Kissing In The Moonlight [Completed]

Chapter 16

အခန်းထဲမှာ တိတ်တဆိတ်သာ ဖြစ်လို့ နေပါသည်။ ကိုရိန်းက မျက်နှာ အောက်ငိုက်ထားပြီး ကြမ်းပြင်ကိုသာ ကြည့်နေ၏။

ဆရာကတော့ အသီးထည့်ထားသည့် အိတ်ကို စားပွဲပေါ် တင်ပြီး အနားက ခုံမှာ ဝင်ထိုင်လိုက်သည်။

"ကလေးလေး သက်သာရဲ့လားလို့ လာကြည့်ရင်းနဲ့ အသီးတွေ ဝယ်လာခဲ့တာ... စွပ်ပြုတ်ဆိုင်ကို အရင်သွားပေမယ့် အဒေါ်က ကလေးလေး အခန်းကို သွားဖို့ လွှတ်လိုက်လို့လေ။ ကိုရိန်းလည်း ရောက်နေတယ် ပြောလို့"

ကိုရိန်းက ခေါင်းကို လေးလေးပင်ပင် ညိတ်ပြီး Taehyung ကို လှမ်းကြည့်သည်။

"မင်းတို့ အင်္ဂလိပ် ဆရာမက မွေးဖွားခွင့် ယူထားတာ ပြည့်တော့မယ်လို့ ကြားတယ်။ ဆောင်းဦးကုန်ရင်တော့ ပြည့်ပြီ ထင်ပါရဲ့..."

ကိုရိန်းက မျက်လုံးတွေ ဝိုင်းစက်သွားပြီး ဆရာ့ကို လှမ်းကြည့်ပါသည်။

"ဆရာက ဆက်ပြီး စာမသင်တော့ဘူးလား"

"အင်း... အဲ့လိုမျိုးပဲ ပြောရတော့မှာပေါ့။ ဆရာက ယာယီတာဝန်ကျရုံပဲမို့လေ ပြီးတော့ စစ်မှုထမ်းဖို့ တာဝန်လည်းကျလာခဲ့ပြီ။ ဆောင်းရောက်‌ရင်တော့ တာဝန်ထမ်းဆောင်ရတော့မယ်။ မင်းတို့ကို နှုတ်ဆက်ရဦးမယ်ပေါ့"

ဆရာက Taehyung ကို တစ်လှည့်၊ ကျွန်တော့်ကို တစ်လှည့် ကြည့်ပါသည်။ ဆရာ့ မျက်ဝန်းတွေမှာလည်း ညှိုးငယ်မှုတွေ ပြည့်လို့ နေ၏။

အိပ်ပျော်နေသည့် Taehyung ကို ပြန်ကြည့်မိတော့ ဒီအကြောင်းသာ သိလျှင် ဖြစ်ပျက်သွားမည့် အနေအထားကို မတွေးဝ‌ံ့ပါဘူး။

"စစ်မှုထမ်းပြီးရင် ဒီကျောင်းကို ပြန်လာဦးမှာလား ဆရာ... ကျွန်တော်တို့တော့ မရှိလောက်တော့ဘူး ထင်တယ်နော်"

"Ph.D. အတွက် ကျောင်းဆက်တက်ဖို့ ပြင်ဆင်ထားတယ် ကလေးရဲ့... အဲ့တာ ပြီးမှပဲ ကျောင်းဆရာ အလုပ်ကို ပြန်ဝင်ဖြစ်မယ် ထင်ပါရဲ့"

"ဒီလိုဆို ကျွန်တော်တို့ အင်္ဂလိပ်စာ သင်တန်းကရော"

"ဆရာ့ အသိ တစ်ယောက်ကို လွှဲပေးသွားမှာပါ။ သူကလည်း နာမည်ရပြီးသား အသင်အပြကောင်းသူ ‌တစ်ယောက်ပဲလေ"