الحبيتها بت رجال ❤️ الجزء الاول

الحبيتها بت رجال❤️5

تاني يوم كان مفترض امشي انضف الجرح في المستشفي..و ما حيكون عندي زمن الصباح اعرف شمار امجد.. وانا الشمار صراحه حارقني شديد اكتر من الزعله زاتو... لازم  اعرفو في باقي الليل دا مستحيل ابيتووو...امجد اختصر علي الطريق لما جاني و قال لي اسلام.. ابيت ارد عليهو كلو كلو عامله فيها زعلانه..
امجد:اسلام اسي ازعل انا ولا انتي.. انتي الولد جااا عليك كدا اشرتي ليهو علي قلت ليهووو تخلي الخنقك واقف هناك..دا م حريش عديل اسي..
اسلام:  امجد م تهظر معاي انا جاده
امجد:اسي انتي شايفاني غلطان يعني
انا: اييييييي تمشي ليهو كلمتووو و تشاكلني قدامووو  دا م غلط  و دموعي دي جرت كنت زعلانه شديد من امجد لانو حسيت الولد كدا انتصر علي...
امجد: انا م مشيت ليهو كلمتووو... انا عملت الشايفووو صح وهو لو م كان قال لي... انا كنت ح اقول ليك امشي البيت اسي لو حاجه وقعت في راسك؟ ...انا اتكلمت معاك براحه ...انتي الشايفاني شاكلتك... اسلام انتي بس اللهم عايزه تطلعيني غلطان و خلاص
انا بقيت بشهق بالبكا: هسي انت لسه قاعد تشاكل فيني ي امجد
امجد جا مسح لي دموعي و قال لي عايني ي اسلام كان بكيتي كان سكتي انا حاجه شايف فيها مصلحتك بعملها...حتى لو بتزعلك... امشي غسلي وشك دا و تعالي الله يقرفك مخاخيتك حدها الارض...لمن قال لي كدا قعدت اضحك و دنقرت فيهو بي حركه سريعه نضفت نخرتي بالتشيرت اللابسو و جريت قلت ليهو كدا اتسديت حقييييي ....امجد و احمد كانو واعييين شديد مقارنه بي اعمارهم.... لانو ابوي من  هم صغااار بتكلم و بتعامل  معاهم كأنهم رجال اعمارهم فوق ال30.. مديهم مساحتهمم و بخليهم يقولو رايهم بعداك يوريهم الصااااح من الغلط❤️..و انا كنت العوقه الوحيده في البيت 😂
غسلت وشي وقلت خلاص امشي  لي احمد لانو امجد بعد حركتي دي م حيقول لي الشمار... لقيت امجد  غير فنيلتو و قاااااااعد  مع احمد.. قلت ليهووو بسم الله...
احمد: خلاص كملتي كلووو بقيتي قرفانه كمان.. شكلو امجد حكا ليهو..
وانا بضحك :معليش ي امجد والله معليش..متين لحقت حكيت ليهووو...اسي يا احمد لو كان خلاني  اعتل معاكم دا كلو م كان حصل ليهو
امجد:معليش بتأكل عيش؟..
احمد: قبيل وقت النضافه م كنتي مفلووقه و راسك فاتح وعايزه تنومي .. وقت العتاله بقيتي شديده..
انا:خلاص ي امجد بغسلو ليك مش التشيرت دا.. لكن توريني الشمار شنووو..
امجد و احمد بقوووو يضحكوووو و كل واحد بقول لي التاني عليك الله خليني اوريها انا...و يقفل للتاني خشموووو عشان م يتكلم ... وانا الشمار حارقني... قالو خلاص حجره ورقه مقص.... فاز امجد... داير يتكلم كدا احمد سبقوووو بي سرعه  قال لي: ولد الجيران الجداد اسموووو حسييييين برضووووو.. ووقع من الضحك..
امجد وهو زعلان: والله انت مرراااا خلاص.. اصلو دي م حركات رجال..وجا علييهو داير يخبتو..
