الحبيتها بت رجال ❤️ الجزء الاول

الحبيتها بت رجال ❤️22والاخيره

حسين : انتي بت اصييله ي اسلام.. ❤️ حاسه نفسك كدا  مرتاحه..
قلت ليهووو و شديييييد كمان ❤️..
حسين كان يومي بجيني العصريه... كنت بنتظرووو بي فارغ الصبر و بحسب الساعات والدقايق والثواني عشان اشوفو .. وياخد ويدي معاي في الكلام... و ينصحني كم نصيحه.. كان بذكرني ابوي بي حنيتو وبشاشتووو و تعاملو اللطيف ... لحدي ما  قال لي  خلاص ي اسلام انتي بعد دا  تاني ما محتاجه لي...فقدتو شديد وكنت حاسه بحاجه ناقصه في يومي ...لكن حبه حبه قدرت اتأقلم مع الوضع
________________________________
يوم تخريييج امجد... كنت شايفه  الناس مبسوووووطه... وهي بتستلم شهاداتها مع اهلهااا... و حاسييين بالفخر... و ببكو من الفرح.... عيون الامهاات والابهات فيهم لمعه بتحكي قدر شنوو هم مبسوطين بي اولادهم...
عاينت لي امي.. كانت مبسوووطه شديد حرفيا اول مره اشوفها مبسوطه بالطريقه دي... ولمن سمعت اسم امجد حسين احمد... واستلمت معاهوو شهاتو... كميه الفرح الشفتها في عيونها كأنها استلمت الدنيا دي كلها في يدهاااا....
هنا انا قررت اني اعيشها الفرحه دي تاني... دي ابسط حاجه ممكن اقدمها ليها نجاحي.. ❤️
بعد التخريج بي كم يوم حددو عرس امجد و حلااا.... بعد شهرين... دخلنا في دوامه تجهيزات العرس... والاسواق.. وتغيير حاجات البيت.. في يوم مشيت لي حلااا عشان ماشين السوق مودينا حسين.... كنت ملاحظه لي حسين انووو بعاين لي بالمرايه... كان بعاين لي زي الكأنو عايز يقول حاجه بس متردد..وصلنا السوق وبعد لفينا وروحنا دي طلعت بي سبب حلا الما بتعجبها اي حاجه بي سهوووله امجد جانا هناك ساق حلا وريحنا من نقتها... قال لي حسين نحن ماشين نختار الغرفه للمره المليون و متأكد برضو م حتعجبها حاجه  ... سوق اسلام رجعهاااا البيت عليك الله....
انا وحسين قعدنا نضحك و حلا قعدت تنقنق.. حسين قال ليهو ربنا يكون عونك غايتووو... وطلعنا الاتنين...
اول م ركبنا العربيه قبل علي وقال لي بكل الحنيه الفي الدنيا .. قرنفله ❤️ حسين لمن فكاك المره الاولى و ضربتي راسك انا المسكتك... وهسي فكاك لي.. للمره التانيه.. رايك شنوو.. نخلي الفرحه فرحتين.. و نعمل حفله كبيييره انا وانتي.. وامجد.. وحلاااا.....
انا حسيت جسمي دا كلو مشا مووويه...وبقيت بعاين في كل مكان في العربيه الا عيونو... لاني عارفه اني ح افصل... اول بالاصح انا فصلت و بحاول اسيطر على روحي....
قلت ليهووو وانا بعاين بعيد : حسين انا عايزه اقرا لكن
حسين بحب : ومالو  اقري يا اسلام.. بالعكس انا فرحان شديد بالخبر دا... وحكون الداعم الاول ليك ... وصدقيني حكون حريص اعمل توازن بين قرايتك و بيتنا..
انا بتوتر : حسين انا اسي طالعه من علاقه... وعلاقه فاشله وشديد كمان... م مستعده ادخل في علاقه تانيه... عايزه انجح واقرا  واحس نفسي نافعه في حاجه ع الاقل...
حسين بعد قلت ليهو الكلام دا سكت.. وما قال لي حاجه تانيه... وصلني البيت و مشا بيتهم وهو ساكت....
