"အတိတ်"
အနာဂတ်ဟာ
လက်ရှိလောက် မသေချာသလို
လက်ရှိကလည်း
အတိတ်လောက်
ပျော်စရာ မကောင်းတဲ့အခါ
အမှောင်ဖုံး အိပ်ပျက်ညတွေ
အများသားပေါ့။
အိပ်မပျော်လေတိုင်း
အတိတ်ကိုခုန်ဝင်
ပျော်စရာတွေ ပြန်ရှာမိတဲ့ခဏ
ကိုယ်ဟာ...
အတိတ်ကျွန်ဖြစ်နေလေပီလား။
အနာဂတ်ကို ပုံဖော်
လက်ရှိကိုရင်ဆိုင်ဖို့
ခွန်အားတွေ မဲ့ချိန်တိုင်း
အတိတ်ကို ခုန်ဝင်
ပျော်စရာတွေ ပြန်ရှာမိတဲ့ခဏ
ကိုယ်ဟာ...
အတိတ်ကျွန်ဖြစ်နေလေပီလား။
အတိတ်ဆိုတာ ကိုယ့်အတွက်
ဖက်တွယ်ရာမဟုတ်သလို
ပြန်လိုချင်တမ်းတမိတဲ့ အရာလဲမဟုတ်
ကိုယ်ဟာလည်း...
အတိတ်နွံနှစ် ရုန်းမထွက်နိုင်တဲ့လူမဟုတ်
ဒီတော့...
ကိုယ်ဟာ အတိတ်ကျွန်မဟုတ်... မဟုတ်။
ဒါပေမဲ့...
အနာဂတ်ကို ပုံမဖော်နိုင်လေသမျှ
လက်ရှိကို ရင်မဆိုင်နိုင်လေသမျှ
အတိတ်ကို တစ်စစီပြန်ဆွဲထုတ်
အိပ်မက်ဖို့တော့ လိုနေဆဲ...
အတိတ်ဆိုတဲ့ထာဝရနယ်မှာ
ကိုယ့်အတွက်
ဘာနဲ့မှမတူလေတဲ့
အားအင်တွေ ပေးစွမ်းနိုင်တဲ့
မျှော်လင့်ခြင်းတို့ ရှင်သန်စေရာ
အကြောင်းတရားလေး တစ်ခု
ဘယ်သောခါမှမပျက်ပျယ်မဲ့
ထာဝရတည်ရှိခြင်းမျိုးနဲ့
ရှိနေခဲ့...ရှိနေသေးလေရဲ့...
လက်ရှိမှာ ကိုယ်ပြန်မရနိုင်တော့တဲ့
အနာဂတ်မှာ မရေရာလေတဲ့
ဒီအကြောင်းတရားလေး
ရှိနေလေသရွေ့
ကိုယ်ဟာ...
အတိတ်အိမ်မှာ ပျော်သူတစ်ဦးရယ်ပါ။
