"A se salon man ɛn wuman ansa pipul...wetin do wi swit salone fɔ pwɛl na wi an!!?"
Fambul dɛn, na so a tek wɛlkɔm una na mi kɔmyuniti. mi kɔmyuniti na fayn kɔmyuniti ɛn na so i fayn fɔ wach, wi gɛt ɔltin we wi nid. wi gɛt layt, wi gɛt pɔmp wata,ɛn na so wi rod dɛm ɔl fayn lɛk d wan dɛn na paradays.
Bɔt ayah! wi gɛt wan gren prɔblɛm we wan tinap pa wi lɛk kɔntitri, ɛn dis prɔblɛm na TRAYBALIZIM!
A blant si kɔmyuniti way lɛk pɔlitiks ɛn traybal biznɛs bɔt mi kɔmyuniti kam fɔs.
Rayt naw sɛf, if una tek okada ɛn kam dɔng to wi, una go si we pipul de ladida lɛk na krismɛs dɔn kam, bɔt na ilɛkshɔn wi de pan so.
Di tɛm dɔn rich fɔ mek wi gɛt wi nyu edman na d kɔmyuniti.
wi gɛt tu strɔng buk man dɛm we de kɔmpit fɔ dis taytul. Wan na PA SORI, we de sɔpɔt pati wayt, we pipul dɛm kin kɔl SALON FƆ BƐTƐ. Di ɔda wan na PA ABU, we de sɔpɔt pati blak, we pipul dɛm kin kɔl,SALON FƆ GO BIFO. D las edman we wi bin gɛt na PA ALMAMI, we bin kɔmɔt frɔm pati blak.
Wi gɛt tu mɔ dez fɔ mek wi go vot fɔ d nyu edman we wi want, so rayt naw, pa sori n pa abu de kampen soba wan. Bɔt usay tru de, bitwin dɛn tu ya we de kɔmpit fɔ dis taytul, pa Abu na in nɔmɔ bi de sɔpɔt di pipul dɛm ivin bifo dis ilɛkshɔn de stat. Bɔt sɔm pipul se na pa Sori dɛm want, Jɛs bikɔs di kɔmyuniti na limba kɔmyuniti, ɛn Pa Abu naw na tipikal TIMNI man.
So di pipul dɛm say timni man nɔ de rul dɛm egen, bikɔs di las tɛm we timni man bi edman fɔ di kɔmyuniti, na i kɔmpin timni man dɛm nɔmɔ i bi de ɛp. pa ɔl we Pa Abu bin de du dɛm gud ɛn ɔlwez de sho ikwal lɔv to ɔlman na di kɔmyuniti, sɔm traybal pipul dɛn stil se dɛm nɔ want am.
Naw lɛ wi kam to Pa Sori i yon say. Pa Sori na tipikal LIMBA man. Bɔt bifo dis tɛm, i nɔ bi ɛva wan no bɔt di kɔmyuniti ɔntil tu mɔnts bifo dis ilɛkshɔn. Na da tɛm de i bigin fɔ sheb mɔni na chɔch ɛn mɔsk, ɛn bigin tɔk to di pipul dɛm limba fɔ mek ɔlman no se in na limba pikin. Pa sori gɛt mɔni pas Pa Abu fa fa we, frɔm salon to rɔsha bay fut. Bɔt pa sori i yon prɔblɛm naw na uman biznɛs! Olde i pas biyɛn dɛn smɔl pikin dɛm na d kɔmyuniti.
