الجده نوير : ابد اخطبيها ولا عليك من احد
ام فارسّ وهي تناظر الجوهره
ام فارسّ : ان شاء الله
دكان الجد عايض —————————————-
ابو فارسّ : فارسّ وانا ابوك قم قم جب خواتك
فارسّ : ابشر
عند باب المدرسه —————————————-
كان فارسّ واقف ينادي خواته واللي من ضمهنم العنود وطلعو
غلا : تكفى فارسّ مر البقاله نبي شيء يبرد علينا بعد ذا الحر
نوف : لاتمر بقاله ولا شي ابي اروح البيت اخمد
غلا : لا تكفى فارسّ ابي بقاله !!
فارسّ: ابشري ولا نرد لك طلب
نوف : طيب ورأيي وش صار عليه مآبي أبي اروح البيت !
غلا : العنود تكفين اقنعي الزفت ذي !!
العنود : يابنت الحلال خل نمر البقاله ناخذ لنا شي نسمر عليه!
نوف فزت بسرعه
فارسّ: بسم الله عليك وش جاك
نوف قامت تضحك من خرشه فارسّ : نبي حلويات وبساكيت نسمر عليها اليوم خميس ولا ورانا شي بكره
فارسّ : زين ماعليه بس المره الجايه اركدي لا تخرشينا
غلا: يعني بنمر البقاله ؟؟
نوف : يوووه ياغلا بسألك سؤال الحين انتي تفكرين زينا
غلا : ليه
وقف فارسّ عند البقاله
فارسّ: نوف وش تبين اجيب لك
نوف : نبي ننزل
فارسّ: لا معصي العيال رايحين جايين
نوف: طيب حنا مستترات
فارسّ قعد يناظرها شوي بعدين التفت على غلا
فارسّ : غطي عيونس
العنود كان ترتاع من فارسّ خلقه بدون لا يسوي شي وش عاد لا تكلم عليها
فارسّ التفت على العنود وهي كانت مغطيه عيونها بس يبي يخرشها : وأنتي بعد غطي عيونس
العنود :زين
نزلو كلهم وكان فارسّ قدامهم بس نوف مشت قدامه
فارسّ سحبها من عباتها
فارسّ : على وين يالطيبه
نوف عاينته وهي تضحك : فارسّ من زمان ماجيت البقاله
فارسّ : زين عاد بس اركدي
نوف : ابشر من عيني ذي قبل ذي !
فارسّ وقف عند العامل : يالله روحو جيبو اللي تبون
مسكت العنود نوف من يدها وسحبتها بسرعه عشان يقضون اغراض سمرتهم
وطلعو قبل فارسّ و حاسب ومشو
وصلو البيت وكان واقف حسن عند الباب
نوف نزلت ومعها كيستها: وش عندك واقف في ذا الحر
حسن سحب الكيسه وهو يقول : احتري حظي ونصيبي
نوف : حسن جبها ما فيني حيل اتهاد انا وياك
حسن عاين الكيسه اللي في يد العنود : مشاء الله اخوي صاير كريم واخر من يدري انا
العنود ضمت كيستها : حلم تمسكها
طبعاً حسن هو اكثر واحد من عيال عمها تمون عليه
حسن : اجل ناوين على سمره اليوم
نوف : اي بس رجع كيستي
حسن : برجعها بس بشرط اني اكون معكم في السمره
فارسّ خذا الكيسه من يده وعطاها نوف : انت شكلك بتغدي مره يوم من الايام وش تبي بسمره نسوان
حسن: ترا كنت امزح
نوف : خلاص بس بعدو ابرقد
العصر في بيت الجد عايض —————————————-
طبعاً في بيت الجد عايض لازم كل عصريه قهوه
وجمعى وطبعاً الحريم في قسم والرياجيل في قسم
الجد عايض: الا يا زياد وراك ما خطبت للحين
ابو فارسّ قال متعمد : يقول توه صغير
الجد عايض: من هو الصغير ؟؟!! زياد ؟!! لا والله منت بصغير راح عليك العمر وانت ما بعد اعرست افلح واخلص تلاحق اللي بقى من عمرك من متى واللي عمره ٢٧ صغير !!
زياد : ابشر يبه ابشر
الجد عايض: وعلماً ياصلك ويتعداك مالك الا بنات عمك
هنا انصدم زياد وانقلب وجهه وهو اللي كان يطمح انه
يتزوج وحده فاهمه ومتعلمه والتفت لفارسّ يساعده
زياد : بس يايبه الله يهديك ودي اني اخذ من بناتنا من اهل الديره
فارسّ: ولا هو قصور ب بنات عمنا ولاكن وده ياخذ من بنات الديره
الجد عايض: هاذي تاليه الديره قدهم يتعايبون من اخذّ بناتنا
تنهد زياد : ابشر ابشر مالك الا اللي يطيب خاطرك
الجد عايض التفت على ابو فارسّ : جهزو عمركم ترا بكره الجمعه بنروح لمحمد نخطب وحده من بناته
آبو فارسّ: ابشر فارسّ وين اخوانك حسن وحمد ؟؟
فارسّ: عند الدكان
ابو فارسّ: اي ماعليه قم علم اهلك يتجهزون وعلم امك بالخطبه
الجد عايض: وعلم امك نوير والعنود
فارسّ :ابشرو
في قسم الحريم —————————————-
تنحنح فارسّ عشان تتغطى العنود
الجده نوير : ادخل وانا امك ادخل
فارسّ: السلام عليكم
ردو السلام
ام فارسّ: هلا وش بغيت وانا امك
فارسّ : يقول جدي تجهزو بكره بنروح عند عمي محمد كلنا
غلا بتذمر : لا مابي اروح
الجده نوير : ليه وش جاك
غلا : بيقلب لوني
نوف : الله اكبر عاد يا البياض اللي يفتح النفس
الجده نوير: وهي صادقه ما انتي بميته
اما الجوهره كان الوضع عادي عندها اما العنود بغت تطير من الوناسه وهي اللي تحب عمها محمد وبنته وعد مررره
بس ما بينت الشيء ذا بسبب وجود فارسّ
فارسّ : اجل يالله انا بروح احط الموتر في الحوش حملو عفشكم كله حتى أغراضكم يامي نوير
الجده نوير: ابشر يا أمك
وراح فارسّ يجيب السيار .
