ألشرماد

Part 8

#ألشرماد

#بقلم fatima kazem
------
ريناس:
اليوم موعد الكعده الكل منخبص عمامي كلهم اجو بس وجهم مايكصه السيف ويطبون ويطلعون يشمرون حجي علينه خلي يكتلو يطبه مرض ومن هل حجي
كوه ساكتين عنهم اهلي لان جانت نفسيتنه مو مال نردهم بيا حال احنه وهمه بيا حال بس الي جان عاجبني مهيب ونص من ولد عمامي يسكتون بعمامي وماراضين عليهم وهمه يشيلون روحهم ويركعوها بالكاع شلون يوكفون بوجه ابهاتهم وعمامهم اما باقي الولد لا همه يحرضون بعمامي شكد مخنثين ولعبت نفسي منهم

رهف تحسنت وابوي وحسام واني كدرنه نسحك ع رجلينه خفت الالام ع العلاج وشويه الجرح لتحم ظافر مانعرف عنه شي لسه ولا نعرف وينه ادهم وباقي الولد دورو لمن عطلو مالكو سئلو اصدقائه كلهم ماكو بس الي مطمنهم هو بغداد لان مايكدر يسافر ماعنده اي مستمسك ولا جواز وشي ثاني خايفين منه لا منتحر لان جان مو بوعيه جان داخل بصدمه
رفعت راسي للساعه جانت ب10 الصبح والكعده ب4 العصر كاعده ع الدرج وحاضنه نفسي احس نفسي الدقيقه الي تمر احسها تاخذ نص من عمري عيني ع الساعه وارجف قرب موت اخواني وقرب موتج ياريناس
انهدمتي ونهدمو اخوتج وياج انهدم بيتج داعش بالموصل ماكتلوج راح يكتلوج الدواعش الي محاوطينه ع قانون العادات والتقاليد داعش هدمو الناس تحت شعار الدين وذوله جاي يهدمون الناس تحت شعار العادات

رجعت لدوامه داعش نفس الاصوات تكررت نفس الرعب نفس الخوف
حاضنه نفسي وخاله راسي بين رجليه ومغمضه اريد انسه بس هيهات كل مااكول نسيت خلاص ريناس نسيتي وراح تعيشين براحه بس هيهات هاي الراحه تدوم لازم تخرب كل ماانسه الاصوات مال الضرب لازم شي بذكرني بيها
اصواتهم العاليه بالاستقبال توصلني وهمه يتعاركون ويه ابوي يسلمهم ظافر وهو يشيل بروحه ويركعها بالكاع ياناس ياعالم ماندله ولا انطي لو اعرف يذبحوني واحد يصد واحد يرد عمامي جانو وحوش جنت اشوفهم ازيد من داعش

صوتهم مزعج ازعجني اكثر رعبي زاد حضنت نفسي بالزايد وخليت راسي ع الحايط اركع بي بشكل خفيف رجعت لحالتي هذي من اضرب راسي اريد انسه اصواتهم ضربت راسي بالحايط حيل وكمت ارجف كزيت ع اسناني وكمت اهمس
... اشش صوتكم يزعجني كافي سكتووو كافي دواعش مجرمين قتله كلكم نفس الشي

سمعت صوت مصطفى ابن عمي قريب مني رفعت فتحت عيوني اشوفه واكف كدامي باسأ واديه بجيوبه كعد يمي ع الدرج واشرلي ادنه دنيت وكعد
مصطفى: ليش هيج ترجفين ريناس ع كيفج راح تموتين ماعليج يمضرطون وحدهم احنه بظهرج وبظهر ظافر مستعدين ننطي ركابنه الهم
... مصطفى خايفه
... لاتخافين
مارديت بس رجفه جسمي زادت بالزايد حضنت نفسي حيل رفعت عيوني اشوفه يباوع بأسى يدري بيه اخاف يعرف هل شي يذكرني بداعش وبأسوء ايامي حجه بهمس

... رجعتي لذيج الايام
نزلت دمعتي وحضنت نفسي اخاف حجيت بهمس
... اي رجعت لدوامه داعش رجعت بعد من المستحيل اكدر اطلع
زادت رجفه جسمي كعد كنبص كدامي كمش اديه يتوسل اهدء جان يحجي بس مانتبهت ع شنو جان يحجي حسيت الدنيا افترت بيه غوشت عيوني بعد ماحسيت بشي
كعدت لكيت نفسي بالغرفه مالتي من شوكت اني هنا باوعت للساعه ب12 زادت رجفه جسمي بالزايد قرب موتج هاي اخر لحضات الج زادت شهكتي باوعت للميز الي يم راسي التلفون مالتي عليه
سحبته اول مافتحته كومه اشعارات جاياتني ماهتمين الهن ودخلت للاستيديو اكلب بالصور والفيديوهات مالات ظافر وابجي
كل صوره وكل فيديو اله ذكره ضحكته شقا سوالفه مفتقدتهن حنيت للايام من يخبث ع ابوي يخلي يشيل روحه للسمه ويركعها لو من يخبث ع ادهم ويقط بي وادهم يضل يصيح جان اله بكل زاويه ذكره لكل شخص جان حافر بگلبه ذكره ومعزه
طلعت من الاستيديو واني ميته بجي وشهكتي تعله بالزايد دخلت ع الانستا كومه اشعارات جاياتني مافتحت ولا الي خلك صارلي شكد مافاتحه من يوم الي تهجمو علينه لسه ماشايفه التلفون
ردت اكلب برسايل ظافر وشقا من جان بس ايدي اخذتني للطلبات الي اجاياتني ماعرف ليش اجه اصبعي ع اول طلب فتحته كومه رسايل اخر رساله جانت مرسوله الي قبل ساعتين مكتوب بيها
... بت المنغولي اني الج