حسين سلم على ابوي بي حراره كدا و قال ليهو م بحتاج ي عمي انت جاي تعبان.. وسلم علي.. سلمت عليهو بدون نفس .. وبيني و بين نفسي كنت مستغربه هو بعاين لي كدا مالو نسيت كلو كلو اني لابسه السلسل و الحلق...قلت بكون عشان طلعو لي الشاش شكلو بعاين للضربه م اشتغلت بي الموضوع كتيييير...
ابوي و حسين كل واحد كان بحلف علي التاني... انا طوالي مشيت على التك تك طلعت فوق بديت انزل في الحاجات في الواطه... كلها كانت حاجات خفيفه خفيفه.. قلت ليهم بدل تضيعو الزمن دخلو الحاجات النزلتها دي ... انا بنزل ليكم في الواطه و انتوو دخلو جوااا...
ابوي:اللهم لا اعتراض في حكمك ي بت انا مش قلت ليك. امشي البيت
حسين دا من شده م مستغرب م فتح خشمو زاتو عشان يتحشر... بعاين بعيونو بس...
محمد و منذر جوووو من الميدان لقو المنظر دا قدامهم... انا فوق التك تك بنزل ليهم في الحاجات ... و ابوي بقول لي اسلام انزلي انتي امشي البيت نادي ناس امجد... و حسين بعاين لينا الاتنين
محمد: اسلاااااام غايتوووو الشكل نهائي ما جاي مع الشخصيييه... طلعي حاجات االبنات دي... و اتفاهمي مع ابوك راجل لي رااااجل ...هنا يادوووب انا ركزت انووو حسين اصلا قايلني ولد...اتفاجئ لمن شاف السلسل و الحلق
منذر: الشكل بت والشخصيه عتاااالي....
حسين وابوي ديل قربو يقعو علي وشهم من الضحكك.. وانا قلبي ميييت بقيت بضحك. و قلت ليهم محمد و منذر والله اسي افلقكم بي الحاجات دي اعمل ليكم وحده زي دي و اشرت على الضربه الفي راسيييي...
منذر : اسي نمشي. وين يا محمد ماعندنا بيت ناس حبوبه زاتو نمشي ندسا فيهوووو...
ابوي : معقوله ي اسلام حسين لحدي اسي م جاااا من ناس حبوبتو ولا شنوو...
منذر : ما جا والله ي عمي الخوفه الدخلت فيهو تاني م طلعت..
محمد : عطلنا الزول دا ي جماعه ارح ارح ي منذر نزل الحاجات دي... ي عمي سوق اسلام و امشووو بيت نحن بننزلهم سرعه سرعه...
حسين هنا يادوووب انتبه انو جدجد انو حاجاتو جزو في الارض و جزو لسه م نزل ..م عارفاهو كان مركز مع كلامنا... ولا مصدوم لسه انو انا طلعت بت 😂
______________________________________________
امجد و احمد و امي كانو بنضفو في الفول في الحوش... اول م جينا داخلين انا وابوي..
امي:حلقققققق... و الله يحسين عملت الما قدرت اعملو انا...
امجد: وسلسل ي امي سلسل عدييييييل...
احمد و هو برفع ليهم يدي فوووق: و غوبيشه ي امي..
انا: غويشه اسمها غويشه م تلفح ساااااااي...
احمد: كلو وااااااحد ي زوووله.... ابوي انت البت دي مشيت بيها المستشفي ولا مشيت لي شيخ عمل ليها رقيه...
نحنا اتفقعنا بالضحك... قلت ليهم الزول م يعمل تغيييير اصلو في البيت دا... م سألتوني زاتو قالو لي شنو في المستشفى انا والله شكلي جدجد م بتكم..
امجد: تغيييير قدر داااا لكن ي اسلام كان تقصديها لينا م ممكن تلبسيهم كدا كلهم مره وحده.. عايزه تقتلي واحد فينا انا هسي هبطته عديييييل...
ابوي قال ليهم انتو م شفتو الحصل شنو لكن و بقا يحكي ليهم الدرامات الحصلت... احمد قال ليهووو والله يا ابوي كان اخير تقول ليهم دا ولدي و ترتاح و تريحنا ولا تلبسها حلق لا تعلق يافطه... اسي انا الخلعه الدخلت فيني تاني م حتطلع...
امي دموعها دي جرت بالضحك: ما تشتغلي بيهم ي بت... والله حلات الدنيا علييييك.. ديل حاقدين ساي
رديت ليها وانا بلعب بالحلق مكاواه لي احمد و امحد : اصلا م شغاله بيهم ي امي.. كان اتخلعو كان هبطوو انا تاني حلقي دا من اضاني م بمرق 😂
احمد: ابقي قدر كلامك دا... البسيهو بس ابقي بت و ساعدي في شغله البيت..
امجد: م بتساعد دي.. الليله برضو شردت من شغله البيت و مشت مع ابوي الدكان.. و نحن نضفنا البيت ... غايتو الحياه في البيت دا ماشه بالمقلوب.. نحن ننضف الفول و البيت .. و هي تمشي الدكان..
انا :امي عليك الله دايرين ناكل انا جبت ابوي بدري الليله عشان الاكل ختي لينا الاكل... الاولاد ديل صدعووو بي
احمد: والله صدع بيك الحلق دا عشان جديد عليك... م تختيها فيناااا
ابوي: البت دي خلوها عليكم الله ما عارفه تلقها من محمد و منذر ولا منكم..😂..و بقا يحكي ليهم... و هم يضحكوووو... بعد شويه قال ليهم انتو ود عوضيه صحي لحدي اسي م جااااا...
امجد : يجي كيف بتك قاطعه قلب الولد..بتتشاكل معاهوو صباح و مسااا..
انا: والله انا م بهبش لي زول الا يهبشني 😒
ابوي : حسين دا من هو صغير انتي معزباهوووو ارحميهووو حبه... امك كانت بتقول ليهو لمن تكبر بعرس ليك اسلام بتي عشان انت شاطر و بتسمع الكلام.. كان ببكي بدموعوو بقول ليهم م تعرسوها لي اسلام بتدقني..
انا : سبحان الله من صغير قلبو خفيف 😂.. بجي لكن بعد دا ي ابوي المدارس قربت م. حيقعد عند ناس حبوبتو للابد..
حسين اكبر مني بشهور .. صح كان خواف لكن كان شاطر شديد لمن شااااااذ... كان مفترض ننزل الاتنين سابع السنه دي ... لكن هو فطا سنه تانيه و سنه سادس.. و امتحن مع محمد السنه الفاتت... عكس حسن الكان م بحب القرايه و اسي حيعيد سادس تاني... صح هم تيمان لكن نهائي ما كان بتشابهووو...
انا مشيت خليت ناس بيتنا بتونسو... صليت و نمت بالتعب..
أنت تقرأ
الحبيتها بت رجال ❤️ الجزء الاول
Humorروايه سودانيه بقلمي براءه احمد ✍️ و انا صغيره بي حكم اني البت الوحيده وسط الاولاد في البيت... و البت الوحيده في الحله القدري كلهم اولاد... كنت غبشاء و منكوشه 24 ساعه امي دي تسرحني بي جاي اطلع الشارع يا اتمردغت في التراب و جيت شعري محشي حشي تراب
