اخترتك حبيبى

2- زائر متطفل

بابا بقولك اى حط الطبق ع الرخامه مش هطلع ليه حاجه
بصلى بابا و رد عليا : لا الطبق لازم يطلع ليه انا بقولك اهو
- ماشى يا بابا حاضر بس ابقى خليه يغسل الطبق

اكلمكم شوية عن بابا ،،،
بابا كان شغال في الشرطه و انا صغيره و كان كل ما يسافر يوديني عند حد من قرايبي ، كان بيخاف عليا اقعد لوحدى ، لحد ما قرر انه مش هیودینی لحد تاني و عمل معاش مبكر و قرر يقعد و يربيني و الفلوس اللى بتيجى من المعاش و ايجار العماره نعيش منهم و كان بيكفى مصاريفنا و يفيض كتير اوى الحمد لله ، و لما قعد قرر انه يتعلم يعمل اكل و كل حاجه في البيت و محدش يجيب لينا اكل و نعمل كل حاجه لنفسنا ، كان كل يوم يعمل اكله و يجرب فيا ، مره تنفع و عشره لا، حاول كتير لحد ما بقى كل الناس مسمياه الشيف الشربينى

و كل ما حد يجي جديد يعمل ليه حلويات و يعزمه ع الغدا ، بيقول انه كدا بيحس براحه و بيرجع ايام زمان لما كانت الاطباق كلها تلف العماره ، طيب ما يرجعها بعيد عنى انا مش معترضه بس ليه انا اللى
اتدبس في كل دا يا ربى !
لازم اطلع و انزل و اغسل

وقفت قدام الباب متردده اخبط و لا لا ، هوا انا لو كلته و رجعته هيحصل حاجه ؟ لا مش هيحصل حاجه انا بقول كدة برضو ، و لا لا بلاش بابا ممكن يسأله أو يعرف طب اعمل اى دلوقت يارب ، انا هخبط و هوا يفتح و بعدها اديله الطبق و اجرى ع جوا تمام ؟ ، يبقى تمام كدة اوى دة اللى هعمله يارب
كنت لسه هخبط لقيته فتح الباب
- انت فتحت الباب ليه ؟
- نعم !
- انا لسه مخبطتش انت بوظت خطتی لیه ؟
- هوا انتي علطول ضایعه كدا و بتقولى كلام مش مناسب للموقف !
- قصدك ايه بقى ؟، لا قول قصدك ايه بالكلام دا كدا.. قول
- گنتی بتعيطى ليه يومها ؟
- خد الرز بلبن دا و اسكت.بابا باعته ليك
- مش عایزه باباکی یعرف ليه طيب !
- بقولك اى ابقى اغسل الطبق بدل ما بابا يكسره ع دماغك يلا سلام
- جريت بسرعه  دخلت الشقه و سندت ع الباب و حطيت ايدي ع قلبي و أنا باخد نفسى بسرعه كانى كنت فى سباق ، و بصيت عليه من العين السحريه عليه لقيته بص للطبق  و بعدها ابتسم و دخل شقته

- ما هو مينفعش ای حد كل من هب و دب يعرف حياتي ماشیه ازای ملوش السؤال كل واحد ليه حياته و اسراره و مواقف و ناس خاصه بيه لوحده مينفعش حد اتشارك معاه كل حاجه خاصه بيا أو المواقف اللى بتحصلى ، لا مكنش ليه الحق يسالنى سؤال زى دة و خاصه ان دى حياتى الخاصه بس فى حاجه محيرانى اشمعنا هو
خلتنى واقفه تايهه شوية و دخلت اوضتى و أنا لسه بفكر فيه و افكار عماله تتحرك و تجرى فى دماغى نا بين مليون سؤال ، لى دلوقت ؟! و اشمعنا فى الفترة دى بالذات ؟! بس ليه هوا اللي يشوف ضعفی ما بين الناس دى كلها ، بقالي كتير اوى لما بكون ماشيه و بعيط بتكون ناس مش عارفانی و احيانا مبيكونش فيه ناس اصلا ، ليه الشخص الوحيد اللي يشوف دموعى الصدفه توقعه عندنا و يجى يأجر شقه في عمارتنا احنا بالذات لى كدة ! يووووه بقه انا تعبت من التفكير فيه انا احسن حاجه امسك الموبيل شوية و اقلب فى النت يمكن التقى حاجه تشغلنى عن التفكير