Kissing In The Moonlight [Completed]

Chapter 1

အပြင်ဘက်မှာ မိုးက တစ်ဖြောက် နှစ်ဖြောက် ရွာကျနေဆဲ ဖြစ်ပါသည်။ ရာသီဥတုက ရုတ်တရက်ကြီး ပြောင်းလဲသွားသည်မို့ ထီးမယူလာမိသည့် ကျွန်တော့်အတွက် ဒုက္ခများလွန်းလှသည်။

ကျောပိုးအိတ်ကို ခေါင်းပေါ်မိုးပြီး ကားမှတ်တိုင်ကို ခပ်သုတ်သုတ် ပြေးရတော့၏။ သို့သော် ကားမှတ်တိုင်ရောက်ဖို့က နောက်ထပ် နှစ်လမ်းကျော်လောက် ပြေးရဦးမည်။

မှတ်ဉာဏ်ထဲ တရေးရေးပေါ်လာသည်က ဒီနားမှာ အမျိုးသား စာကြည့်တိုက် ရှိပါသည်။ အပြုံးတွေ တဖြည်းဖြည်းပေါ်လာရင်း ညာဘက်ခြမ်းကို ကွေ့ချိုးလိုက်တော့သည်။

မိုးက တဖြည်းဖြည်း ပိုသည်းလာမည့်ပုံ... ဒီအတိုင်းသာဆို အိမ်ရောက်လျှင် ကြွက်စုတ်ဘဝ ကူးတော့မည်။

စာကြည့်တိုက်ကို ရောက်တော့ ကျွန်တော့်လိုပဲ လူတချို့က မိုးခိုနေကြတာ ဖြစ်သည်။ ကျွန်တော့်လို မိုးလေဝသ သတင်း နားမထောင်သည့် လူတွေကတော့ ခပ်များများပါရယ်...

စာကြည့်တိုက်ကို ရောက်တုန်းလေး... မိုးလည်း ရွာနေတုန်းလေးမို့ စာကြည့်တိုက်ထဲ ဝင်လာခဲ့လိုက်သည်။

ဝင်လာတော့လည်း ဘယ်စာအုပ် ဖတ်ရမလဲ မစဉ်းစားတတ်... စာအုပ်တွေနဲ့ အကျွမ်းတဝင်ရှိလှသည် မဟုတ်လို့ အခက်တွေ့ရပြန်သည်။

ရေစက် တချို့ ရှိနေသည့် ဆံပင်တွေကို ခါထုတ်လိုက်ရင်း ဗီဒိုအမြင့်ကြီးတွေကြားထဲ လျှောက်သွားလိုက်ရင်းသာ အချိန်ကုန်ရတော့မည်။

Emma ဆိုသည့် အမည်‌ေလးကို ခေါင်းစဉ်အဖြစ် ရေးထားသည့် စာအုပ်လှလှလေးက မျက်လုံးထဲ ဝင်လာသည်။ စာအုပ် အမည်က မိန်းကလေးတစ်ယောက်၏ အမည် ဖြစ်နေသည်မို့ စူးစမ်းချင်စိတ်ဟာ တစ်ပြိုင်တည်း ရောက်လာပါ၏။

စာရေးသူက Jane Austen... နာမည်လည်း ကျွန်တော် မသိ။ ဘယ်သူမှန်းလည်း မသိပါဘူး။ စာရေးဆရာတွေနဲ့ အကျွမ်းတဝင်မရှိသည်မို့ ဒီအတိုင်း တစ်ခဏ အချိန်ဖြုန်းရန် ကောက်ဆွဲဖို့ ပြင်တော့ ထိုစာအုပ်လေးက တစ်ဘက်လူဆီ ပါသွားတော့သည်။

ဘေးချင်းယှဥ်လျက်မှာ ရှိနေသည့် အဲဒီလူ... ထိုလူ့ လက်ချောင်းတွေက ခပ်လှလှလေးတွေ ဖြစ်သည်။ ရှည်သွယ်နေပြီး ဖြူဖြူဖွေးဖွေးလေးတွေပါရယ်...