جيداء: تحبي فيلم يكون رعب او رومانسي افنان
افنان: عادي اي شيء مهم حلو
جيداء: خلاص في فيلم حلو هو رومانسي بس فيه شويت اكشن
افنان: عادي
جيداء: تعالى ناخذوه من غرفة مراد
افنان: يعني افلام عنده او كيف
جيداء: اي عنده هو يشري و انا نتفرج هههـ، هيا تعالى معاي
افنان: تمام
امل: شوف سلم ولدي اني قررت
مراد: شني قررتي
امل: اني بنزوجك
مراد: كان متكي عدل جلسته، شني قلنا على موضوع هذا امي
امل: لا قلت لا مقلتش، نبي نفرح بيك ونشوف صغارك
مراد: مزال بعدين سريب هذا مش مستعجل عليه
امل: امت بتتزوج يعني لما نموت اني
مراد: ربي يطول في عمرك ان شاء الله
امل: اني بنبدا ندورلك من غدوا على بنت كان انت معندكش بنت في راسك
مراد: اني بنطلع نرقد تبي حاجه
امل: نبي سلامتك بس
افنان: غرفة كلها على الاسود تهبل تبان فخمة
جيداء: خوي مراد يحب لون الاسود ومايحب حد يمس حاجه فاها فا خلى نخنبو واحد ونمشــو
افنان: فيه هلبا افلام هني، بس هذا ميزان شنو قصته
جيداء: مش عارفه بس مراد ما يحبش حد يمسه
افنان: علاش
مراد: شديرو هني انتم
جيداء: كنا بنشوفو فيلم اني و افنان
افنان: من توترها طاح الميزان من ايدها
مراد: بعصبية كان متعرفيش تشديه علاش مساته
جيداء: هي خافت منك بس
افنان: تعبو عيونها بدموع اسفه
مراد: خذي الميزان وقامه، شن فايدة تأسفك
افنان: طلعت من غرفة وهي تبكي
جيداء: حرام عليك، طلعت وراها
مشت افنان لغرفة جيداء وقعدت تبكي و جيداء قاعدة تسكت فاها
مراد: اصلا هي كيف تشد حاجه مش ليها
امل: شني فيه خيرها صواتكم طالعه خيرك يا افنان شني يلي يبكي فيك
جيداء: مراد كشخ علها
امل: علاش
جيداء: كنا بناخذو فيلم من عنده و افنان كانت تشوف في الميزان وهو لما دخل افنان انخلعت فا طاح الميزان وهو عصب علها
امل: على خاطر حاجه تافه يعيط على بنت حسابه عندي
افنان: لا يا عمتي اصلا اني غلط مكانش لازم نمس حاجه مش ليه متكلميشي تو يجي يعصب عليه
جيداء: لا مايعصبش عليك يا قلبي خلاص اهدي
امل: مراد افتح الباب
مراد: نعم يا امي شن فيه
امل: انت كيف تعيط على بنت خالك
مراد: مقلها حد تشد حاجه مش ليها
امل: وحتى لو شداته شني فاها يعني كان طاح شني طيحات متعمده هي
مراد: امي
امل: لا امي لا شيء، اكيد ميزان زي هذا مش حا يجي اغلى من افنان بنتي فاهم
مراد: قعد مقعمز على سرير وهو ساكت
امل: بنية يتيمه ومالها حد سادها لى فاها فاهم
مراد: مكانش قصدي و اكيد مكنتش متعمد نعيط علها
امل: خلاص معناها اعتذر منها
مراد: نعتذر منها اني
امل: اي يا تعتذر منها يا مستحيل نسامحك
مراد: امي بلاش تصرفات هذي مانيش عيل
امل: لى عندي قلته، وطلعت من غرفة
مراد: اتكى على سرير، اوف ماعمري اعتذرت من حد وتبيني نعتذر من بنت صبرك يا رب
اسامة: اسمعي امل اختي جيت اليوم عندنا للحوش ولقت افنان بروحها في حوش ورفعتها معاها
نوال: كيف وعلاش ترفعها بلا ماتقولنا
اسامة: بنت بروحها لقتها شني بتخلها كل منك قتلك صبح ارفعها معاك لكن انتي تسكري في راسك
نوال: وشني فاها كان قعدة بروحها بتاكلها غولة يعني
اسامة: صار لصار تو المهم كان كلماتك امل قلها ع اساس كنتي بتروحي لكن اني مجيتكش فاهمه
نوال: وكان قتلك انت علاش مجيتش لمرتك وبنت خوك بروحها
اسامة: قلتلها ان صار ظرف وحصلت ومقدرتش نروح
نوال: باهي، بس يا خوفي افنان تقوللها وتفضحنا
اسامة: مديرهاش
نوال: مانضني لكن ان شاء الله خير
اسامة: ان شاء الله اسمعي بعد غدوا مروح
نوال: يعني حتى غدوا بنقعد قدا اهلى، مش قلت يوم و بنروح
اســامة: هذا لصار تو وبلا كثر اسئلة تصبح على خير، وسكر
