الحبيتها بت رجال ❤️ الجزء الاول

الحبيتها بت رجال ❤️17

حلا عاينت لي شديد وقالت لي : طيب ولو حسين اخوووي اتقدم ليك اسي وقال دايرك... برضووو...
انا هنا اتوترت.. والكلام ابا يطلع من خشمي .. و بعاين فوق. و تحت.. وما عرفت اقول ليها شنووو...جاني نفس الاحساس الحسيتو لمن قالو لي حسين ود عوضيه دايرك.. معقوله بحبهم الاتنين؟..جد انا ما عارفه انا عايزه شنووو...
طوالي حلا قاطعتني قالت لي شفتي ي اسلام لسانك اتربط...انتي م بتحبي حسين كشخص.. انتي بتحبي اسمووو ي اسلام... اسي انا لو جبت ليك واحد من الشارع وقلت ليك دا اسموو حسين حتحبيهووو بس عشان اسمو حسين... واثبتي كلامي دا اسي لمن قلت ليك لو حسين اخوي دايرك...

.... بكيييت ضمتني عليهااا.. قالت لي انا اكتر زول فاهمك وحاسي بيك  يا اسلام..قايلاني م عارفاك بتحضري الجمعيه لي.. ولا قايلاني م عارفاك بتسألي من اخوي بستمرار لي... اسلام. حسين ود عوضيه م حيبقا ليك ابوك...ولا حسين اخوي حيبقا ليك ابوووك...ولا اي حسين تاني حيبقا ليك ابوك... افهمي ي اسلام...انتي ما بتحبي ولا واحد فيهم انتي شايفه فيهم ابوووك بسسس...
قلت ليها وانا بشهق بالبكا.. حلا انا كفايه علي اسم حسين.. احبو م احبو دي م فارقه معاي.. انا محتاجه لي حسين عشان حياتي تمشي.. انتي م شايفه حياتي واقفه... انا من البيت م بطلع ي حلااا...
حلا بقت تبكي معاي.. وقالت اسلام انتي لا محتاجه لي حسين.. لا محتاجه لي امك ولا لي  امجد ولا لي احمد ولا لي انا زاتي.. اسلام انتي محتاجه دكتور نفسي انتي لحدي اسي م قادره تتجاوزي موت عمي حسين... صاحب حسين الرسل ليهو اقامه تتزكريهووو.. فتح ليهو عياده.. قاطعتها وقلت ليها حلا انا ما مجنونه... قالت لي منو القال انتي مجنونه ي اسلام... قلت ليها يا حلا انا دايره انووم عليك الله م تدخلي لي كلام زي دا في راسي وغمضته عيوني ورقدته ... عاينت بي قله حيله وسكتت.. غطتني و طفت النور وطلعت...
حلا كلامهااا منطقي... لكن انا الما عايزه اقتنع بيهووو.. انا بالجد ما فارق معاي لا خوها لا ود عوضيه انا بحب كونو اساميهم الاتنين  حسين.. وحابه الحاجه  دي شديد كمان❤️..
بقيت اقنع في نفسي  يعني شنو لو شايفه في حسين ابوي مش ح اكون مبسوووطه..مش ح اسمع اسم ابوي و احسو عايش معانا تاني... م مشكله لو دا مرض م عاايزه اتعالج اهم شي انا مبسوطه ...قمت صليت العشاء ونمت و انا مقرره اني بكره ح اديهم موافقتي...
___________________________________________
حلا كان واضح عليها انها باكيه ... مشت لي احمد قالت ليهو قدمني... قال ليها وهوو خاتي التلفون في وشووو انا م قادر امشي لي امجد في المطبخ... قالت ليهو انت بتقدر للفصاحه بس ومشت خلتووو...