احمد جرا و بصوت نسواني بحتت قال ليهو:اجييي ياااااا امجد من متين بترفع يدك على مرااااا.. امجد دا قرب يقع من الضحك..
انا : واالله م ممكن عديييييل كدااااا يااااخ...يعني انا حسين داااك عرفت فيهوووو شنووو لمن بقووو لي اتنين كل واحد في ناصيه.. اسي دا شماركم البتتعاورو عشانو من قبيل ... طممتو لي بطني ماشه انوم...  مشيت وانا اخلاقي دي في نخرتي... خليتهم مره بتناقرووو عشان احمد وراني قبليهو ... و مره يضحكووو فيني...
_______________________________________________
صحتني امي الصباح قالت لي قومي صلي و اجهزي عشان تطلعي مع ابوك المستشفى... و انا داخله الحمام امجد رمى لي الفنيله حقتو في وشي قال لي غسلي قرفك دا معاك و مشا.. تقريبا هو صحا بدري مخصوص عشان يعمل الحركه دي بس لانو رجع نام تاني...
صليت.. و غسلت تشيرت احمد.. و جهزت بقيت منتظره ابوي عشان نشرب الشاي سوا.. بعد شويه ابوي جا قال لي ارح..
اسلام: والشاي انا منتظراك ؟
ابوي: شربت الشاي مع نور البيت ❤️
اسلام:و انا لمبه محروقه صاح كويس ي ابوي...
ابوي بقا يضحك: خلاص م تزعلي بشرب معاك تاني
انا:م دايره شاي انا خليتو...
ابوي: بسوقك معاي الدكان الليله... انا طوالي اتشعبطه في رقبتو قلت ليهوووو قووول والللللللللله..
ابووي: بشرط تشربي الشاي معاي.... انا طوالي كبيت الشاي لي و ليهو ..و بقيت اشرب مستعجله عشان نطلع  قربت اخنق...
و نحن طالعين ابوي قال لي امي انا سايق معاي اسلام الدكان بعد المستشفى يلا لا اله الا الله
امي قالت ليهو محمد رسووول الله.. غايتو ي حسيين انا اصلح فيها بي جاي انت تجي تخربها بي جاي.. و بقت تستغفر.. ابوي ضضحك و قال ليها اخر مره صح ي اسلام... قلت ليهووو اااااااااااااي بي صوت عالي تقول مغالطني و الابتسامه دي من الضرس للضرس.. و طلعنا
________________________________________________
ابوي كان ماسكني من يدي و ماشين... فجأه وقفت في نهايه الشارع و بقيت بعاين لي بيت ناس حسيين.. و اقبل بالجهه التاتيه.. اعاين لي بيت ناس حسين التاني.. ابوي قال لي مالك ي بت م حنلقا مواصلات بالطريقه دي ..
وانا بأشر علي البيوت  قلت ليهو: هنا في حسييين.. و هنا في حسييين
رد لي ابوي و هو بأشر على روحو و بضحك: و هنا في حسييين برضو
انا:م دي المشكله هنا ي ابوي لازم نغير ليك اسمك..انت م بتشبهم واحد قلبو خفيف  والتاني حشري..
ابوي بضحك: ارح ي اسلاااااام ارح قدامي..
مشينا المستشفي نضفو لي الجرح بعد كواريييييك و قومه و قعده... و طلعو لي الشاش قالو عشان الجرح ينشف و الخيت بقع براهو تاني ماف داعي اجي.. طلعنا و مشينا على الدكان..
_______________________________________________
ابوي فتح الدكان..كان بسيط شديد فيهو زنكيه براا خاتي فيها تلاجه...حولين الدكان كلها بيوت ببنو فيها  منطقه كدا كلها عمال بجو  يشيلو  منو حاجات الفطور.. والبيوت الساكنين فيها اسر بالعدد ...
فتحت التلاجه شلت لي بارد و كيكه.. ابوي قال لي خلاص عايزه تخسريني...قعدت اضحك قلت ليهو انت زاتك دقست جبتني معاك...
