Naw na tɛm fɔ mek di pipul dɛm gɛda ɛn vot di nyu edman we dɛm want. Bɔt bifo dis tɛm, di yut lida we na josɛf ɛn di dɛpyuti yut lida we na meri, we in sɛf na timni pikin, bin gɛt fɔ gɛda ɔl di yɔng man ɛn yɔng wuman dɛm na di kɔmyuniti fɔ shɔt mitin bifɔ di ilɛkshɔn de stat. Mi sɛf bin taya bɔt a bin jɛs gɛt fɔ atɛnd bikɔs mi sɛf na big yutman na di kɔmyuniti.
A rich na di mitin we i dɔn ɔlrɛdi stat, ɛn na dis a mit josɛf de tɛl i kɔmpin yut dɛm "Mi brɔda ɛn sistaz dɛm una gud aftanun. A tɛl ina plɛnti tɛnki fɔ we una lɛf ina wok dɛm ɛn attɛnd dis shɔt mitin. Wɛl ɛnti una no se hawaz frɔm naw wi de go pik wi nyu edman nɔ to so? Wɛl di pɔpoz ɔf dis mitin na fɔ mek wi ɔl gɛt wan wɔd. Fɔ kɔt lɔng tori shɔt, a want mek wi ɔl go put am fɔ pa Sori. Ɛnti una no di las gbongbosoro we pas wi di las tɛm we wi gi timni man pawa na dis kɔmyuniti? Wɛl fɔ seka dis, a want mek wi ɔl go put am fɔ Pa Sori".
D tɔk nɔ kol na josɛf in mɔt sɛf na in meri kɔt am fup! "Josɛf, yu na mi big wan ɛn a gɛt ay rɛspɛkt fɔ yu. If a bin no nɔmɔ se na seka dis mek u kɔl dis mitin, a nɔ fɔ bin kam. Yu si dis patikyula tɔk ya, a nɔ go agri wit yu bikɔs yu, lɛk bɔku pipul we gada ya so tide no se pa sori nɔ to gud ɛgzampul ɔf lidaship na dis kɔmyuniti. Bɔt luk pa Abu, wi nɔ ɛva yɛri i nem pan bad na dis kɔmyuniti, ɛn i ɔlwez de sɔpɔt ɛn ɛp wi di yut dɛm na dis kɔmyuniti ivin bifo dis ilɛkshɔn de stat. Nɔ to bikɔs pa Abu na timni man go mek wi nɔ gi am di edman taytul if i dizav am" Wɛl na so plaba tek stat o mi fambul dɛm!
ɔlman bigin tɔk i yon. Udat de ala se "na pa Sori wi de gi" ɛn sɔm ɔda wan dɛn se "na pa Abu na di rayt man fɔ dis pozishɔn" Wɛl di plaba bin wan lid to sɔm smal kuskas, but as di kɔmyuniti yut advaysa ɛn wip a bin gɛt fɔ intaven. D ples bin tu nɔyzi so pas we a bin gɛt fɔ fɛn wan shɔt stik ɛn nak am na di panbɔdi tri tɛm. Di nɔys we kɔmɔt bin lawd so ɔlman tɔn biyɛn ɛn fes mi.
"Duya una lisin to wetin a gɛt fɔ se" as a bigin fɔ tɛl dɛn. "Wɛl ɛnti una no se di ilɛkshɔn de stat jisnɔ, nɔ to so?" Sɔm man ala "yɛs", sɔm man nɔ bɔda luk mi. Bɔt dat nɔ stɔp mi fɔ mek a nɔ tɔk d tru. A tɛl dɛm se "wi ɔl no se pa Abu na timni man, bɔt nɔ to dat fɔ mek wi nɔ gi am di edman taytul if i dizav am. Pa Sori we una wan go gi pawa so, i ɛva gi wi di yutman dɛn mɔni bifɔ dis ilɛkshɔn? Nɔ to las mɔnt wi bigin si i de do gud na di kɔmyuniti jɛs fɔ mek wi gi am pawa?" Na in meri sɛf ala "yɛs! tɛl dɛm di tru. Na mɔni ɛn traybalizim dɔn blaynd dɛn yay" Di wɔd bin mɔna josɛf so in sɛf bin gɛt fɔ tɔk se "Bo kɔmɔt, aw u nɔ go tɔk fɔ pa Abu, na u kɔmpin timni man. Na di rizin dis we uman nɔ fɔ de usay man dɛn de tɔk, yu ples fayasay" Bɔbɔ, kam si di wan dɛn we de bakɔp Josɛf "Na tru! na tru!"
Di nɔys bigin bɔku bak, so r bin gɛt fɔ nak d panbɔdi wan mɔ tɛm fɔ kɔl ɔlman to ɔda.
A kɔntinyu fɔ tɛl dɛn se "Wɛl usay tru de lɛ wi tɔk am. mi nɔ go fɔs ɛnibɔdi fɔ vot fɔ pa Abu ɔ Pa Sori, bɔt una mɛmba se, if wi mek di rayt chɔys, na wi ɔl gɛt fɔ ɛnjɔy, ɛn if wi mek d wrɔng chɔys na wi ɔl gɛt fɔ si di lalapinta!
Wi ɔl na wan insay dis kɔmyuniti, lɛ wi kɔmɔt biyɛn traybalizim ɛn jɛnda-Diskrimineshɔn, dɛn nɔ de kɛr wi go nɔsay. If una fil se na pa Sori na di rayt man fɔ di taytul, ina go gi am. IF una we de oba yanda bak fil se na Pa Abu na di rayt man fɔ dis taytul, ina go vot fɔ am. Bɔt duya, lɛ wi nɔ fɛt wi sɛf fɔ seka pɔlitiks, na wan kɔmyuniti wi gɛt, if i pwɛl na wi ɔl go sɔfa. So duya mi a de beg una, "Wɛda u na timni ɔ limba, lɛ wi ɔl jɔyn an fɔ mek pis de"!
I nɔ bin izi bɔt me advays bin ɛnta dɛn yes gud! Di fɔs tin we a do na fɔ mek shɔ se ɔl man ɔg in kɔmpin ɛn fɔgɛt bɔt dɛn traybal difrɛns. Josɛf ɛn Meri bin gɛt fɔ ɔg dɛn sɛf, if una si di brayt smayl we kɔmɔ na dɛn fes, lɛk santɛn san.