مشت وهي بتكورك يا امجد.. ياا امجد لمن دخلت المطبخ  لقتو بعمل في الشاي قال ليها نعم ي حلا ... قالت ليهو خلاص دايره تطلع كدا.. قال ليها اقيفي اقيفي مالك.. انتي كنتي بتبكي؟ حلا طوالي انفجرت بالبكا اصلا كانت دايره ليهاا سبب الضغط كتر عليهااا.. حلا بالجد  تعبانه بين بيتنا وبيتهم لكن عمرها م اشتكت..
امجد جرا ليها الكرسي وقعدهاااا... وبقا واقف قدامها ومتكل بي ضهرو  على الحيطه ومربع يدينو  وبعاين ليهااا.. انتظرهااا لحدي م هدت...
امجد : كدا خلاص كملتي البكاااا
حلا هزت راسها  بي اييي...
امجد :  اول حاجه المبكيك شنووو... و تاني حاجه جيتي عشان تقولي لي شنوو..
حلا  ببكا : الاتنين اجابتهم وحده...
امجد وهو مستغرب : كيف يعنيي....
حلا وهي بتشهق بين كل كلمه والتانيه : مشيت.. لي.. احمد عشان يقدمني... قال.. م قادر... جيتك.. انت... عشان اقول... ليك... قدمني.. لقيتك.. م فاضي..
امجد دا انفقع بالضحكك : حلا انتي جاده؟  بتبكي عشان كدااا...  امبارح م عامله فيها مرااااا ومشيتي براك...
حلا سكتت وبقت تتمتم...
امجد بقا يضحك زياده : كل ما تتزنقي في الكلام  اقعدي تمتمي كويس... ومشا جاب ليهااا كبايه شاي... واداها بسكويت.. قال ليها اشربي الشاي دا  وروقي حبه... عشان م تمشي البيت  باكيه..
حلا : وانت ما داير شاي؟
امجد : بشرب مع امي بعدين... ومشا جاب ليهو بسكويت تاني.... لكن بغمس معاك  البسكويت  في كبايتك دي زاتا عشان م تشربي براك...امجد ثابت بشرب الشاي مع امي زي ما ابوي كان بعمل.. كان بحاول يسد فرقه ابوي بي كل الطرق  و ما يحسسنا بالفرق...
حلا بقت تضحك وقامت فتحت البسكويتين ختتهم في صحن واحد... و جرت ليهو كرسي وقالت : اقعد ولا حتشرب وانت واقف..
امجد ضحك وقعد  : ختيتي بسكويتي مع حقك.. كدا انا م بتظلم لكن .. حتقومي بيهو كلو براك...
حلا شالت كبايتهااا : بتتظلم صح شوف ليك شاي تغمس فيهووو....
امجد بضحك : خلاص خلاص بهظر والله.. وبقو يشربو في الشاي..وامجد كل مره بحسب ليها اكلت كم بسكويته... ويضحكو... امجد عندو مقدره رهيبه في انو يطلع اي زول من موجه زعلو في ثانيتين...
احمد جاهم طاير.. عاين ليهم كدااا مسافه ... وبقا يفتح دواليب المطبخ.. ويحسب واحد.. اتنين.. تلاته.. اربعه.. خمسه.. ومواصل حساب..
حلا: احمد بتحسب في شنووو انت 
احمد : في الكبابي... قلت يمكن حصلت ازمه كبابي في بيتنا وانا ما عارف ... لكن انتي عارفه يمكن الازمه ازمه شاي.. الزول م يستعجل... ومشااا علي البراد لقاهو مليان قال ليهم .. طلعت م ازمه شااي برضووو... لكن يمكن في فرق في الطعم كدي نجرب معاكم ... وجراااا ليهو كرسي وقعد معاهم قال ليهم جدجد طلع الفرق في الطعم وقعد يضحك... وبي ضحكووو وحركاتو  امجد وحلا  برضو بقوو يضحكووو..
