Bifo jako de kɔt yay, wi ɔl dɔn gɛda na di kɔmyuniti sɛnta fɔ vot. Awt ɔf wi fayv ɔndrɛd ɛn fifti we de na di kɔmyuniti, na wi tri ɔndrɛd ɛn sɛvinti siks nɔmɔ bin kwalifay fɔ vot. Di wan dɛn we de inchaj ɔf di ilɛkshɔn bin gɛt fɔ pak wi fayn. Tu layn fɔ man ɛn tu layn fɔ di uman dɛn, so dat di ilɛkshɔn go kɔmɔt fayn ɛn dɔn kwik.
Mɔni man nɔ at fɔ sabi, me fambul dɛn, if una si we pa sori e bɔbɔ dɛm de sheb rɛs,ɔyl ɛn pamayn bay kɔp, ina go fil se na sara.
Pa Abu i yon bɔbɔ dɛn sɛf bin de sheb wata bay bɔndul as di pipul dɛn bin de ɛnta di kɔmyuniti sɛnta fɔ go vot.
Bɔt as krio man kin se "yu nɔ go fatin yu pig ɔn di makit de" sem we so as "ol dɔg nɔba gɛt nyu nem" Wɛl na so wi ɔl tek ɛnta ɛn kɔmɔt na do wan bay wan. Bifo dɛn de kɔl siks oklɔk preya, di votin bin dɔn kɔmplit, so ɔlman bin gɛt fɔ go na dɛn os dɛn ɛn wet fɔ yɛri di rizɔlt.
Olnet d kɔmyuniti nɔ gɛt rɛst, pa Sori i bɔbɔ dɛm bin jɛs de pata lawd mizik na d kɔmyuniti, ɛn a yɛri dɛm de nak chɛst pa spika se "Lɛ wi sɛlibret bho, na wi pa dɔn win"
Shap sɛvin oklɔk d nɛks mɔnin, wi ɔl dɔn gɛda na di kɔmyuniti sɛnta fɔ yɛri di rizɔlt.
Di wan dɛn we bin de inchaj ɔf di ilɛkshɔn rili sabi du dɛn wok. Dɛm ɔganayz di pipul dɛm fayn, ɛn na so ɔlsay bin mek yen yen! If nidul fɔdɔm na grɔn sɛf una go yɛri di sawnd tri tɛm.
"Abu kamara: Salon fɔ go bifo, wan ɔndrɛd ɛn eti nayn vots" Mi fambul dɛn!! Na so ɔlman mek yen yen de wet fɔ yɛri di nɛks rizɔlt. So di ilɛkshɔn bɔs bin kɔntinyu fɔ kɔl di rizɔlt "Sori kalawa" Na in pa Sori i sɔpɔtaz dɛm bigin ala "YEE!!"
"If una kɔntinyu fɔ mek nɔys a go stɔp fɔ anawns di rizɔlt" Na so di ilɛkshɔn bɔs tek kɔntrol ɛn ɛnd ɔl di nɔys te ɔlsay mek yen yen bak. Afta sɔm tɛm, i kɔntinyu fɔ kɔl di rizɔlt "Sori Kalawa: Salon fɔ bɛtɛ, wan ɔndrɛd ɛn sɛvinti siks vots" Fambul dɛn, una wan yɛri nɔys!!? "YEE!!! Da bɔd we de it rɛs na fam nɔ de tɔk bɔku" as pa Abu in sɔpɔtaz dɛm bin tawa fɔ sing ɛn dans pan dɔst!
Pa Sori ɛn in sɔpɔtaz dɛm bin jɛs de lɛf mɔt wit dɛn an na dɛm ed. Sɔm man bigin ala se "Nɔ bo, wi nɔ go gri. wi fɔ vot bak, na rog dɛm rog. Timni man nɔ de kam rul wi tu tɛm!"