نوال: سكر عليه وخيره فاصل فيه اني
سحر: نهى شحن تليفوني وين
نهى: مش عارفه تقريبا خذاه محمد
سحر: اني كم مره منبهاته انه شحن تليفوني ميمساش اوف شني هذا
نهى: سمعتي ب اميره
سحر: اي سمعت قالو رجعت
نهى: اي رجعت قالو عمي بدير عشي كبير لخميس الجاي
سحر: وشني صار في خطيبها
نهى: تقريبا سيبها قالو تقريبا
سحر: اصلا هي خسرت مراد ومعادش تلقى زيه
نهى: صح هو كان يبيها ويحبها وهي خانته ولله ما تجي
سحر: بس من وجهة نظر تانية مراد مكانش خاطبها كان عاطي كلمة بس هذا علاش هي استغلت شيء هذا و كلمته غيره
نهى: و في نهاية سيبها وخانه زي ماهي خانت مراد
سحر: زعما مرت عمي امل بتجي للعشي
نهى: اكيد اصلا ماتشيليش في قلبها عمتي امل بكل
نرجس: شني توشوشو
نهى: كنا نحكو على اميرة و مراد قبل
نرجس: آه مراد رجع من سفر
سحر: اي، محمد بكري قال مراد جي وبيشوفه غدوا
نرجس: اصلا اني نبي نمشي لى عمتي امل و جيداء نشوفهم
نهى: حتى اني نبي نمشي
نرجس: خلاص نمشي اني و انتي غير نقول لى خوك قبل
نهى: تمام
جيداء: ههه هههه هذا اكثر واحد يضحك
افنان: انتي غير شوفيها هي كيف لبست هههه اول مره نحضر فيلم بطلة فيه دايرا جو
جيداء: عجبك فيلم شكله
افنان: اي عجبني هلباا ليه هلبا معادش تفرجت عليهم من حد توفى جدي
جيداء: خلاص تو نعطيك فيلم هذا و واحد تاني روحي بيهم
افنان: لالا مانبيش باش بعدين يجيني خوك يقتلني في مكاني
جيداء: لالا مراد مش سيء يا افنان تشوفي فيه هكي ميضحكش ديما صح لكن صدقيني في يوم من الايام كانت ضحكة ما تفرقش فيه بكل
افنان: بتعجب باهي شني يلي غيره وخلاه هكي
جيداء: هلبا حاجات
افنان: زي شن
جيداء: زي انه بابا توفى بين ايديه وكان متعلق بيه هلبا
و زي انه بنت يلي حبها خاناته في اصعب ضروفه
افنان: بحزن يعني هو مر بكل هذا
جيداء: يمكن انتي لانك خسرتي اهلك وتوفو حا تفهمي وجع هذا لما تفقدي بوك او امك ومراد مقدرش يتخطى
افنان: بحزن بس انتم على اقل امكم عايشه يا ريتها امي قعدت عايشه يا ريتها
جيداء: خلاص متزعليش مش قصدي تو كنا نضحكو
افنان: لالا خلاص اليوم مش حا نزعل
جيداء: ايوه خليك فرحانه هكي
انس: خدمة حتى يلي بلا عقل مايخدمهاش
عبدو: خيرك يا همي و انت زي مرا اربعة وعشرين ساعة تنق
انس: اني بنق منو دخله فيه حتى حياتي يلي هي حياتي يبو يدخلو فاها
عبدو: برا بعيد عليه و ان شاء الله تخلاها الدنيا
انس: مش ماشي مقعمز غير هني و يلي ميبيش يسمع نقاني يطلع
عبدو: استغفر الله وخلاص
مريم: خيركم زي صغار تتناقرو متكبروش
عبدو: احكي مع ولدك يلي لا يكبر لا شيء
مريم: خيرك مع خوك
انس: جاي نعبر على مشاعري معجباش ولدك فالح
مريم: خوك اكبر منك احترمه واطي صوتك قدامه ويلي يقلك عليه ديره
انس: و انت علاش ديما صافه معاه هو
مريم: اني صافه مع الحق وبطل العوج لدير فيه خيرلك
انس: امي
مريم: اعتذر من خوك
انس: اسف تريحتي تو
مريم: اي
عبدو: شني بكري قتلى نجوى تبيني
مريم: لخميس الجاي بنديرو لعشي لى اميرة و نبي حاجات ناقصينا
عبدو: تمام غدوا تو نجيبهم قوليلي عليهم و ذكريني غدوا
مريم: ان شاء الله، و انت يا انس غدوا بترفعني لى خالتك مريضة بنشوفها
انس: ان شاء الله
مراد: تمام غدوا تو نمر على مكتب و قله يجي ويجيب ملف قضية
محسن: تمام سامحنا على تعب يا مراد
مراد: مش بينا يا محسن
محسن: كثر الله من امثالك
مراد: ان شاء الله
محسن: ان شاء الله
مراد: ان شاء الله، تصبح على خير
محسن: و انت من اهل الخير
مراد: سكر هاتفو لوحه جنبه على سرير و رقد
..
