*
မမျှော်လင့်ခြင်းရေစီးနောက်လိုက်ရင်း
ဟိုဘက်ကမ်း ကပ်လိုက်
ဒီဘက်ကမ်း ကပ်လိုက်
ဘယ်ချိန်မှများ
သောင်ယံပေါ် ခိုနားရမှာပါလိမ့်
တစ်ခါလောက်တော့
မျှော်လင့်မိပါရဲ့။
ကိုယ် ကပ်မဲ့ကမ်းက
လက်ကမ်းကြိုဖို့
မတောင်းဆိုသလို
အရာရာပြည့်စုံနေဖို့လဲ
မျှော်လင့်မထားပါဘူး
ဘယ်အချိန် အတွင်း
ရောက်ပါစေလို့
ဆုမတောင်းသလို
ဘယ်နေရာဖြစ်ပါစေလို့လဲ
ကန့်သတ်မထားပါဘူး။
အချင်းချင်း နားလည်ပေးနိုင်တဲ့
ပွင့်ပွင့်လင်းလင်း စကားတွေပြောလို့ရတဲ့
ဟန်ဆောင်မှုတွေကင်းတဲ့
နွေးထွေးမှုတွေ ပေးနိုင်တဲ့
နေရာလေးတစ်ခုသာ။
ဒါမှမဟုတ်
တယောက်ထဲ လဲလျောင်းစရာ
တိတ်တဆိတ် တွေးတောစရာ
ချုပ်ချယ်မှုတို့ ချုပ်ငြိမ်းရာ
လွက်လပ်မှုတို့ ရှင်သန်ရာ
အမှောင်ထုရဲ့ ပွေ့ဖက်ရာ
နေရာလေးတစ်ခုဆိုလဲ
အဆင်ပြေပါတယ်။
* * *
