما تكون بايته هناك كمان صحيتها قلت ليها حجه روحيه ياااا حجه هييي عوك.. بالله ما خليت حته ما ضربتها فيها عشان تقوم والمرا جثة بس ما حست بي اي شي فجأة فكت ليها شخرة كبييييرة انا من الخلعه لقيت نفسي جوا الاوضه 🏃♀🏃♀ معراج كانت بتتكلم بالتلفون قلت ليها دا ياتو فيهم، زحت التلفون من اضانها وقالت لي المرا لسه قاعده؟ قلت ليها ما سامعه الشخير دا كلو؟؟ نامت عديل.. قالت لي بايته معانا يعني؟ قلت ليها شكلها كدا ... ما ردت علي عيونها بقو منططين وراي فجأة قامت وقفت فوق السرير و قعدت تصرخ وااااااي دبيب.. قلت ليها يا بت بقول ليك نامت ساعه انا بصحي فيها ابت تقوم ما تتعبي نفسك ساي.. كوركت وقالت لي الدبيب وراك يا مشتهى واااااععععي منتصر الحقني، عاينت وراي القى ليك حاجه بتتلولو في الواطه ما فضل لي الا افكها في روحي واظني عملتها بقيت مبحلقة فيهو لمن استوعبت الموقف نطيت في السرير وقعدت اكورك واااااععععي يا حجه روحيه الله يطلع روحك😫😫😫😫
يتبع..
