-عيشك ي ست البنات
ابتسمت في وشي كالعادة اه مشوفتهاش لأني قدامها مبقدرش أرفع عيوني فيها، بحسها حاجه مقدسة كده، مينفعش استبيح حرمة جمالها بعيوني، بس حسيت ابتسامتها في ردها الهادي... تسلم ي فؤاد تعبينك معانا
-متقوليش كده ي دكتورة ده أنا عنيا للست والدتك ولحضرتك كمان ده أنتوا عيلة الغالي عن إذنك بقلم دعاء زينة
قولت الكلمتين دول ولفيت وشي مشيت علطول، وأنا من جوايا بردد ي ريت كل التعب يشبه تعبك ي نبض اهااااا اهااا علي اللي جرا لفؤاد علي إيدك، نفسي في نظرة رضا وقبول منك بس يوووه هي فين وأنا فين، بقي الدكتورة الصيدلانية نبض تبص ليا لمين لواحد صاحب فرن عيش بلدي، اه فرني ورثته عن أبويا الله يرحمه كبرته وبقي أكبر فرن عيش في المنطقة شغال معايا ناس كتير ونسأل الله عز وجل أنه يجعلنا سبب في رزق الناس، كلهم يحبوني ويتمنوا ليا الرضا ماسكين المنطقة والحتت البعيدة يوزعوا عليهم العيش، ورغم كده إلا أني بصر أنا اللي أودي لشارعهم كله العيش لأجل بس أسمع صوتها وأبدا يومي بيه...
اتنهدت بتعب من الحوار اللي بيدور في نفسي كل يوم بدل المرة مليون، الدكتورة بيحبها واحد معهوش غير الإعدادية...
اهااا ي قلبي...
روحت كملت شغلي في الفرن
*********** بقلم دعاء زينة
= ي نبض فؤاد جاب العيش
-اه ي ماما
=طب يلا ي حبيتي عشان الفطار جاهز قبل ما الفول يبرد
-لاااا ي ماما كله إلا فول عمي سعدة أنا جاية
روحت لماما علي السفرة جري وأنا بضحك، وبدافع عن الفول كأنه ابن أختي، وصلت وحضنت ماما وبوستها
=امتي بقي هتفرحي قلبي وتخليني اشيل عيالك
-يعني ي ماما مفيش حاجه هتفرحك غير دي
=ي بنتي والله ما فيه أحسن من فرحتي يوم ما أشيل عوضك أصلك هتفهمي إزاي بكرة تكبري و تعرفي معني كلامي
-ي ماما يعني كل اللي عملته ده مفرحكيش
_وانتي عملتي ايه ي عين ماما
بقلم دعاء زينة
-عملت ايه دخلت صيدلة واتخرجت منها بتقدير عالي، ومشغلة الصيدلية اللي بنيتها بتعبي بعد ما كانت مجرد محل بقالة، تقبلت العيشة في الحارة وحبيتها من حبك فيها أنتي وبابا رغم كرهي الشديد للأماكن الشعبية بتعامل ب أسلوب حلو مع ناس انا مش فاهمة طبيعة تفكيرهم أصلا لأجل حضرتك وبابا وفي الأخر تقولي عملتي ايه
خرج بابا في اللحظة دي وقاطع ماما ورد هو.... وكل اللي عملتيه ده أنتي المستفيد الوحيد منه، نجاحك اللي فرحانة بيه ده ليكي أنتي، أنتي اللي خدتي نصيب الأسد منه، أنتي اللي بيتقالك ي دكتورة مش احنا، الصيدلة اللي فتحتيها دي لولا دهب أمك والمحل اللي مكنش عجبك ده مكنش هيبقي ليها وجود، أما بقي تعاملك مع الناس اللي بتحسبي أنك من خلاله بتجبي علينا بيه فمحدش كسب منه غيرك بردو أنتي اللي كسبتي دعوة مريض لحقيته، فرحة طفل خففتي عنه ألمه ووجع حقنة شايفها المهلكة بالنسبة ليه، وفوق كل ده وده كسبتي ثقة وحب وتقدير واحترام من ناس أنتي شايفهم أقل منك لمجرد إن ظروفهم غير ظروفك لمجرد إني أنا وأمك وفرنا ليكي رغم قلة حيلتنا اللي محدش عرف يوفره لغيرك، رغم إن فيه كتير جدا منهم في مناصب قيادية وإدارية وتعليمية أعلي منك ومش هضرب ليكي امثلة عشان أنا عمري ما قارنتك بحد ي دكتورة
بقلم دعاء زينة