ضربت لي حلا بتتكلم معاي وهي بتلوك ليها في حاجه : اهااا حتعملو عرسكم معانا في نفس اليوم ولا قبلينا ولا بعدينا....
انا بصدمه : ي حيوانه يعني دي حركه منكم؟
حلا وهي لسه بتلوك : اماااال اها انجزي اتفقتو على شنو..
انا : م اتفقنا ي حلا انا م عايزه اخش في. علاقه تانيه...
حلا وهي بتكورك : اقعدي اتعاوري كدا طيب... طول عمرك راسك قوي وحتكوني كدا للابد... وحسين انا م بخليهو ينتظرك بعرس ليهو بت خالتي طوالي وقفلت في وشي الخط...
انا لمن قالت لي  الكلام كلو ورا بعض... م فهمت شي... بعد مسافه استوعبت انوو حتعرس ليهو بت خالتووو.. طيب و انا..جاتني خوفه كدا... طوالي اتحركت مشيت ليهو بي عبايتي زاتا لسه م لحقت غيرت... لقيتو برش في الحوش  وواضح عليهو انو زهجااااان...
انا ببلاهه : مالك بترش زهجان؟ وقلت في نفسي دا اسي سؤال ليك ي اسلام دي شنوو العواره الانتي فيها دي
حسسين : لا يعني يا اسلام رفضاني قبل نص ساعه... واسي جايه تسأليني سؤالك دا انتي بتستهبلي صح؟
رديت ليهو وانا خجلانه : طيب ولو قلت ليك انا موافقه نخلي  الفرحه فرحتييين؟
حسين من الفرح جا علي عايز يضمني ... قلت ليهوو هش هش يلا زح كدا ولا كدا.. قايل نفسك وين انت وقعدت اضحك..
حسين قعد يضحك : قال لي قرنفلتي ❤️ والله زله بسس ما قاصد اعفي لي ... ورما الخرطوش في الارض.. قال لي انتي عارفه لو ما لحقتيني بي موافقتك دي كنت ماشي ارش الميدان زعله بس... ضحكت فيهووو وقلت ليهو اسي غيرت راي امشي رشووو ومشيت... كورك لي انتي قايله دخول الحمام زي خروجوووو... و جاني صوت ضحكتوو البجد كانت دوا بالنسبه... بشاشتو كانت السبب الاول في اني احبووو ❤️
_________________________________
فعلا عملنا العرس في يوم واااااحد.... و بقت الفرحه فرحتين ...انا وحلا كنا في الكوفير منتظرين ... امجد وحسين...جو داخلين و معاهم احمد... ومحمد ومنذر كانو برا..
امجد : اسي ياحمد انت المدخلك معانا شنوو...عرسان جاين يسوقو عروساتهم.. انت الحشرك شنو
احمد : عروسات شنووو... ديل والله بقوهم ليكم  عروسات بالغصب...وجا علينا قال لي دخلي يدك هنا.. بقيت مدخله يدي في يدو اليمين ... و حلا مدخله يدها في يدو الشمال ... قال لينا يلا ي عروسات وطلع بينا برا  ... خلا امجد و حسين ديل خشمهم ملح ملح.. قال لي محمد ومنذر افتحو العربات... ودخلنا اي وحده في عربيه... وقعد يضحك قال ليهم حركات الكفار دي م بتنفع معانا.... نحن ناس عزابه...
محمد ومنذر ديل م عرفو يوقفو الضحك من وين....
امجد بقا ينبز فيهووو... وحسين بس بحمر ليهو غلبوو اليقولو...
احمد وهو ميت بالضحك : امجد انت زول اتقدمت وانت مكوع.. حركه زي دي ما مفترض تزعلك...وحسين بتحمر لي كدا مالك دي اختي... والله اسي اسوقها البيت... هي زاتا من حسين لي حسين لي حسين... تغير ماف كلوكلو
محمد ومنذر... بقو ماسكين امجد وحسين من احمد..... ونحن في العربيه صوتنا واصل برا من الضحك....
