#هلع
الحلقة الثامنة
//
//
خشت سما ومسكت تلفونها و حطت على رقم رسلان
ترددت قبل ما ترن بس ماكانش فيه غيره هوا اللي ممكن يحل القصة بدون ما يدير مشاكل
خذت نفس ورنت وسالمة جنبها ومازال مش فاهمه سما شن ح ادير
اول ما جا اسم سما ع تلفون رسلان اللي كان قاعد بجنب اسير فالسيارة كان مدرس موصله لحوشه
استغرب وحس انه في حاجه لانه مش عوايدها انها اترن ابدا خاصة فوقت متأخر
اسير >> شن فيه ؟ كنه حواجبك انقرنن
رسلان فتح باب السياره ونزل
رسلان>> الو ؟
سما >> اهلين بنحكي معاك حاجه عالسريع
رسلان>> سما احكي شن فيه ؟ كنك شن صار امك صارتلها حاجه؟ اختك فيها حاجه ؟ انتي فيك شي
سما >> اسمع بس ، خطيب سالمة بنت عمي قصدي اللي كان خطيبها جاي وهو مش واعي للشارع ويدزلها في مسجات ويهدد
رسلان>> كيف ما فهمتش شن فيه
سما >> حنفهمك بعدين بس توا نبيك تجي وتخليه يطلع من الشارع قبل ما يروح احمد ويشوفه لانه اكيد ح تصير مشكلة كبيرة بكل
رسلان >> خمس دقايق ونجي
سما >>رسلان افطن راه حسن مش واعي رد بالك
رسلان >> ماتخافيش
صكر ورد ركب للسياره وكان اسير فاتح الباب ويرجى فيه
رسلان>> صكر الباب طق معايا مشوار
اسير >> تي شن فيه ؟
رسلان>> اركب بس تو نفهمك فالطريق انا بروحي مش فاهم كويس
ركبو ومشو شور المنطقة لقو حسن فاقد و مقعمز فالسيارة و يهدد و داير دراما
اسير>> تي شن المسلسل الهندي هضا؟😂
رسلان>> مش فاهم شن القرف هضا "وخبط على قزاز السيارة "
حسن نزل القزاز >> انا من هنا مش متحرك!
اسير>> تي خليني نخربله وجه 😂كفين ينهن موضوعه
رسلان وخر اسير بيده >> مانبوش مشاكل الدنيا ليل وكلهم عارفينه كان يبي البنت " حط يده جوا السيارة فتح البطمه ونزل حسن من سوريته كره "
حسن بصوت عالي>> حول ام يدك را نكسرها لكي
اسير >> تي را نخربلك وجك اسكت بلا عياط
رسلان خانق حسن من سوريته ويدف في اسير بيده الاخرى>> تي مش ح نقعد انا اعقل منك عاد انت عارفني تكه وح نحطه تحت السياره ف ماتخليش عقلي يفصل
كر اسير حسن من رسلان وحطه في الكرسي الثاني وصكر الباب وحسن مازال يبربر ويحكي
اسير صكر القزاز عشان صوته ما يطلعش >> رن اعرفلنا وين يسكن خليني نركب نوصله الهله