امل: جيداء جيداء
جيداء: نعم
امل: هيا نوضي كان بتمشي للجامعة باص قريب يجي
جيداء: اوف الواحد تعب من نوضان بكري
امل: تكلمي بشويا بنت خالك راقده
جيداء: شوفاها كيف راقده تقول ميته
امل: على ما سهرتو البارح، هيا سقدي روحك
جيداء: باهي
مراد: صباح الخير يام
امل: صباح النور شني طالع
مراد: مع ظهر بنطلع عندي قضية وبنستلم ملفها
امل: ربي يعاونك ويوفقك يا وليدي
مراد: ان شاء الله
امل: هيا تعالى وتيت لفطور باش نفطرو
مراد: تمام
نوال: هيا يا انسام نوضي باش تفطري
زهرة: خيرك مع لبنية خلها راقدة
نوال: خلى تنوض تو باش ترقد في ظهر ومتقعدش دور في شمس
زهرة: هو مافيش شمس اليوم دنيا مغيمة شكلها لمطر بتسب
نوال: ان شاء الله
جيداء: صباح الخير
مراد: صباح النور
امل: هيا تعالى افطري قبل لا تمشي
جيداء: معنديش نية بنمشي اصلا باص قريب يوصل
مراد: عندك فلوس
جيداء: لا تمو مني
امل: مسرع تمو هو عاطيك 500 ولامس
جيداء: ماهي شيتات و فطور وشريت حاجات
مراد: هي مش صرفتهم هي داستهم
جيداء: حرام عليك معادش نبي اصلا
مراد: تعالى هاك و اقري كويس و ردي بالك من روحك
جيداء: احسن خو في دنيا
امل: شني صار في عمك علي مقالوش كيف وضعه
مراد: قاعد في عناية
امل: ربي يشبح فيه مسكين معناها سلم ولدي باش ترفعني و انت طالع عندهم حطني نشوف سومية ولما تروح ادهم عليه
مراد: ان شاء الله ظهر نرفعك
جيداء: و افنان
مراد: انتي امت بتروحي
جيداء: 3 او 4 على محاضرة وباص
امل: نرفعها معاي هي و تسنيم
جيداء: بس انتي بتعطلي باش تروحي و اني منبيش نقعد بروحي لما نروح نبي نهدرز علها هي اليوم بس بتقعد وغدوا بتروح
امل: بس منقدرش نخلها بروحها نخاف علها
جيداء: مش حا يصيرلها شيء يا امي خلوها اهي معاها تسنيم و اصلا مش حا نعطل هلبا علها
مراد: لا بتمشي مع امي
جيداء: بس..
امل: باص جي هيا بري
جيداء: مشت طلعت
امل: معناها اني تو بنمشي لحوش عمك منير على خاطر اميره رجعت من السفر و نجي بسرعة باش ترفعني
مراد: في خاطره مالقت امت ترجع، تمام
امل: خليك في الحوش بنويت خالك راقدات
مراد: ان شاء الله
خالد: شني الحياة معاك يا اسامة
اسامة: ماشه يا راجل اهي
خالد: شني شكلك مفلس
اسامة: فلست يا رجل
خالد: خيرك
اسامة: الواحد معادش عارف كيف بيتصرف والفلوس تقول مربيات يجو منه يمشو منه
خالد: ولهى إلا مزبوط هي
اسامة: ربي يفرج
خالد: اسمع بنقلك
اسامة: شني
خالد: مش عندك بنت خوك لتربي فاها
اسامة: اي خيرها
خالد: كم عمرها
اسامة: علاش
خالد: غير قداش
اسامة: 22 بقولي
خالد: معناها في عمر زواج
اسامة: مفهمتش
خالد: شوف في واحد نعرفه يدور لولده ويبي يتزوج وحالتهم مادية فوق ريح
اسامة: وشني وضعه يعني
خالد: يشرب بس لكن مش ديما
اسامة: لالا فكنا مش ناقصنا
خالد: يودي تربح في جرته بعدين مش مدمن مرا مرا يشرب وينه تو لى ميشربش وبعدين فلوس معبين
اسامة: شني يقولو عليه ناس بعدين يا راجل فكني
خالد: ماحد يعرف انه يشرب و انت شني متعرفش تحصل في جرتها فلوس خير ما تقعدلك وقطار يفوتها وتقعد تصرف علها
اسامة: مش عارف
افنان: جيداء وينها بعدين ساعة كم تو اول مره نقعد راقده هكي
