කපුටා සහ කනේරු මල

~ අහඹුවක් නොව ~

එකම සිද්ධිය තුන් හතර පස්වතාවකට වඩා වැඩියෙන් වෙනකොට ඔබට ඒකට අහඹු සිද්ධියක් කියලා කියන්නට පුළුවන්ද??? එකම සිද්ධිය එකම විදියට නැවත නැවත සිද්ධ වෙනකොට ඒක අහඹුවක්ද නැත්නම් කාගේ හරි තේරීමක්ද??

මට ඔබව හමුවන්නේ අහම්බයකින්. ඒත් ඔබට මගේ හිත ආදරය කරන්නට පටන් ගන්නේ නම් අහම්බයකින් නෙමෙයි.

"මිනිස්සුන්ට බැඳෙන එක හරි දුකක්"

සමහරු මට එහෙම කියාවි. ඒත් අහම්බයකින් බැඳෙන බැඳීම් වලට අපි මොකද කරන්නේ?? ඒත් ඒ බැඳීමේ හිරවෙන එක අපේ තෝරාගැනීමක් නෙවේද? ඔබත් මමත් ඉන්නේ ළංවෙන්න බැරි දුරක, ඒත් ඔබ මගේ ළඟින්ම වගේ මට හැඟෙන්නේ මේ අහඹු සිදුවීම් නිසා නෙමෙයිද???

එකම අහසක් යට.... මේ ඔබ මගේ ප්‍රශ්න වලට උත්තර එවන විදිය. ඒ උත්තර මම පපුවට තුරුළු කරගන්නේ හරිම ආදරෙන්. ඔබ ඒක දන්න බව මම දන්නවා..

අතීතේ දවසක එක තැනක හිරවෙලා තිබුණු යන්තමින් පණ ගැහුණු ජීවිතයකට ආදරය ගෙනාවෙ ඔබ. මම හිතන්නෙ නෑ ඒක අහඹුවක් කියලා.

නෑ.... මේ ලෝකේ අහඹු දේවල් නෑ... මේ සිද්ධවෙන හැමදේම සිදුවිය යුතු දේවල්. මේ කිසිම දෙයක් අහඹුවක් නෙමෙයි.