خلص اليوم.... بعد هجيج ورقييييص...حتيناهووو م خلينا شي... احمد يشيل ويرفع في البلاغات.... م فضل الا يشيل المايك ويغني هووو.. 😂
_______________________________
محمد عرس بعدينا بشهرييين.... ومنذر بعدنا بي سنه....وانا نزلت الجامعه علم نفس.. بسبب حسين الحكا لي عن المجال كتييير وحببني فيهووو....
__________________________
م حبيت اتجرجر في المحاكم كتيير  ... عشان كدا سحبت كل القضايا الكنت رافعاها على...عوضيه وحسن... والقرار دا الزول الوحيد الكان داعمني فيهووو حسيين... اخواني زعلو مني كم يوم.. لكن في النهايه اقتنعووو... انو خلاص  كفايه الفتره الاتسجنوهااا دي + ربنا اخد لي حقي منهم تالت و متلت... عوضيه جنت بي سبب بعاد اولادها منها الفتره دي... وحسن بقا عميان... وحسين ساقهم الاتنين سافر بيهم ماليزياااا....
وبعد ايام بسيطه من سفرهم  سمعنا بي عوضيه... الجات واقعه من الطابق التالت و اتوفت طوالي
__________________________
بعد سبعه سنه... انا اتخرجت... واشتغلت مع حسين في نفس العياده... وبقيت بعمل حملات توعيه في رياض الاطفال.... للامهات واطفالهم... وكنت مركزه شديد في موضوع التدخل الاسري في مشاكل الاطفال...  لازم يكون تدخل ايجابي... من غير م يولد حقد... و كراهيه بين الطفلين...بالعكس يولد محبه... يفهموهم انهم اخوان واي مشكله ليها حل... ويبعدو عن المقارنه ... لانو حرفيا الطفل لو قارنتو بغيرو تلقائيا حيتولد جواهوو كره كبير تجاهو...كنت بتكلم كتييير عن كيف تدعم طفلك و تكتشف الحاجات الحلوه فيهو... و توريها ليهو عشان يحب نفسووو اكتر... بدل تقارنو بغيرو...حاول حببو  في نفسووو عشان يقدر يبدع... و يقدم ليك ولي نفسو حاجه تكون انت وهو الاتنين فخورين بيها ❤️
كتييير كانو بجوني في العياده بنات.... تعبانين نفسيا من اختياراتهم الغلط.... كنت بحكي ليهم قصتي.... وبقول ليهم ما تعايني لي انك اخترتي غلط... وتقعدي تلومي في نفسك... لا حاولي... شوفي الغلط وين... عشان م تغلطي تاني.. ودي كلها في النهايه... اختبارات من ربنا... وماف حاجه بتحصل في حياتك الا لي حكمه... فإنتي شوفي الحكمه ويين.. بدل تقعدي تقفلي على نفسك وتلوميهااا ... واهم شي اهم شي خليك قريبه وواثقه في ربنا ❤️ وحبي نفسك.. حبي نفسك.. حبي نفسسك. 😂❤️
يوم وانا في المطبخ... حسين جاني قال لي ي اسلام ما معقوله التشيرت دا انا كنت طالع بيهو... قلت ليهو جيت امبارح تعبانه  لقيتو قدامي لبستو..
علي ولدنا الصغير : ياماما انتي تل مله.. تل مله (كل مره كل مره) بتلبسي هدوم بابا لي م عندك هدووم.. انا وحسين قعدنا نضحك
حسين وهو بضحك  : والله يابابا الواحد بقا حاسي انو معرس واحد صحبو
وانا بحاكي في علي وبضحك   :  بعدين تعال قول لي دلنفله (قرنفله) عايز شوكلاته كويس ... م بتعرفو قرنفله الا وقت المصالح انت وابوك..
حسين قعد يضحك و شال علي... قال ليهو يلا ي بطل نجهز.. عشان قرنفله م تزعل مننا... بقيت اضحك بعاين ليهم بكل  بحب لحدي م طلعو من المطبخ... حرفيا ربنا عوضني بيهم... حسين سمى علي على ابوهو الله يرحمووو...
