Pa Abu sɛf bin shɔk wit di rizɔlt, bikɔs i nɔ bin de ɛspekt se i go win. Fɔ privɛnt fɛt fɛt, di ilɛkshɔn ɔganayza dɛm bin gɛt fɔ sho di kɔmyuniti pipul dɛn di tali bɔks dɛm. Ɛn dɛn bin gɛt fɔ kɔnt ɔl d vots dɛn bak wan bay wan kojumakoju bifo ɔlman yay.
Afta ɔl dis,dɛn kɔl pa Sori ɛn pa Abu insay di kɔmyuniti sɛnta ɛn tɔk to dɛm prayvetli. Di diskɔshɔn bin tek ɔp to twɛnti minits, wi jɛs si pa Abu ɛn pa Sori de kɔmɔt na do wit smayl na dɛn fes. Dɛn shek an ɛn hɔg dɛnsef bifo di ol kɔmyuniti.
Dis bin mek ɔlman shɔk bɔt gladi. pa Sori bin leta tɔk to in sɔpɔtaz ɛn tɛl dɛn se "Mi pipul dɛm, a tɛl una plɛnti tɛnki fɔ ina sɔpɔt. Dis man we tinap nyia mi na mi brɔda.A dɔn sabi am frɔm skul dez, so nɔ to ilɛkshɔn fɔ mek wi tɔn ɛnimi. Di pipul dɛn we de inchaj ɔf di ilɛkshɔn dɔn sho ɛn ɛksplen to wi aw una vote,ɛn akɔdin to una vot na pa Abu way tinap ya so wit mi win dis ilɛkshɔn fri ɛn fiya. So mi fambul dɛn, na wi nyu edman dis". pa sori ol pa abu in an ɛn es am up.
Fambul dɛn, una kam si gladi gladi na di kɔmyuniti sɛnta. Na in wan juman na di krawd sɛf ala se "Rɛspɛkt pape, rɛspɛkt! Na so in fɔ bi, wi ɔl na blɔd"
Pa Abu sɛf bin gɛt fɔ tɛl di pipul dɛn plɛnti tɛnki we dɛn vot fɔ am "Mi pipul dɛn, a tɛl una plɛnti tɛnki we una nɔ alaw wan fish fɔ pwɛl ɔl di ɔda fish dɛn na di blay. we babu sɔk lɛm, nɔ to mɔnki in tit fɔ sawa. A no se d las edman we bin ɛd dis kɔmyuniti bin dɔn sɛt vɛri bad rɛkɔd fɔ wi di timni man dɛn na dis kɔmyuniti. Bɔt mi pipul dɛm tide, r tinap ya so as una pikin ɛn brɔda, duya una lɛ wi put dis traybal biznɛs na kɔna ɛn fɛt fɔ push dis kɔmyuniti go bifo. A de prɔmis una se, una nɔ go rigrɛt we una gi mi dis pawa. As a de shek ɛn lift pa Sori in an, na so a want LƐ WI ƆL JƆYN AN FƆ MEK PIS DE.