جا  راجل كدا  كبيير في السن قال ليهووو حسين مالك الليله متأخر ي ولدي دخلت فينا جوعه الليله .. عليك الله داير لي 6 بيضات.. م عملت الفول الليله شكلك..
ابوي: ظروف والله يا عمي مختار..الليله اتأخرت م شديت الفول معليش..
عم مختار: الله يفتحها عليك ي ولدي ماشاء الله دا ولدك.. م قايلك عندك ولد غير احمد و امجد...
ابوي بي ضحك: دي بتي ي عم مختار الاكبر من احمد..
عم مختار: و مالك حالقلهاا كدا ي ولدي...
انا لمن لقيت الموضوع حيطول شلت لي كيس ختيت فيهووو 6  بيضات و قلت ليهووو عم مختار هاك هاك البيض...شكلك جعااااان ي عمييي... قال لي اي والله الله يحفظك ي بتي... حاسب ابوي وانا مشيت سندتو  عشان ينزل العتبه  ... لمن جيت ابوي قال لي خارجتي الراجل سرعه سرعه 😂 دا الغفير بتاع.العماره دييك و اشر لي على العماره .. نحن في نعمه ي اسلام والله...قلت ليهو الحمد لله و بقيت بعاين ليهو وهو ماشي يالله يالله و بحمد في ربنا...
عيني وقعت في مراا داخله الدكان...طوالي قلت لي ابوي م ناقصه نظريات كفايه علي نسوان الحله و مرقت براااا وقفت جنب الدكان و كملت باردي... لمن المرا طلعت دخلت اخت القزازه في الصندووق... اسمع ليك ولد بقووول لي.. االشبلي خت معاك القزازتين ديييل عليك الله... و كورك لي ابوي عم حسيييين الشبلي دا تبعك... قال لي اي دي بتي.... عاين لي كدااااا و قال لي اسمك منو ي حلوه.. قلت ليهو بي اخر نفس اسلااااااام ... قال لي ابوووي ادي الحلوه دي لبانه على حسابي و سلم علي و طلع شكلو حس بالزنب...
ابوي قال لي وهووو ميت بالضحك واحد من اتنين  يا تلبسي ليك حلق.... يا اعلق لي يافطه جنبك اكتب فيها دي بتييي.. م. ممكن كل م يجي زول اقول ليهو دي بتي.... اختاري..
انا: و اجيب حلق من وين اسي انا.. علق يافطه ساااي...
ابوي: هاك..مد لي طقم كدا فيهو سلسل و حلق و خاتم و اسوره.. قال لي  دي بضاعه قديمه اصلا كنت جايبهم ليك في البيت و كل مره بنسى لي خير غايتو  ... لبسني ليهم قال لي كدا الما حيشوف الحلق بشوف السلسل😂...بقيتي حليوه❤️
انا: اصلا انا حليووووه😂 اديني لبانتي.. عشان تكمل االصوره
ابوي: لو لبستي ليك فستان كدا والله تاني م سائله في بتتت..
انا: م للدرجه دي كمان ي ابوي...
كمل اليوم بين دا داخل ودا مارق ...و بين الونسه و نصايح ابوي ❤️
________________________________________________
و نحن داخلين على الحله شفت ليك حسين الجديد.. بنزل في حاجات من تك تك... ابوي لمن شافوو مشا عليهووو و قال ليهووو.. دقيقه اساعدك ي ولدي....واتلفت علي قال لي اسلام اجرييي انتي البيت..
حسين سلم على ابوي بي حراره كدا و قال ليهو م بحتاج ي عمي انت جاي تعبان.. وسلم علي.. سلمت عليهو بدون نفس .. وبيني و بين نفسي كنت مستغربه هو بعاين لي كدا مالو يا ربي عشان فكو لي الشاش بعاين للضربه... نسيت كلو كلو اني لابسه السلسل و الحلق...