وطبعاً بيت الجد عايض وابو فارسّ بينهم حوش يعني ارض فاضيه بس تراب وحصى صغار وكانت مسوره يعني بس اهل البيتين هم اللي يدخلونها
في الحوش —————————————-
فارسّ: انا بروح الدكان وبجي المغرب فا حطو عفشكم ولا عودت ربطته ب الحبال
نوف اللي جهزت شنطتها في شوي لانها تموت على الابل ودقت التحيه
نوف: ابششر!!
وراح ياخذ اغراضه من البيت ويمشي
العنود دخلت من الباب اللي بين الحوش وبين بيتهم ومعها شنطتها هي بعد وسحبتها نوف تبيها ترقص معها
العنود : يا صديع لا يجي احداً من العيال
نوف: لا يابنت الحلال فارسّ توه طالع للدكان وحمد وحسن قدامه مافي احد هنا
العنود طبت ترقص معها وكان رقصهم استهبال وضحك
فارسّ اللي كان يشوفهم من دريشه غرفته اللي تفتح على الحوش
فارسّ: والله ان ذا البنت خبل ما اقدر اصنفها من اي صنف
بس ما كانت الرؤية له واضحه مره لانها كان لابسه جلالها
وقفت العنود يوم سمعت حس حسن جاي وتغطت نوف قعدت ترقص
ولا درت عن حسن الي تختل انخش ورا السياره بيبي يروعها
واشر العنود تسكت والعنود اللي كان كاتمه ضحكتها من فارسّ اللي
كان يأشر لها تسكت وهو ورا حسن وما امدى حسن يبي يروع نوف الا ارتاع هو ونوف والعنود وفارسّ ميتين ضحك عليهم وعلى صوتهم جات الجده نوير بعفشها تضحك من ضحكهم
حسن : جده ترضينها على ولدك
الجده نوير : وش هي ؟؟
حسن : فارسّ غدر بي من ورا وروعني
فارسّ : انا ما روعت احد
العنود : ابد ما احدً روع احد
نوف وهي ميته على انه تتبلى حسن : انا اللي مفروض اقول ترضينها ياجده
الجده نوير ضمت نوف : بسم الله عليها بنيتي لا عاد تروعنها ترا مافيها قليب
ام فارسّ من ورا وهي الي شافت كل شي : الا بسم لله على وليدي حسن
حسن : الله نصرني عليكم
العنود : بس الصدق حسن مب كان بتروع نوف
نوف : وفارسّ حبيب اخته خذا حقي منك
حسن : بس ترا هو روعني وروعك
جاء الجد عايض: انتو ما خلصتو اخلصو قبل تغيب الشمس وانت يا فارسّ اقعد لم اغراض العرب على الموتر وربطه و حسن امش معي الدكان
حسن : بس يا يبه تكفى توني جاي منه
الجد عايض : اخلص وناد فهد ولد ابو فهد معك
حسن : ابشررر
فهد اللي هو خوي حسن من وهم صغار وبيتهم الباب قدام الباب
فز حسن ينادي فهد
بيت ابو فهد —————————————-
شريفه اللي فزت ضايقه وتحسب ان اللي عند الباب فهد وهي توها متهداه معه
ام فهد : يابنتي اللبسي جلاك يمكنه مب فهد
شريفه خذت الجلال وحطته فوق راسها بس
وفتحت الباب بقوه : فهيد لك وجه ترجع يالكلب
حسن فهى شوي يستوعب المنظر اللي قدامه
هو صد بسرعه وشاف فارسّ قد هو بيطلع والتفت وشريفه من الخوف ماقدرت حتى تحرك اصبع لانها كانت متأكده ان فهد ما ابعد وبيشوفه ويفكر غلط وحسن سحب الباب بسرعه قبل يطلع فارسّ
و وقف قدامه وشريفه انحاشت بسرعه
فارسّ اللي شاف كل شيء بس قرر يسوي نفسها ما شاف : وش عندك هناّ ابوي عايض ما قالك رح ؟؟
حسن : الا الا بس احتري فهد
فهد وهو جاي من بعيد وهو يمثل العصبيه : ولد وش عندك عند باب بيتنا
حسن اختبص يحسب انه شافه : اااء كان بس ابي اسأل عنك
فهد وهو يضحك: يارجال امزح بس
حسن بانفعال : اقول بس امش معي الدكان جدي يحترينا