امي بي صوت الضحك جات داخله... لقتهم التلاته عاملين دائره... قدامهم كبايه شاي وحده و بغمسو فيها التلاته البسكويت...احمد قال ليهااا جري  ليك كرسي وتعالي غمسي معانا ي حجه... ضربت يدينهااا بي بعض وقالت جنيتو وحات الله جنيتوو.. حتى حلا العاقله فيكم جننتوها..وطلعتتت وهي بتضحك...
امجد وهو ميت بالضحك : ارح ارح ي العاقله اقدمك البيت...
_________________________________________
الصباحيه صحيت ... م لقيت زوول.. امي عند الجيران.. امجد واحمد في الجامعه....بقيت قاعده براي اطلع وامرق شغله البيت وخلصت.. ماف موضوع... طوالي مخي اشتغل...اسي لو كان ابوي قاعد م كان دا كلو حيحصل... وافكار تمشي وافكار تجي... قلت لي نفسي ابوي ماف  لكن  حسيين في... ودخلت في دوامه بتاعت خيالات... لحدي م نمت تاني...
صحتني امي لي الفطور... فطرنا ودخلنا طوالي في برنامج الغدا..م لقيت فرصه زاتو عشان  اكلمها بي  موافقتي...
_________________________________________
امجد واحمد جوو و معاهم محمد ومنذر... لبست توبي.. ومشيت قلت ليهم واحد فيكم يجي يشيل صينيه الغدا...
محمد : وعليكم السلام.. نحن كويسين الحمد لله..
منذر : اسلام نحن بايتين معاك.. اسألي مننا قولي لينا مطولين مالكم..
انا : والله بسأل منكم احمد وامجد طوالي... وبعدين دا شنووو اللوم دا لمن شكيت انا في الصالون.. ولا جمعيه نسوان الحله..
احمد  ماااات بالضحكك وقال لي حلوه منك والله...
امجد بضحك: دا الفالح فيهووو قوم قوم امشي جيب الغدا اعمل ليك شغله نافعه
اما محمد ومنذر كانو بس بعاينوو لي.. اول مره كنت اشوف منذر ومحمد جادين بالطريقه دي... في موقف زي دا كان بضحكوو اول ناس...
منذر  : انتي عارفه نحن جاين الليله لي ي اسلام
انا : اهاااا
منذر : عشان نقول ليك حسييين لااااا...
محمد : عوضيه حتكرهك حياتك... وانتي م بتحبي الحقاره م حتسكتي... وانتي وهي حتقضوها مشاكل... اسلام ابعدي عن الشر وغنيلووو...
انا بكل بروود الدنيا : انا فكرت فيهااا من كل الجوانب وانا موافقه... انا ح اعرس حسين ما ح اعرس امووو...
محمد : جنيتي انتي ي اسلام دا عرس.. م لعب... شفع
منذر : انتي واعيه للبتقولي فيهوو دااا.. اسلام انتي حتجيبي.. اولاد... عوضيه كان موتي م حتتقبلك كمرت ولد .. اولادك زنبهم شنو يفتحو في يلقو نفسهم عايشين... مشاكل بين امهم و حبوبتهم...
انا كلامهم دا كلو م كنت واعيه بيهو ولا عايزاهو يخش راسي... في راسي كان في شي واحد... حسين حيعوضني ابوي الفاقداهو... في راسي لا كان في اولاد لا عوضيه لا غيرهاااا ماف غير حسيين وبس ...
اكتفيت بي اني انهي النقاش واقول ليهم : حتعرسوهوو انتو ولا  انا...
محمد ومنذر مرقو زعلانيين غدا م اتغدووو...
_______________________________________________
امجد واحمد وامي... حاولو معاي ميه مره... اني اغير راييي ابيييت.. كنت بقابلهم بس بالرفض ... وحلا تاني م جاتني من سمعت اني وافقت...
امجد استسلم للامر الواقع ضرب لي حسين قال ليهووو نحن موافقين جيب اهلك وتعال... حسين قال ليهووو.. الجمعه الجايه بجيب الرجال وبجي ...