بعد شويه جوني طالعين.. حسين باسني في راسي... و علي حاكاا ابوهوو وباسني بنفس الطريقه ... ومشينا على بيتنا...
فتح لينا الباب احمد ولد امجد... و جراااا كورك لي الباقين قال ليهم ناس علي و عمتو اسلام جووو....جو كلهم جو جارين عشان يسلموو علينا... اسلام بت منذر.... و مي  بت محمد... واحمد اخوي كان شايل حسين ولد امجد الصغير ... سلمت على امي و قبل اسلم علي احمد اخوي قلت ليه احمد خلي علي معاك... بنجي نسوقو العصر... ماشين العياده...
احمد وهو بكورك : كل مره تجو تفكوووو فيني.... شفعكم ديل زي الفيران ينتشرو في البيت  يقعدوو يقرمووو... ويخرمووو.... و يبوظو في الحاجات... وكل زول يمشي شغلووو.... بليل انا م اقدر اشتغل حاجه بالتعب... داده انا
امي وهي بتضحك : قصيتهم الله يقصك ي احمد قول ماشاء الله..
انا وحسين جرينا ونحن بنضحك خليناهو هايج....
__________________________
العصر اتلمينا كلنا في حوشنا كالعاده.... احمد كان شايل حسين الصغير... اداهو لي حلا وقال ليها استلمي بالله... وانتو اشر لينا انا وحسين و امجد و محمد ومنذر و نسوانهم الاتنين .... اي زول يممشي يستلم شافعو من الغرفه ديك... وتاني بالله م تجيبوهم لي انا تعبت.. خلو لي باقي حيل اربي بيهو اولادي م ممكن.....
امجد مشا فتح ليهم الباب... جونا جارين سلموو عليناااا....
مي طوالي اشتكت لي ابوها : يا بابا علي  بسيل(بشيل) مني اي حاجه اسيلها ي بابا... اللعبات تتيره(كتيره) لكن هو بس بحب يلعب بي اللعبه العندي...
محمد وهو بضحك : ما جايبو من بعيد ي مي... امو لحدي اسي بتحب الحاجه الفي يدي بس... لكن نحن عشان بنحبهم بنديها ليهم صح..
مي وهي بتضحك : صححح ي بابا... ومشت لي علي كان شايله لعبه في يدهااا ادتها ليهووو... قالت ليهو هاك عشان بحبك.
احمد وهو بضحك : اسلام الحقي ولدك البت دي مشركه ليهووو...
حسين : م تلعبو بي مشاعر اولاد الناس ي محمد لم بتك من ولدي... 😂
قاطعهم احمد ولد امجد اكبر من علي ... كان نسخه مصغره من احمد اخوي ....
قال لي الشفع عاينو عاينووو... عمتو اسلام عندها الحرف العلمنا ليهو عمو احمد قبيل...في راسا...
علي ولدي : اي والله ماما عندها حرف الحاء في راسا ...الشفع بقو بعاينو لي مبهورييييين وبقولو عمو احمد.. عمو احمد دا مش الحرف العلمتنا ليهو قبيل .... والباقييييين ميتييييين بالضحكككك....
احمد وهو دموعو عشره عشره من الضحك : عارفين جدو كان بقول ليها شنوو
الشفع كلهم بي صوت واحد : اهاااااااااا
امجد : بقول ليها (الحاء) دي  ماركه مسجله بت حسين... و الفلقك حسيين
حسين وهو بضحك : قصدك بت حسييين ومرت حسيين ❤️
كلهم بقووو يكوركووووو... و يصفرووووو... والضحك والونسه بقت موضوع ثابت كل عصر في   حوش بيتنا الحمد لله ❤️
تمت❤️
________________
وفي النهايه بقول ليكم ربنا بشيل منك حاجه وبديك حاجه اعظم منهاااا... فركزو مع الحاجه العندكم... لانها م عند غيركم... وما تيأسوووو من رحمه ربنا...م تيأسو من رحمه ربنا الف مره ❤️... واي شي بيحصل  لي خيرررر.... وما بعد االضيق الا الفرج ❤️
___________