وصلو مراد و افنان وتسنيم للحوش و افنان قاعدت تتفرج على الفيلا لكبيرة و يلي كانت تجنن والجنان يلي كان كله ورد وسياج لكبير يلي محاط بيه.
امل: شوفي الباب يا جيداء
جيداء: مشت تجري لى باب اكيده مراد و افنان
مراد: اول مرة تفتحي الباب بسرعة هذي
جيداء: افنان وينها جت
مراد: قعد يشوفلها ولا كأن خوها كان مسافر لا حمدلله على السلامة لا شيء
جيداء: حطت ايدها على راسها ولله نسيت، الحمدلله على سلامتك يا خوي الغالي
مراد: معادش نباها حولى خلى بندخل امي وين
امل: الحمدلله على السلامة يا وليدي وحضناتها
مراد: الله يسلمك امي
جيداء: هيا افنان ادخلى خيرك متحشمه
افنان: اهلين كيف حالك
جيداء: كويسه و انتي حبيبتي
افنان: كويسه
جيداء: كيف حالك تسنومه
تسنيم: باهي
امل: دخلى بنيت خالك يا جيداء خيرك موقفتيها في باب
جيداء: اوه من فرحه نسيت نقلك ادخلي
دخلت افنان وسلمت على عمتها وحضنتها وقعدت امل هي و افنان يبكو لان امل ذكرت خوها المرحوم وقداش كان حنون عليها هو ومرته اما افنان حست لى اول مره بلحن يلي فقداته من صغرها
مراد: امي طفلة تخاف خيرك شوفاها قريب تبكي
جيداء: شافت لتسنيم، اي امي تسنيم خايفه خلاص انتم زوز عاد
امل: خلوني نبكي قداش ليه مشفتهاش هذي راهي وصية الغالي
مراد: جيداء دخلى طفلة داخل
جيداء: هيا تسنومه ندخلو لداخل نحطلك تتفرجي على رسوم
تسنيم: و افنان
جيداء: و افنان تو تجي حتى هي
تسنيم: باهي
امل: كيف حالك يا بنيتي
افنان: كويسه
امل: عارفه انه عمك ومرته مادارو فيك خير يا بنيتي
افنان: قاعدو دموعها بس ينزلو بدون ولا كلمة
امل: قد مادرت يا بنيتي مباش يخليني ناخذك و نربيك عندي
افنان: دموعها بس يلي ينزلو بدون كلام، في خاطرها ياريتك خذيتيني من جهنم لى اني فاها
مراد: امي تمام بنت حرام عليك شوفاها بعدين عندك ظغط انتي مش كويس ليك
امل: الله غالب يا وليدي
مراد: جيداء تعالى
جيداء: شني فيه قاعدين مسكتوش
مراد: خوذيها و اشر بعيونه على افنان تغسل وجها
جيداء: تمام، هي افنان تعالى معاي حبيبتي
افنان: من كثر ما كانت منهاره يا دوبها وقفت على رجلها
مراد: هيا امي نوضي اغسلي وجهك حتى انتي
امل: الله يرحمك يا وخي الله يرحمك يا غالي
مراد: اني طالع بندوش ونغير
امل: متعطلش بنحطو لعشي
مراد: ان شاء الله
جيداء: خلاص يا افنان معادش تبكي
افنان: حضنت جيداء وبدت تبكي، كأنها كانت تبي حد تحضنه باش تبدا تبكي
جيداء: بدت تبكي معاها لان وجعتها
مراد: وهو بيدخل لغرفته تفاجئ بصوت افنان تبكي لان غرفة جيداء و مراد مقابلين بعض كان بيدخل لعندها وبيسكتها بس تراجع ودخل غرفته
اسامة: ان شاء الله خير خيرها افنان متصلة و امل شني فيه ربي يستر، خلى نشوف افنان.... بس خيرها متردش
امل: هيا يا جيداء انزلى انتي و افنان
جيداء: حاضر
افنان: بس معنديش نية ناكل
جيداء: تبي امي تزعل وهي درات لعشي على خاطرك
افنان: و خوك بيتعشى معانا
جيداء: مراد اي على نفس طاولة متحشمه منه قصدك
افنان: اي
جيداء: زي خوك اعتبريه عادي
افنان: ابتسمت ابتسامه خفيفه
امل: هيا يا تسنيم كان بتتعشي معانا بنيتي
تسنيم: وين
امل: على طاولة هني انتي مطوليش فوق نسيت
تسنيم: لالا نطول اني كبيرة
امل: ههههـ امت كبرتي
تسنيم: منعرفش
جيداء: مراد قاعد منزلش ماما
امل: قاعد يدوش شكله، تعالى قعمزي افنان هني سلم بنتي
افنان: حاضر
جيداء: و اني قعمزت قعد مراد
مراد: كأني سمعت اسمي
امل: اهو مراد وجي زاده هيا قعمزو كل
جيداء: وتسنومه
امل: تو نقعمزها معايا ونعشاها
افنان: لا يا عمتي علاش نتعب فيك تو نوكلها اني
تسنيم: نبي افنان
امل: مش حا تساعدك
افنان: لالا متعوده عادي
جيداء: شفتي ماما شن دارتلك يا افنان دارتلك حوت على خاطر تحبيه
افنان: اي ليه هلبا عليه صحيتي عميمه
امل: قداش عندي افنان اني كولى ومتتحشميش
